Search form

APOCALIPSIS 11

Tsab i olnom

1Taley im pithan jun i te’ cu t’ipoxna’. In uchan:

―Quit cubiy ca t’ipoy in tiyopanil a Dios ani an ts’acnaxtalab jun tu binab i ts’acchixtalab a Dios. Ani jaye ca ajiy jay i inicchic taja’chic ax in c’ac’nal a Dios. 2Am patio axi eleb al an tiyopan yab ca t’ipoy, cum a Dios in tsalpayamalits ne’ets quin jila’ axi yab exlomchic c’al jaja’ ca xe’tsin taja’. Ne’ets ca xe’etsinchic tsab inic c’al tsab a its’ ti othnax taja’ al nixe’ xi t’ocat tsabal. 3Biyat jaja’chic antsana’ ca xe’tsin lajuj tsab i bo’chic inic c’al ox inic q’uicha, nan in Dios ne’ets cu abchi tsab i olnom abal quin olna’ jahua’ ne’ets cu t’ajaye ti eb ani ti tsabal. Xi tsab i olnom ne’ets ca xe’tsin t’unu’ toltomith.

4Xi tsab i olnom pel xe’ xi tsab i te’ olivo ani xi tsab i cublab candela axi c’uajat tin tamet an Ajatic. An Ajatic ja’its an thabal c’al patal an tsabal. 5Axi tsablom ne’ets quin ejtou quin t’aja’ abal ca cale ejtil i c’amal tin hui’, ani c’al nixe’ xi c’amal quin t’ajat tsemtha’ jitats quin le’na’ ti tomolnax ani ti othnax c’al xi tsablom. 6Biyat ca xe’tsin ti olnom tin cuenta in cahuintal a Dios, ne’ets quin ejtou quin t’aja’ abal yab ca ulits an ab. Jaye ne’ets quin huenc’ou ti xits’ an ja’, ani quin abchi jahuaquits tam c’ac’ath yajchictalab teje’ tsabal. Jayits i calel quin le’na’ quin abchi, antsana’ ne’ets quin t’aja’. 7Tam ta ca talits ti olnom c’al an cau, tamna’ ne’ets ca utey jun ejtil i pulic tse’ acan axi calel al nixe’ xi luputh jol xan tin c’uajattal an teneclabchic ca pejéxin c’al nixe’ xi tsab i olnom. Ne’ets ca tsemtha xi tsablom c’al an tse’ acan. 8Ne’ets ca jilan mo’ol in inictal ti bel al am pulic bichou jun ti tsemtha i Ajatic ti al an cruz. Pel i bichou ejtil am bichou Sodoma ani ejtil a Egipto cum lej pojcax an inicchic taja’. 9Ox a q’uicha c’al ts’ejel ne’ets ca tsu’chin in inictal mo’ol, ani yab ne’ets ca jilan jita’ c’al ta ca joliyat. Tocat ne’ets ca met’an c’al i inicchic axi tal ma i bichouchic ani ma i pactha’ bichoulomchic. Ne’ets ca mulcun axi pil in at juntal xits’al ani axi pil i cahuintalab. 10Ne’ets ca lej culbechic cum tsemthachits nixe’ xi olnom c’al in cahuintal a Dios ani yabats ne’ets quin ejtou quin abchi i c’ac’ath yajchictalab teje’ tsabal. Ne’ets ca pitháxin c’al i pithoblab cum junax culbel abal tsemthachits an olnom axi yab le’na. 11Ca putunits ox a q’uicha c’al ts’ejel, tamna’ a Dios ne’ets quin tsab ejatliy ani ne’ets quin ts’acba’ nixe’ xi tsab i olnom. Tam ojni’ ne’ets ca huat’ath jiq’uey an inicchic. 12Xi tsab i olnom ne’ets quin ats’a’ i cau tal ma ti eb antse’ quin ulu:

―Quit c’athiy teje’ ti eb.

Ne’ets ca tsu’tat c’athithil ti eb al i tocou c’al axi ti othnamechic. 13Tamna’ ne’ets ca lej t’elelats tsabal, ma ca t’ajat paclun tin lajujchil tin yanel an atachic al nixe’ xi bichou. Ne’ets ca t’ajat tsemets buc i mil i inicchic cum t’elelel an tsabal. Ani axi ca xe’tsinchic ejate ne’ets ca lej jic’tson c’al a Dios ani quim puhuethanchi im bij.

14Talits an tsabchilab c’ac’ath yajchictalab, ani thubat a Dios ne’ets quin abchi xi oxchilab.

Ne’ets ca juchuyat am bucchilab trompeta

15Am bucchilab ángel in juchuy an trompeta ax in chal jaye, ani tam ats’at lej cahuith ti eb:

Xohue’ ojni’ im bajuhuits abal a Dios ani a Cristo abath c’al a Dios quin t’aja’ ti lej Ts’ale tim puhuel an tsabal jun ti an inicchic pelac i ts’ale ani xo’ itsots.

Ani antsana’ ne’ets quin t’aja’ abal ets’ey.

16Tam nixe’ xi jun inic c’al tse’ i yejtselchic axi c’uajatchic utat tin ts’alat coytal a Dios, nuc’panal tin tamet a Dios in c’ac’nalchic. 17In uluchic:

Pulic Pay’lom Dios ti eb tata’ a ejtohual ca t’aja’ patal jahuats ca le’na’. Ma ti jayq’ui’ it ejat, ani ma xohue’, ani ma abal ets’ey it ejat.

I binal i c’ac’namal yan cum a tejhua’methamal abal a cua’al a lej tsap ca t’aja’ patal jahuats ca le’na’.

Xohue’ ne’ets ca t’aja’ tit lej Abatnom c’al patal an inicchic.

18Aba ani’ ne’ets ca lej tsacuy an inicchic tsabal, bel ne’ets quim baju an q’uicha tam tata’ a Dios ne’ets ca abchichic i yajchictalab jahua’ a pejchith bijchamalits.

Ne’ets ca ts’ejca’chic axi tsemenequits.

Ne’ets ca pitha’ i atabilab a t’ojnalilchic axi xe’ets ti olnom c’al a cahuintal.

Jaye ne’ets ca pitha’chic axi utat c’uajil c’al tata’ ani c’ac’nax c’al a bij.

Ne’ets ca pitha’ axi yab lej exbath in ey ani jaye axi lej exbath.

Im bajumalits an hora abal tata’ ca q’uibetha’ jita’ xe’ets ti q’uibethom c’al jahua’ hua’ats teje’ tsabal.

19Tam u tsu’u japiyab an tiyopan ti eb, ani alta u tsu’u im bal jun tu co’oyab an juncuth ts’ejcath cau ax a Dios im pithamal in tsacamilchic. U tsu’u leyts’om an ley ani u ats’a’ lej tumumul an mamlab. T’elelel an tsabal lej tsapic ani ijojol tsabal i t’ujub ab.

An it jilchith cau cʼal i Ajatic Jesucristo

© 1971, Wycliffe Bible Translators, Inc. More Info | Version Index