Search form

Pemansut 13

Nyerahka Anak Tuai Ngagai TUHAN

1Ku TUHAN bejaku ngagai Moses, 2 “Serahka ngagai Aku semua anak tuai kita; genap iku anak tuai orang Israel ti lelaki, nyengkaum anak tuai jelu kita, endang enggi Aku magang.”

Gawai Roti Ti Enda Beragi

3Lalu ku Moses bejaku ngagai orang Israel, “Kingatka hari tu, hari kita pansut ari menua Ejip, alai kita ke udah nyadi ulun, laban TUHAN, ngena pemesai pengering Iya, udah mai kita pansut ari endur tu. Kita enda tau makai roti ti beragi. 4Sehari tu, dalam bulan ti kesatu, iya nya bulan Abip, kita pansut ari menua Ejip. 5TUHAN udah besemaya ngena sumpah ngagai sida aki ini kita, madahka Diri deka meri kita menua orang Kanaan, orang Iti, orang Amor, orang Ibi, enggau orang Jebus. Lebuh Iya mai kita ngagai menua ti kaya sereta ami nya, kita enda tau enda ngintu gawai tu dalam bulan ti kesatu genap taun. 6Dalam kandang tujuh hari kita makai roti ti enda beragi, lalu ba hari ti ketujuh, kita enda tau enda ngintu gawai kena ngemesaika TUHAN. 7Dalam kandang tujuh hari kita enda tau makai roti ti beragi. Kita enda tau naruh ragi dalam kandang menua kita. 8Lebuh gawai nya belabuh, terangka ngagai anak lelaki kita kebuah kita ke begawai. Kita begawai ketegal utai ti udah dikereja TUHAN ti kita, lebuh kita pansut ari menua Ejip. 9Gawai tu deka nyadika pengingat, baka utai ti ditanchangka ba jari, tauka ba kening kita. Gawai tu deka ngasuh kita seruran ngingat sereta belajarka Adat TUHAN, laban TUHAN udah ngena kuasa Iya ti besai mai kita pansut ari menua Ejip. 10Intu gawai tu genap taun ba maya ti udah diletak.

Anak Tuai

11“TUHAN deka mai kita ngagai menua orang Kanaan, ti udah disemaya Iya ngena sumpah ngagai aki ini kita. Lebuh Iya meri menua nya ngagai kita, 12 kita enda tau enda nyerahka anak tuai kita ke lelaki ngagai TUHAN. Genap iku anak tuai jelu kita endang enggi TUHAN, 13tang kita enda tau enda meli ari TUHAN genap iku anak tuai keledai kita ke lelaki, ngena siku anak domba, kena kita nyilih anak keledai nya. Enti kita enggai meli keledai nya pulai baru, patahka rekung iya. Kita enda tau enda meli pulai baru genap iku anak tuai kita ke lelaki. 14Jemah ila, lebuh anak kita nanyaka reti gawai nya, kita deka nyaut iya munyi tu: ‘TUHAN udah ngena kuasa Iya ti besai, mai kitai pansut ari menua Ejip, alai kitai ti udah nyadi ulun. 15Lebuh raja menua Ejip kieh ati, lalu enggai ngelepaska kitai, TUHAN munuh semua anak tuai ti lelaki di menua Ejip, nyengkaum anak mensia enggau anak jelu. Nya kebuah kitai nyerahka genap iku anak tuai jelu ti lelaki nyadika piring ti diberi ngagai TUHAN, tang meli pulai baru anak tuai kitai empu ti lelaki. 16Gawai tu nyadika pengingat kitai, baka reti utai ti ditanchangka kitai ba jari, tauka ba kening kitai. Gawai tu kena kitai ngingatka TUHAN ti udah ngena kuasa Iya ti besai mai kitai pansut ari menua Ejip.’ ”

Tiang Mua Hari Enggau Tiang Api

17Lebuh raja menua Ejip ngelepaska orang Israel, Allah Taala enda nguluka orang Israel nengah jalai ti nebing tasik ngagai menua Pilistin, taja pen jalai nya muntang, laban ku pikir Allah Taala, “Aku enggai ke orang Israel ngubah runding diri, lalu pulai baru ngagai menua Ejip, lebuh sida nemu diri enda tau enda beperang.” 18Nya alai, Iya nguluka sida niti jalai ti melit, nengah menua puang, nuju ngagai Tasik Mirah. Orang Israel endang udah nyendiaka diri deka beperang.

19 Moses mai bangkai Josep, nitihka semaya ti udah digaga Josep ngena sumpah enggau orang Israel. Josep udah bejaku munyi tu, “Lebuh Allah Taala ngelepaska kita, kita enda tau enda mai bangkai aku ari endur tu.”

20Orang Israel angkat ari Sukot, lalu nirika kem di Etam, ba tisi menua puang. 21Lebuh siang hari, TUHAN bejalai dulu ari sida dalam gentilang remang, nunjukka jalai ngagai sida, lalu lebuh malam hari, Iya bejalai dulu ari sida, dalam tiang api, meri sida penampak, ngambika sida ulih bejalai siang malam. 22Tiang mua hari nya endang seruran bejalai dulu ari orang Israel lebuh siang hari, lalu tiang api nya seruran di mua sida lebuh malam hari.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index