Search form

NAMBAR 3

Arona insûngkuahai

1Hihai hi Sinai tânga Rengpa’n Mosia a chongpui laia Arona le Mosia in sûngkuahai chu an ni. 2 Arona’n nâipasal minli a neia, a nâilutîr tak chu Nadaba a nia, khan Abihua, Eleazara le Ithamara hai hi an ni. 3Anni chu sahriak nâl an nia, ochai hranga inhlan an ni. 4 Khannisian Nadaba le Abihua chu Rengpa kuang mei irthiang loi Sinai ramchâra khan an inhlan sikin, Rengpa makunga khan an thi tâka, nâi khom nei mahaia. Eleazara le Ithamara hin an pa Arona dam sûng hin ochai sin an itho a ni.

Levi irchihai ochai sintho hranga inkung an ni

5Khanchu Rengpa’n Mosia a chongpuia, 6“Levi irchihai kha ochai Arona kuang hruaihaiin lân, a sin an tho pe theina hrangin a kuang inomtirhai roh. 7Ama le mipuihai sin thoin, irtongna puan in Biakbuk puan ina khan Biakbuk sin chu tho an ti. 8Neinunhai kha enkol an ta, Israel irchihai ta hrangin Biakbuk sin chu tho an ti. 9Levihai sintum tak chu Arona le a nâipasalhai ta hranga sintho hi a ni. 10Arona le a nâipasalhai chu ochai sintho hrangin tihai ni ta, nam dang a hong irrolhai chu that ni an ti,” a tia.

11Rengpa’n Mosia a chongpuia, 12-13 “Atûn hin chu Levi irchihai chu ki ta an ni tâka, Aigupta mi nâilutîr murdi ki that lai khan; Israel insûngkua tina nâilutîr le sa a suak masa tak chu keima ta hrangin ki inhlan irthianghaia. Khasikin atûn Israel nâilutîrhai irthûlin Levi irchihai hi ki ta ni an ti; keima hi Rengpa chu ki ni,” a tia.

Levi irchihai tepna

14Rengpa’n Sinai ramchâra khan Mosia thu a pêka, 15“Levi irchihai chu an irchi suanpâr angin sûngkua tinhai chu pasal tha khat rengata a chung tianga kai chu tephai roi,” a ti pea. 16Khanchu Rengpa’n thu a ipêk lam takin Mosia’n a tephai ta. 17Levia nâipasalhai chu Gersona, Kohata le Meraria hai an ni, an irhming hi an irchihai khan an irput a ni. 18Gersona nâipasalhai chu Libnia le Simeia an ni. 19Kohata nâipasalhai chu Amrama, Izara, Hebrona le Uzela hai an ni. 20Meraria nâipasalhai chu Malia le Musia hai an ni. Hihai irhming hi an irchihai khan nam irhminga an irput a ni.

21Gersona chu Libni le Simei insûngkua irchihai an ni; hihai hi Gersona in sûng mihai chu an ni. 22Pasal, tha khat chung tianga tephai kai chu mi sângsari irzaringa an ni. 23Gersona irchihai khan Biakbuk kha nitâk tiang an inzar hrang a ni. 24Gersona panamhai hruaitu hrang chu Laela nâipa Eliasafa ni a ti. 25Gersona mihaiin an ienkol hrang chu Biakbuk le puan in le a chung irkhûna hai, irtongna biakbuk mikot puanzârhai, 26A kholâi le maichâm irkulna puanzârhai a kholâi kotbâia puanzârhai hi ni a ti. Annihai hi, hi sina hin mophurtu an ni.

27Amrama mihai, Izhara mihai, Hebrona mihai, Uziela mihai, hi Kohata panama mi an ni. 28Pasal, tha khat ata a chung tianga tepa om thei kai chu sângriat irzaruk an ni. 29Hi namhai hi Biakbuk sim tiang puan in inzâr an ti. 30Kohatha mihai hruaitu hrang chu Uziela nâipa Elizafana nih a ti. 31An ienkol hrang chu Thuthung Bôm doina, meiser intoina, maichâmhai le ochaihaiin hmun irthianga an ihmang bêl le bûrhai le puanzârhai, kha tianga sin kha an itho ual hrang a ni. 32Levi irchihai hruaitu ulian tak chu Arona nâipa Eleazara ni a ta, hmun irthiang enkoltuhai ir-ôihai a ti.

33Mali le Musi hi Meraria nama mi an ni. 34Pasal, tha khat ata a chung tianga itep theihai chu mi sângruk irzahni an ni. 35Hi namhai hin Biakbuk hmâr tiang puan inzar an ta, Abihaila nâipa Zuriela chu anni laia hruaitu tak ni a ti. 36Meraria nam enkol hranga inkunga om chu, Biakbuk thingphêkhai, tângkhanghai, chopuihai, a’rnghatna bul, khaang sin kha an itho ual hrang chu a ni. 37Khabana, chopuihai, a bulhai, hêmfunghai le a hruihai hi an ienkol sa hrang a ni. 38Mosia le Arona le a nâipasalhai chu Biakbuk maton tiang, nisua tianga puan in inzar an ti. Anni chu Israel mipuihai ta hrangin hmun irthianga sin thôna mophurtu ni an ta, mi danghai an irrolin chu that ni an ti. 39Rengpa’n Mosia thu a ipêk angin Levi irchia mi pasal tha khat ata a chung tianga mi tepa omhai chu sînghni le sânghni an ni.

Levi irchi le nâilutîr irtanna

40-41Rengpa’n Mosia kuang, “Israel nâilutîr pasal kai chu keima ta an nia. Khasikin tha khat rengata a chung tianga nâilutîr pasal kai chu tephai roi. Khannisian anni irthûla khan Levi irchihai hi keima ta hrangin ki innanghai an ni, kei hi Rengpa chu ki ni. Khabana Israel irchihai, sa an tê maton takhai irthûlin Levi irchihai sa chu ki izong sa a ni,” a tia. 42Khanchu Rengpa’n thu a ipêk ang lam takin Mosia’n Israel irchihai laia nâilutîrhai chu a tep tâka. 43Tha khat ata a chung tianga mi kai chu a rêngin sînghni le sânghni irzahni sômsari inthum an ni.

44Khan Rengpa’n Mosia kuang, 45“Atûn chu Levi irchihai le an sahai kha Israel nâilutîrhai irthûla le an sa inte maton takhai kha keima ta hrangin inhlan irthiangtirhai roi. 46Khanchu Levi irchihai nêkin Israel nâilutîrhai chu mi irzahni sômsari inthumin an tam sikin irtan ni an ti. 47A lu kipa, hmun irthianga Sekel tep dân angin sekel ringa leh irtanhai ni ti. 48Kha tangka kha Arona le a nâipasalhai kuang pe ni ti,” a tia. 49Mosia’n khaang khan a thoa, 50Sekel sângkhat irzathum sômruk ringa a chôia, 51Arona le a nâipasalhai chu a pêkhai tâka.