Search form

Pemansut 12

Gawai Paska

1 TUHAN lalu bejaku ngagai Moses seduai Aron di menua Ejip: 2“Bulan tu nyadi bulan ti kesatu ke kita. 3Padahka ngagai semua orang Israel, iya nya, kena sepuluh hari bulan tu, genap iku orang Israel enda tau enda milih siku anak domba tauka anak kambin ke sida sebilik. 4Enti sida sebilik nadai mayuh tubuh lalu enda ulih ngabiska siku jelu, iya enggau orang ke berimbai rumah enggau iya, tau bekunsika jelu nya, nitihka pemayuh tubuh, enggau nitihka penyampau ti ulih diempa sida siku-siku. 5Sida tau milih jelu bedus tauka jelu kambin. Tang jelu nya enda tau enda lelaki, umur setaun, lalu nadai penimpang. 6Sida patut nyimpan jelu nya nyentuk ngagai empat belas hari bulan tu, lebuh semua orang Israel deka nyayat anak bedus sida lebuh lemai hari nya. 7Sida enda tau enda ngambi sekeda darah jelu nya, lalu malitka darah nya ngagai tiang pintu enggau ngagai puchuk pintu rumah alai jelu nya deka diempa. 8Malam nya, dagin nya enda tau enda dipanggang, lalu diempa sama enggau sayur ti pait, sereta enggau roti ti enda beragi. 9Anang makai jelu nya mata, tauka dipanduk, tang dipanggang segala, lalu diempa, nyengkaum pala, kaki, enggau perengka dalam. 10Kita enda tau ninggalka utai nya beteda enda diempa nyentuk ngagai pagi. Enti utai nya bisi beteda, teda nya enda tau enda ditunu. 11Lebuh kita makai utai nya, kita enda tau enda udah begari dulu, sedia deka bejalai jauh. Selipar kita enda tau enda udah dirasukka ba kaki kita, lalu tungkat kita enda tau enda dipegai kita lebuh kita makai. Tu meh Gawai Paska kena kita ngemesaika Aku ti TUHAN. 12Laban Malam nya Aku deka bejalai nengah menua Ejip, lalu munuh semua anak tuai ti lelaki, nyengkaum anak tuai mensia enggau jelu, lalu ngukum semua petara menua Ejip. Aku tu TUHAN. 13Darah ti ba tiang pintu nya deka nyadika kelai kena nandaka rumah alai kita diau. Lebuh Aku meda darah nya, Aku deka ngelaungka kita, lalu enda ngemediska kita, lebuh Aku ngukum orang Ejip.

14 “Kita enda tau enda ngintu hari tu nyadika hari gawai, kena kita ngingatka utai ti dikereja Aku ti TUHAN. Intu hari tu nyadika hari gawai belama iya.

Gawai Roti Ti Enda Beragi

15“Dalam kandang tujuh hari kita semina tau makai roti ti enda beragi. Ba hari ti keterubah, kita enda tau enda muai semua ragi ari rumah kita, laban enti orang bisi ditemu makai roti ti digaga ngena ragi dalam kandang tujuh hari nya, iya deka badu agi dikumbai nembiak Aku. 16Ba hari ti keterubah, enggau ba hari ti ketujuh, kita enda tau enda besembiang bebala mayuh. Kita enda tau gawa ba hari nya, tang semina tau nyendiaka pemakai ke diri empu. 17Intu gawai roti ti enda beragi, laban ba hari tu Aku mai raban bansa kita pansut ari menua Ejip. Nya alai kita enda tau enda ngintu hari tu nyadika hari gawai belama iya. 18Belabuh ari lemai hari ti keempat belas, dalam bulan ti kesatu, ngagai lemai hari ti kedua puluh satu, kita enda tau makai roti ti beragi. 19-20Dalam kandang tujuh hari nya, nadai ragi tau disimpan dalam rumah kita, laban enti orang, nemuka iya nya bansa orang Israel tauka orang bansa bukai, makai roti ti beragi, iya deka badu agi dikumbai nembiak Aku.”

Gawai Paska Ti Keterubah

21Moses lalu mesanka semua bala tuai orang Israel, lalu bejaku enggau sida, “Pilih anak bedus ke kita sebilik, lalu sayat anak bedus nya kena kita ngintu Gawai Paska. 22Ambi segempung pating isop. Sepuhka pating isop nya ngagai darah ti dalam mangkuk, lalu palitka darah nya ba tiang pintu, enggau ba alang puchuk pintu kita. Nadai orang tau pansut ari rumah nya nyentuk ngagai pagi. 23 Laban TUHAN deka mansa lalu munuh orang Ejip; lalu lebuh Iya meda darah ba alang pintu enggau ba dua iti tiang pintu, Iya deka ngelaungka mua pintu nya, lalu enda nyagi Melikat Pemati tama ngagai rumah kita, enggai ke iya munuh kita. 24Kita enggau bala anak kita enda tau enda nitihka atur tu belama iya. 25Lalu lebuh kita datai di menua ti udah disemaya deka diberi TUHAN ngagai kita, kita enda tau enda nitihka atur tu. 26Lalu lebuh bala anak kita nanya ngagai kita, ‘Nama reti atur tu?’ 27kita enda tau enda nyaut, ‘Tu piring Gawai Paska TUHAN, laban Iya ngelaungka rumah orang Israel di menua Ejip, lebuh Iya munuh orang Ejip, tang enda munuh kitai.’ ”

Orang Israel meremika pala lalu nyembah Allah Taala.

28Udah nya sida mupuk, lalu ngereja utai ti udah dipesanka TUHAN ngagai Moses seduai Aron.

Pemati Anak Tuai

29 Ba urung tengah malam, TUHAN munuh semua anak tuai ti lelaki di menua Ejip, belabuh ari anak lelaki raja, ke diadang nganti iya nyadi raja, nyentuk ngagai anak lelaki orang tutup ke disimpan dalam bilik jil ti dalam tanah, enggau semua anak tuai jelu tupi. 30Malam nya, raja, bala pemesai, enggau semua orang Ejip ti bukai angkat magang. Balat amat munyi orang nyabak di serata menua Ejip, laban nadai ruang bilik ti nadai orang mati. 31Malam nya mega raja lalu mesanka Moses seduai Aron, ku iya, “Angkat kita ari tu, seduai enggau orang Israel! Angkat kita ari menua aku. Mupuk kita, lalu sembah TUHAN, munyi ti ku kita. 32Bai jelu bedus, kambin, enggau jelu sapi kita, lalu angkat ari tu. Besampi mega minta berekatka aku.”

33Orang Ejip lalu ngansak orang Israel angkat enggau jampat ari menua nya; laban ku sida, “Enggai ke semua kami abis mati.” 34Nya alai orang Israel lalu mai tekang tepung ti udah ditunyau enda beragi, mungkus kali ti dikena sida ngaga roti, lalu ngesan utai nya. 35 Orang Israel udah ngereja utai ti diasuh Moses, lalu udah minta perengka emas enggau perengka pirak, enggau gari, ari orang Ejip; 36lalu TUHAN udah ngasuh orang Ejip rinduka orang Israel, lalu meri sida utai ti dipinta sida. Nya meh chara orang Israel nabanka pengaya orang Ejip.

Orang Israel Angkat Ari Menua Ejip

37Orang Israel lalu mupuk bejalai ari Rameses ngagai Sukot. Pemayuh sida kira enam ratus ribu iku lelaki, enda ngitung indu nembiak. 38Orang bansa bukai mega bejalai enggau sida, raban bedus, kambin enggau sapi bejalai enggau sida. 39Lalu sida ngaga roti ti enda beragi ari tekang tepung ti ditunyau enda beragi, ti dibai sida ari menua Ejip, laban sida udah diburu angkat ngenyit ari menua nya, datai ke sida nadai peluang nyendiaka bekal, tauka ngaga roti ti beragi.

40 Orang Israel udah diau di menua Ejip empat ratus tiga puluh taun. 41Lalu ba ujung empat ratus tiga puluh taun nya, ba hari nya, semua nembiak TUHAN angkat magang ari menua Ejip. 42Hari endang udah malam lebuh TUHAN ngemataka sida lalu mai sida pansut ari menua Ejip. Nya alai malam nya diserahka ngagai TUHAN belama lama iya nyadika malam alai orang Israel enda tau tinduk, tang bejaga.

Adat Gawai Paska

43Ku TUHAN bejaku ngagai Moses seduai Aron, “Tu adat ke Gawai Paska: Orang bansa bukai enda tau makai pemakai Gawai Paska. 44Tang ulun ti udah dibeli kita, tau makai pemakai nya, enti iya udah ditutus. 45Temuai ti diau enda lama enggau kita, tauka orang gaji kita, enda tau makai pemakai nya. 46 Semua pemakai nya enda tau enda abis diempa dalam rumah alai pemakai nya udah disediaka. Pemakai nya enda tau dibai pansut ari rumah nya. Lalu anang matahka tulang jelu nya. 47Semua orang Israel enda tau enda ngintu gawai nya. 48Enti temuai deka diau enggau kita, deka enggau kita ngintu Gawai Paska TUHAN, iya enda tau enda ditutus dulu. Udah nya baru iya tau datai enggau ngintu Gawai nya. Iya enda tau enda digaga sebaka enggau orang Israel. Nadai orang ke enda ditutus tau makai pemakai nya. 49Adat tu deka dititihka semua orang ke asal bansa orang Israel, enggau orang bansa bukai ke ngentapka diri diau begulai enggau kita.”

50Semua orang Israel ngasi magang, lalu ngereja utai ti udah dipesanka TUHAN ngagai Moses seduai Aron. 51Lalu ba hari nya TUHAN mai semua orang Israel pansut ari menua Ejip.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index