Search form

NAMBAR 8

Meiser sia dân hrang

1Rengpa’n Mosia a chongpuia, 2“Arona inhrilin lân, a kuang, meiser sarihai kha a siana hmuna an sia tika, kha meiser khan a maton tiang a i-êl hrang a nih ti ro,” tiin. 3Arona’n khaang khan a thoa; Rengpa’n Mosia thu a ipêk ang khan, meiser siana maton tiang khan meiserhai kha a choka. 4Hi meiser siana hi Rengpa’n Mosia kuang a inentir lam taka siam a ni, a bul ata a rêl dênin rângachak kuta suk leh siam a ni.

Levi irchihai thâr irthiangna

5Rengpa’n Mosia a chongpuia, 6“Levi mihai kha Israel irchihai lai ata kha a bingin sehaiin lân, thâr irthianghai roh. 7Anni kha hiang hin thârhai ro; irthârna tui inthekkhumhaiin lân, an pumpuia irvo infâi hrangin le an puanhai sôp infâi hrangin hrilhai roh. Khanchu Pathian dân angin irthiang an ti. 8Khanchu sehrâtchal tuai inkhat le buhûm thilinhlan hriaka pol baidi indi tak leh inlatirhai ni ta; khabana sehrâtchal inkhat sual irbôlna hrangin ni ilâk sa hrang a ni. 9Khanchu Israel irchihai kha bukhai ni ta. Levi irchihai chu irtongna Biakbuk mân tiang khan hruaihai roh. 10Khanchu Israelhai khan Levi irchihai chunga an kut irnghat an ta, 11khanchu Israelhai khan Levi mihai kha Rengpa sin an tho theina hrangin Israel irchihai irhmingin ngaihoi thilinhlana Rengpa kuang inhlan an ti. 12Khanchu Levi irchihaiin sehrâtchalhai lua khan an kut irnghat an ta; Levi irchihai ta hrangin chu irngeina an siam theina hrangin, inkhat chu sual irbôlna hrangin, inkhat dang chu pum hâlirvôm thilinhlanna hrangin Rengpa kuang inhlan ni a ti.

13“Levi irchihai kha Arona le a nâipasalhai makunga inomtirhai ni ta; Rengpa ta hranga ngaihoi thilinhlan kha inhlanhai roh. 14Khaang khan Israel irchihai lai ata kha Levi irchihai kha zêkhaiin lân, khanchu Levi irchihai kha keima ta ni an ti. 15Kha hnung chu Levi irchihai kha irtongna Biakbuka khan Pathian sintho hrangin lût an ta, nangin anni kha thâr irthianghai ni ta, ngaihoi thilinhlan angin ni inhlanhai hrang a ni. 16Israel irchi nâilutîrhai irthûla keima dongtum an ni sikin. 17 Mihriam khom ni sian, sa khom ni sian, Israel irchihai laia nâilutîrhai chu ki ta an nia, Aigupta rama nâilutîr ki that lai khan anni hi chu keima dongtum hrang piala ki isiahai tâk kêng. 18Khasikin Israel irchia nâilutîr murdihai irthûlin Levi irchihai chu ki ilâk tâk a ni. 19Khasikin Israel irchihai irthûlin anni chu irtongna Biakbuka sintho hrang le Israel irchihaiin hmun irthianga an hong nâi khoma, anni laia hri a lêng loina hrangin hrungin Israel irchihai rengata Levi mihai hi Arona le a nâipasalhai ki ipêk a ni,” tiin.

20Khanchu Rengpa’n Mosia thu a ipêk angin Mosia, Arona le Israel murdihai khan Levi mihai chu a inhlan irthiangtirhai a ni ta. 21Khanchu Levi irchihai chu an irthâr irthianga, an puanhai an sôpa; khan Arona’n Rengpa makunga ngaihoi thilinhlana khom an hlana, khabana a thâr irthianghai tâka. 22Levi mihai chungchânga Rengpa’n Mosia thu a ipêkhai lam ang takin mipuihaiin an thoa, khanchu Arona le a nâipasalhai enkolna hnuaia Levi mihai chu irtongna Biakbuka sintho hrangin an om tâka.

23Rengpa’n Mosia a chongpuia, 24“Levi irchihai chu kum sômhni ringa mi an ni rengata irtongna Biakbuka sin tho an ta, 25khannisian kum sômringa tena mihaiin chu an sin thôna rengata kha irngam an ti. 26Khannisian irtongna Biakbuk sina khan an irchihai kha sanhai thiai an ta, khannisian an bingin chu irbôlna sin chu tho ta no nihai,” a tia.