Search form

NAMBAR 6

Nazarit-hai ta hranga dân

1Khanchu Rengpa’n Mosia a chongpuia, 2Israel irchihai kuang, hiang hin hril ro, an kuang, pasalin mani, nupangin mani, Nazarit ni hranga a bîk taka chonginkungna neiin Rengpa kuang a’rpêka ni’n chu, 3 uain le zû nghei a ta, grep ra ata siam, zû ite a iin hrang ni mah. 4Nazarit mi a’rti sûng kârka chu grep rânga thilhai kha a ifâk hrang ni ma, grep ru le a kôr khom a ifâk thei hrang ni mah.

5Nazarit chonginkungna hnuaia a om sûng chu, a sam mani, a hnerkamul mani khom epin a irvo hrang ni mah. Chonginkungna sika Rengpa ta hranga irpêkhlet a ni sikin, a sam le a hnerkamul a ihôi hrang a ni. 6-7A sam kha Pathian ta hranga a’rpêk ti entîrna ni a ta, khasikin a pa thina hmuna fein a iporinche hrang ni mah. 8Nazarit mi ki nih a’rti kârka chu, Rengpa ta hranga irthiang a ni. 9A kôla irningloia a thi an om thutin chu, a sam kha porche a ni sikin, sûn sari nghâk a ta, khanchu a sam le a hnerkamul kha voipai a ta; khanchu a hong irthiang nôk hrang a ni. 10Khanchu sûn riat a hong ni tena chu, vasute inhni mani, phervali inhni mani chôi a ta, irtongna Biakbuk kotbâia khan ochai kuang hong chôi a ti. 11Ochai khan mithi sika ama thâr irthiangna hrangin inkhat kha sual irbôlna’n inhlan a ta, inkhat dang kha pum hâlirvôm thilinhlana khan inhlan a ti; kha ni khan chu a sam kha a irthiangtir nôk nih a ti. 12 Matona a lei inhlan kha, a sam a porinche tâk sikin pom ni ta no ni. A thar vangin Rengpa kuang Nazarit mi ni theina hrangin a inhlan nôk hrang a ni. Tho’nsualna irbôl hrangin kêlbelrate kum khata mi thilinhlana hrangin chôi sa a ti.

13Hi hi, Nazarit mi, ki ni a’rtihna bîk nikhua a’rkip tena tho hrang dân chu ni a ta; irtongna Biakbuk kotbâia khan hruai ni a ti. 14Rengpa kuang demnaboi sa inthum inhlan a ta; kêlbelra tuaite kum khata mi pum hâlirvôm thilinhlan hrangin, kêlbelra irlate kum khata mi sual irbôlna hrangin le belrachal kha irngeina hrangin. 15Khabana bai chol pol loi khamphulu khat; baidi le oliv hriak leh siam baitiam le oliv hriak pol baitiam irphân ni a ta, khanchu buhûm le uain thilinhlana inhlan sa a ti. 16Ochai khan kha thilinhlanhai kha sual irbôlna le pum hâlirvôm thilinhlanin Rengpa kuang inhlan a ti. 17Kêlbelrachal le khamphulua bai kha irngeina thilinhlanna hrangin Rengpa kuang inhlan a ta; buhûm le uain khom kha inhlan sa a ti. 18Nazarit mi khan irtongna Biakbuk kotbâia khan a sam ep infâi ving a ta, irngeina thilinhlan hâlna meia khan hâlpai a ti. 19Khanchu ochaiin kêlbelrachal hmê a dârsuama suang inhmin sai le khamphulua baitiam khat le chol pol loi baitiam irphân inkhat kha la sa a ta, Nazarit mi kuta khan pe a ti. 20Khanchu ochaiin ngaihoi thilinhlanna hrangin Rengpa makunga khan chôi a ta, khahai kha ochai dongtum thil irthianghai chu a ni, kêlbelrachal a rôp le a ke ochai dongtum ti bana chu. Khanchu Nazarit mi khan Uain kha in thei ta a ti. 21Hihai hi a ni, Nazarit chonginkung dânhai chu, khannisian Nazarit mi’n a chonginkungna a innang khêla, thil dang inhlan sa a nuamin chu, a chonginkunghai kha irkiptir ngêt a ti.

Ochai satvurna chongchai

22Rengpa’n Mosia a chongpuia, 23Arona le a nâipasalhai kuang, hi thu hmang hin Israel irchihai chu sat ni ivur hrang a ni:

24Rengpa’n sat nangni vurin,

nangni donsui mai ri se;

25Rengpa’n nin chunga a hmêl invâr pe sianlân,

nangni inren mai ri se.

26Rengpa chu nangni tiang zuang irhei sianlân,

lungirngamna nangni pe ri se,

tiin hril roh.

27Khanchu Rengpa’n, “Israel irchihai chunga khan ki’rhming hi satvurna’n an inpuangin chu, kei khomin satvurhai ki ti,” a tia.