Search form

SAN JUAN 21

A Jesús in tejhua’methal tim ba’ c’al buc in exobalilchic

1Taley talbel junilaquits a Jesús in tejhua’metha’ tim ba’ c’al tsab ox huahua’ tu exobalil tam tu c’uajat tin hualte’lil am pulic lejem Tiberias. In tejhua’metha’ tim ba’ antse’. 2U c’uajat muthatchic a Simón Pedro, a Tomás axi uxnal ti cuaya’cua’, a Natanael axi ti Caná cuentalith Galilea, nana’ in Juan ani u ebchal, ani tsabaye i at exobal jaye. 3A Simón Pedro tu ucha’chic:

―Ne’ets tin calthom to’ol.

Ani huahua’ i ulu:

―U ne’etshue c’al tata’.

U c’alechic ani u otsits al an tan. Ta u ne’ets ani patal an acal ma ni jun i to’ol yab i caltha’. 4Exomits ti tajc’anal, ani c’uajatits a Jesús tin hualte’lil am pulic lejem. Yab i exla’ max ja’its a Jesús. 5Tam tu ucha’chic:

―¿Cuitolchic, yabaye a calthamal an to’ol?

I toc’tsiy:

―Iba.

6Tam a Jesús tu ucha’chic:

―Ca pet’na’ an thachumtalab tin huinab an tan, ani tats ne’ets ca elcanchi.

I pet’na’chic jant’ini’ tu uchan, ani taley talbel yab i ejtouchic qui caltha’ an thachumtalab c’al xi yantalam to’ol balnenec. 7Tam nana’ tin lej ichich hual exobalil a Jesús u ucha’ a Pedro:

―Ja’its an Ajatic.

Expith in ats’a’ Simón Pedro abal ja’its an Ajatic, ani thubat in ca’iy in coton. Im pet’na’ tim ba’ al an ja’, ani ta c’ale quin tsu’u a Jesús. 8An tan c’uajat jelat bo’ inic i metro abal ca ts’at’ey tin hualte’lil am pulic lejem. Ani huahua’ ax u jilc’on al an tan i bothcom an thachumtalab t’uchat c’al i to’ol. Taley u ulitsitschic tin hualte’lil am pulic lejem. 9Tam tu calejits al an tan i tsu’uchic hua’ats i c’alul c’amal ba’ an tsabal. Pelc’ath jun i huiynel to’ol eblim al an c’amal. I tsu’u hua’ats jaye i pan. 10A Jesús tu ucha’chic:

―Ca chi’tha’chic tsab ox i to’ol ax a calthamal talel.

11Tam otsits a Simón Pedro al an tan quin chi’tha’ quininil an thachumtalab t’uchat c’al hualim i pactha’ to’ol ma tin hualte’lil am pulic lejem. Hua’ats lajuj bo’ i lajujchic c’al ox i pactha’ to’ol. Aba ani’ lej c’athpich yan an to’ol, yab t’apts’in an thachumtalab. 12Tam a Jesús tu ucha’chic:

―Quit chich cu c’aputs.

Cum i lej tsalpay abal ja’its an Ajatic, ni junchic yab i conoy a Jesús max chubax ja’its. 13Utey ani im pena’ am pan ani an huiyath to’ol, ani tu pitha’ cu c’apu.

14C’al axe’ jats in oxchil ti tejhua’mel a Jesús c’al huahua’ tu exobalilchic ma ti ejthamejits ti al an jolimtalab.

T’ilom a Jesús c’al a Simón Pedro

15Tam tu c’aputschic, conoyat a Simón Pedro c’al a Jesús:

―¿Simón ti tsacamil a Jonás, it lej c’athpich c’anithom c’al nana’ ani yab ejtil axi q’ue’at u exobalilchic?

Toc’tsin a Pedro:

―Ojni’ Ajatic, a tso’obits abal nan tu c’anithal.

Uchan c’al a Jesús:

―Tam ca pijchi c’al in cahuintal a Dios axi pel u c’al ani pel ejtil i corderochic.

16Conoyat junil a Pedro c’al a Jesús:

―¿Simón ti tsacamil a Jonás, it lej c’anithom c’al nana’?

Toc’tsin a Pedro:

―Ojni’ Ajatic, a tso’obits abal nan tu c’anithal.

Uchan c’al a Jesús:

―Tam ca alhua’ beletna’ axi pel u c’al ani pel ejtil i ovejachic.

17Tin oxchil i calat conoyat a Pedro:

―¿Simón ti tsacamil a Jonás, it c’anithom c’al nana’?

Cum antsana’ ti conoyat a Pedro tin oxchil i calat max c’anithom c’al a Jesús, tam lej t’e’pith. In ucha’:

―Ajatic, tata’ tin lej tala’ exlanchalits u ichich abal nan tu c’anithal.

Uchan c’al a Jesús:

―Tam ca pijchi c’al in cahuintal a Dios axi pel u c’al ani pel ejtil i ovejachic. 18Lej chubax nan tu uchal abal tam pelac it cuitole it toltomin ta ba’ ani it xe’tsinenec ju’tamits a le’namal. Tam quit yejtselbejits, ne’ets ca q’uet’a’ a ocob ani q’ue’at ne’ets ti toltomiy. Ne’ets tam quit ne’tha jun ti yab ca le’na’.

19C’al axe’ xi cau a Jesús in olna’ jant’ini’ ti ne’ets ca tsemets a Pedro. Antsana’ ne’ets ca puhuethanchat im bij a Dios. Taley a Jesús in ucha’ a Pedro:

―Xo’ tiquin ayna’.

An exobal axi lej ichich hual tsu’tab c’al a Jesús

20Tam ti huenc’on a Pedro in tsu’u ts’at’at an exobal axi lej ichich hual tsu’tab c’al a Jesús. Jats xe’ c’al ti conoyame ti jayq’ui’ a Jesús abal jita’ c’al ti ne’ets ca tsinat bina tin c’ubac in tomolnaxilchic. Antsana’ ti conoyat Jesús c’al jaja’ tam ti c’uajatac tin ts’oylim ti c’apul. 21Tam tin tsu’uhuits a Pedro ts’at’at antsana’ nixe’ xi exobal, tam in conoy a Pedro a Jesús:

―¿Ani Ajatic, axe’ xa exobalil jant’o ne’ets ca t’ajchin hualam?

22Toc’tsin a Jesús:

―Yab a cuenta max nan cu le’na’ ca xe’tsin ejat jaja’ ma quin huichiy. Tata’ expith a cuenta tiquin ts’at’enchi.

23Tam c’al an ebchalabchic lej athithil t’iloxnab nixe’ xi cau, cum tsalpayab abal a Jesús in ulu yab ne’ets ca tsemets nixe’ xi jun i exobal. Ani yab antsana’ in ulu, tocat in ulu abal yab pel in cuenta a Pedro max a Jesús quin le’na’ abal ca xe’tsin ejat nixe’ xi exobal ma ta ca huichiy jaja’.

24Nana’its ja nixe’ xi exobal. U tsu’umal ani u olnal al axe’ xi u abal lej chubax jahua’ in t’ajamal ani jahua’ in ulumal a Jesús teje’ tsabal. A tso’obits abal lej chubax jahua’ u olnal.

25Max ca tala’ olna in t’ajbilchic a Jesús ti junchic ti junchic ani ca thuchan al i u, hualam yab ne’ets ca lejey xi c’athpich yantalam i thuchath u ma tim puhuel an tsabal. Amén.

An it jilchith cau cʼal i Ajatic Jesucristo

© 1971, Wycliffe Bible Translators, Inc. More Info | Version Index