Search form

NAMBAR 19

Irthiang loihai thâr irthiangna

1Khanchu Rengpa’n Mosia le Arona a chongpuihaia, 2Hi hi Rengpa thupêk dân chu a ni; Israel irchihai chu sehrât irla a sen, demnaboi ringkol la pêl ngai loi hong kai hrangin hrilhai roh. 3Ochai Eliazara pe ni ta, ama’n riakbuk pên tiang hruai suak a ta, a makunga that a ini hrang a ni. 4Ochai Eliazara’n a thisen kha a kutpâra luak a ta, irtongna Biakbuk tiang voisari inthek a ti. 5Sa kha a pumin, a vun, a hmê a thisen le a rîlhai kha ochai makunga hâlpai a ini hrang a ni. 6Khanchu ochaiin sidar thing le husop le patzâisen la a ta, sehrât irla an ihâlna khan pai a ti. 7Khanchu ochai kha a silkaihai sôp a ta, tui irsil a ta, khanchu riakbuka fe a ta, khohloi dênin ochai kha irthiang loi a ini hrang a ni. 8A hâltu khom khan a silkaihai sôp a ta, tui irsil a ta, khohloi dênin irthiang loi ni a ti. 9 Khan Pathian dâna mi irthiang inkhat khôkin sehrât an ihâlna irvâm kha irkhôm a ta, riakbuk pên tiang, hmun irthianga khan sia a ta; kha kha Israel mipuihai dâna irthiang loihai thâr irthiangna hrang tui siana hrangin savingin hrê a ti. Hi dân hi sual sôpinfâina hrangin an tho ngai. 10Khan sehrât irvâm irkhômpu khan a silkaihai sôp a ta, khohloi dênin irthiang loi ni a ti. Hi dân hi Israel irchihai le nam dang an kuanga omhai ta hranga kumtuanga dân hrang chu ni a ti.

Mithi ruak tônna thu

11Mi tukhom ruak tôntu kai chu sûn sari sûng chu irthiang loi ni an ti. 12Ama chu a sûn thum ni le sûn sari nihaia khan tui kathâr leh irthâr irthiang a ta, khanchu irthiang hong ni a ti. Khannisian sûn thum ni le sûn sari ni a’rthâr irthiang noa ni’n chu, irthiang loi la ni a ti. 13Tukhom ruak tôna a’rthâr irthiang noa ni’n chu irthiang loiin om mai a ti, tui kathâr kha a chunga buakin a om no sikin. Rengpa Biakbuk porinchetirtu a nia, khasikin ama chu Israel irchihai lai ata sâtthâkin om a ti. 14Khan mi puan ina thi a ni’n chu, puan ina lûtpuhai le a sûnga omtuhai chu sûn sari sûng chu irthiang loi ni an ti. 15Khan bêl le bûr irhong a sîngna leh sîng loihai khom irthiang loi ni sa an ti. 16Khan mi tukhomin pên tianga irdoinaa thi mani, aninole thi balama thi, a ruak mani, a ru mani, aninole a thân mani khom a tôna ni’n chu, ama chu sûn sari sûng chu irthiang loiin om a ti.

17An irthiang loina irthiangna hrangin sehrât irla a sen, sual infâina hranga an ihâlna irvâm senkhat kha la a ta, bêl sûnga thun a ta, tuidunga tui irthiang kha sung a ti. 18Khanchu mi irthiangin husop kha la a ta, tuia khan inchie a ta, puan inhai, bêl le bûrhai, khataka mi a om murdihai ru mani, mithi ruak mani, thân mani a tônpuhai chu inthek a ta; 19khanchu mi irthiangin, a sûn thumna le sûn sarina khan tui kha mi irthiang loitu kha inthekkhum a ti, khan a sûn sari ni khan mi irthiang loitu kha thâr irthiang a ta, a silkaihai kha sôpin, tui irsil a ta, khanchu zîng tiang chu irthiang hong ni thei ta a ti. 20Mi tukhom Pathian dâna irthiang loitu chu a’rthâr irthiang mâka chu ama chu irthiang loiin om mai a ti, tui kathâr kha a chunga inthek a la ni no sikin. Rengpa hmun irthiang a porinchetir sikin mipuihai lai ata sâtthâkin om a ti. 21Hi dân hi itiklai khomin nin ihmang hrang chu a ni. Tui kathâr inthekpu khom khan a silkaihai sôp a ta, mi tukhom tui tônpu kai chu khohloi dênin irthiang loiin om an ti. 22Khanchu mi irthiang loitu khan a itôn kai chu irthiang loi chang an ta, ama tôn nôktu khom kha khohloi dênin irthiang loiin om a ti, a tia.