Search form

NAMBAR 30

Chonginkungna dân

1Mosia’n Israel irchihai laia hruaituhai a chongpuihaia, hi hi a ni, Rengpa thupêk chu, 2 pasalin Rengpa kuang thilpêk hranga chonginkungna neiin mani, aninole thil senkhat irser hranga chonginkungna neiin mani a lei oma nî’n chu, a chonginkung kha inchâi loiin a inkung ngêt hrang a ni. 3Khan nupang khom a pa ina a la om laiin Rengpa kuang thilpêk hranga chonginkungna neiin mani, aninole thil senkhat irser hranga chonginkungna neiin a lei oma ni’n chu, 4a chonginkung kha inchâi loiin a inkung ngêt hrang a ni. a pa khan kha chonginkungna an hriatpuia a nuampui photin chu. 5Khannisian a pa khan, kha chonginkungnahai an hriata, a nuampui noa ni’n chu, chonginkung ual nang no ni: Rengpa’n ama chu ngaidam a ti, a pa khan a nuampui no sikin.

6Khan dôngmate’n inhre chachakin mani, aninole a hnung a mân ngaitua loiin mani, thil senkhat rengata irser hrangin thu a lei inkunga, khannisian pasal a lâka ni’n chu, 7a chonginkung kha a izoi ngêt hrang, a pasalin an hriata, a khap noa ni’n chu. 8Khannisian a pasalin an hriata a khapa ni’n chu, a chonginkunghai kha an kung ual nang no nia, ama chu Rengpa’n ngaidam a ti.

9Meithâiin mani, aninole pasal imâk hnung nupangin mani, thil senkhat irser hranga chong an kunga ni’n chu, a chonginkung kha a isua ngêt hrang a ni. 10Khan nupang pasal nei tâkin thil senkhat irser hranga chong an kunga ni’n chu, 11a chonginkunghai chu a isua ving hrang a nia, a pasalin an hriata, a khap no phota ni’n chu. 12Khannisian a pasalin an hriata a khapa niin chu, a chonginkung kha sua ual nang no ni. Ama chu Rengpa’n ngaidam a ti. A pasalin a khap tâk sikin. 13A pasalin a chong len kungna kha inkungtirna le hnôl theina ircham a nei sikin. 14Khannisian a chonginkungna kha an hriatpuia, ite nuampuiloina a nei no’n chu, a chonginkunghai kha a isua ngêt hrang a ni. An hriatpuia a khap loina khan a chonginkung kha an detpui tihna a ni sikin. 15Khannisian an hriat zel noa, inhnunga a khap nôka ni’n chu, a pualoina mô chu a lu chunga irnghat a ti, tiin.

16Hihai hi pasal le nupang kâra le pa le nâi dôngmate, a pa ina a la om laia an kâra dân hranga Rengpa’n Mosia a ipêk chu a ni.