Search form

NAMBAR 17

Arona khianghrol

1Khanchu Rengpa’n Mosia a chongpuia, 2“Israel irchihai inhrilin lân, khianghrol sômhleihni nang pehai sianlân, nam hruaitu tinin inkhat seng nang pe an ta, khianghrol tina khan an irhming irziak ro; 3Levi khianghrola khan Arona irhming irziakin lân, nam tina hruaituhaiin khianghrol inkhat seng nei an ti. 4Khanchu nang ki ichongpuina irtongna Biakbuk, thu inhriattirna, maton tiang khan sehai roh. 5Khanchu mi ki inthang hrangtu khianghrol kha chu hon cher suak a ta, khanchu Israel irchihai chiarna, ni chunga an chiarna hi inboitirpai ki ti,” a tia.

6Khanchu Mosia’n Israel irchihai chu chongpuihai a ta, khanchu nam tina hruaituhaiin khianghrol inkhat seng an pêka, an rêngin khianghrol sômhleihni a ni. Arona khianghrol khom kha an khianghrolhai laia khan a om sa. 7Khanchu Mosia’n thu inhriattirna puan ina khan Rengpa makunga khianghrolhai kha a siaa. 8 Khan zîng nôka chu Mosia kha thu inhriattirna puan ina khan a fea, irngai ro, Levi panama khianghrol chu a hon cher suak kha a hmu’n chu a para almond angin a raa. 9Mosia’n Rengpa makung rengata khianghrol murdi chu Israelhai kuang a chôia, an lei ena, an khianghrol seng an lâka. 10Khanchu Rengpa’n Mosia kuang, “Arona khianghrol kha thu inhriattirna maton tiang khan se nôk ro, kha kha Israel tehelzong nuamhai ta hranga irsinsiana chu ni a ta, an chiarnahai hi an mong noa ni’n chu, thi ving an ti,” a tia. 11Rengpa’n thu a ipêk lam ang takin Mosia’n a tho tâka.

12Khanchu Israel irchihaiin Mosia kuang, “Irngai ro, a’rhmang kin ni ta hi, kin siat zoia kin siat zoi ving ta; 13Rengpa Biakbuk nâituhai kai chu an thi hranga a lei ni’n te, kin irhmang ving hrang ni a ti?,” an tia.