Search form

NAMBAR 24

1Khanchu Balaama’n Israelhai sat a ivur hi Pathianin a nuampui a nih ti an hriat suak tâka; khasikin matona anga irsinsiana dang zong ta loiin ram tiang a fe tâka. 2Khan Balaama’n Israel irchihai chu ama panama an om kha a hmuin chu, Pathian irtha a chunga a zuang tunga, 3khanchu hi thu hi a leihril tâka;

“Beora nâipa Balaama leihrilna,

fel taka hmu theituhai chu;

4Pathianin thu a ihrilhai inhriat theia,

mit leh en maia inlârna hmutu,

Pathian Itinrêngthothei kuang ata inlârna hmutu’n.

5Israelhai puan in chu a sate’n a saa,

6Tûm thing irtâng angin a’rtânga,

Tuidung kôla irhuanhai ang a ni;

Rengpa iphun aloe hai ang a nia,

tuidung kôla sidar thing ang a ni.

7Rotui tamtak dong an ta,

an chîmuhai chu tui omna hmuna tû an ti.

An rênghai khom chu Agaga nêkin roiinpui an ta;

a roirêlna khom ram hlatak dên a ti.

8Pathianin Aigupta ram ata a hruai suakhaia,

anni ta hrangin rama sele angin an râlhai a doi pehai ngai.

An râlhai chu an hnê pehaia,

an ruhai irnoitirin, an sâihlihai khom an khiaktir pehai ngai.

9 Hi nam hi chu kâmkeibaknei hrât tak ang a nia,

a inin chu tûte’n kaithoi ngam ngai mahai.

Israelhai satvurtu chu satvurin om a ta,

Israelhai khuasâltu chu khosâlin om a ti,” a tia.

10Khanchu Balaama chunga Balaka chu a ning an mur pea; Balaka’n Balaama kuang, “Ki râlhai khuasâl hrangin nang ki koia, khannisian hi voithum sat ni vurhai tâka. 11Khasikin ni omna tiang rot ta ro, roiinpui taka nang chôiirsâng ki nuama khannisian Rengpa’n nang phal loi a ni hi,” a tia.

12Khanchu Balaama’n Balaka kuang, “Palai ni hong itîrhai kuang khom khan ki ihril mo ni ta ma, 13ni ina rângachak le tangkahai hi ni pe ving khomin lân, Rengpa thupêk chu zôm loiin, ki bingin ite tho no ning, Rengpa’n hril hrang a ni iti vai kêng ki ihril hrang,” tiin.

Balaama leihrilna hnungkhôn

14Khan Balaama’n Balaka kuang, “Irngai ro, atûn chu ki mihai kuang kîr nôk hrang ki ni ta, khannisian ki kîr nôk mân hin, sûnmatona ni mihai chunga an itho hrang lam hi nang la irhmutir ki ti,” a tia. 15Khanchu hi leihrilna hi a hril pe tâka:

“Beora nâipa Balaama leihrilna,

fel taka hmu theitu thuhai chu,

16Pathianin thu a ihrilhai inhriat theia,

inchungtak ata inhriatna hmu theitu,

mit le en maia inlâr hmutu,

Itinrêngthothei ata inlârna hmutu’n;

17sûnmaton tiang ki ena,

Israel namhai ki hmua;

ârsi vâr tak anga rêng kha nam ata la suak a ta,

sim tianga meikhu angin Israel ata hong suak a ti.

Moab hruaituhai kha doi a ta,

Setha mihai chu lan hnêhai a ti.

18Edom-a râlhai chu doi a ta,

an ramhai chu ama ta lan chang ving a ti;

Israel chu a râl murdi inhnêin om mai a ti.

19Israel namhaiin sirphahai an ta,

a la hring sunhai khom la’rhmangtir ving thei a ti,” a tia.

20Khanchu Balaama inlârna khan Amalek mihai a hmua; hi leihrilna thu hi a hrila:

“Amalek chu nam tin laia a hrât tak a nia,

khannisian a hnungkhôn taka chu kumtuanga hrangin irhmangin om a ti,” a tia.

21Khanchu inlârna’n Ken mihai a hmu nôka, hi leihrilna thu hi a hrila:

“Ni omna hmun chu a deta,

nir bu chu lungpui chunga om a nia,

22Khannisian Ken mihai chu inboiin la om an ti.

Assuria suaka nang an hruai tika,” a tia.

23Balaama’n hi leihrilna thu hi a hrila,

“Kho tianga mi mo an ini,

hmâr tiang irbûmhai hi?

24Kittim ram ata irkuanghai hong tung a ta,

Assuria le Eber chu rûn an ta,

khannisian anni khom chu inboipaiin om an ti,” a tia.

25Khanchu Balaama chu a thoia, an khua tiang a fe tâka, Balaka khom a fe sa tâka.