Search form

Pemansut 16

Mana Enggau Burung Empitu

1Semua orang Israel angkat ari Elim, lalu kena lima belas hari bulan, kedua bulan sida udah angkat ari menua Ejip, sida lalu datai di menua puang Sin, ba entara Elim enggau Sinai. 2Lebuh sida di menua puang nya, semua sida mutap ngelaban Moses seduai Aron. 3Ku sida bejaku enggau seduai iya, “Manah agi enti TUHAN udah munuh kami di menua Ejip. Din kami ulih duduk lalu makai dagin, enggau ni pemayuh pemakai bukai ti dikedekaka kami. Tang seduai udah mai kami pansut ngagai menua puang tu, ngambika semua kami mati lapar.”

4 TUHAN lalu bejaku ngagai Moses, “Diatu Aku deka ngasuh pemakai labuh ari langit baka ujan ke semua kita. Orang mayuh enda tau enda bejalai tiap hari, lalu ngumpul pemakai chukup ke sehari nya. Nya chara Aku nguji ati sida, kena Aku nemu enti sida deka nitihka atur Aku tauka enggai. 5Ba hari ti keenam, sida enda tau enda mai ngagai kem dua kali mayuh agi ari ti selama, lalu mela utai nya.”

6Moses seduai Aron lalu bejaku enggau semua orang Israel, “Lemai tu kita deka nemu TUHAN Empu udah mai kita pansut ari menua Ejip. 7Pagila kita deka meda mulia TUHAN. Iya udah ninga kita mutap ngelaban Iya. Kita amat mutap ngelaban Iya, laban kami duai semina nitihka atur Iya aja.” 8Ku Moses, “TUHAN Empu ti deka meri kita dagin lebuh lemai hari, enggau sepemayuh roti ti dikedekaka kita lebuh pagi hari, laban Iya udah ninga kita balat amat mutap ngelaban Iya, laban lebuh kita mutap ngelaban kami duai, iya ti bendar, kita mutap ngelaban TUHAN.”

9Ku Moses bejaku enggau Aron, “Asuh semua orang mayuh datai lalu bediri di mua TUHAN, laban Iya udah ninga jaku putap sida.” 10Lebuh Aron benung bejaku ngagai semua orang Israel, sida lalu nguing tunga ngagai menua puang. Tekala nya mulia TUHAN lalu pegari ba remang. 11Lalu ku TUHAN bejaku ngagai Moses, 12“Aku udah ninga jaku putap orang Israel. Padahka ngagai sida, lebuh lemai hari, sida deka makai dagin, lalu lebuh pagi hari, sida deka makai roti ngemayuh ti dikedekaka sida. Nya baru sida deka nemu Aku tu TUHAN Allah Taala sida.”

13Lebuh lemai hari, mayuh amat burung empitu terebai ngagai kem, chukup kena mungkur kem nya, lalu lebuh pagi hari, ambun nurun ngelingi kem nya. 14Lebuh ambun nya udah lesap, utai ti mipis baka tisik ikan sereta alus baka ais, bisi tinggal ba tanah di menua puang nya. 15 Lebuh orang Israel meda utai nya, sida enda ngelala utai nya, lalu sida betanya ngagai pangan diri, ku sida, “Nama utai nya?”

Ku Moses bejaku enggau sida, “Tu meh pemakai ti diberi TUHAN ngagai kita. 16TUHAN udah bejaku ngasuh genap iku kita ngumpul sepemayuh ti dipeguna kita sebilik, dua liter ke siku-siku kita.”

17Orang Israel lalu ngumpul utai nya. Sekeda sida ngumpul mayuh agi, sekeda mimit agi. 18 Lebuh sida nakar utai nya, orang ke ngumpul mayuh agi, nadai bulih kelalu mayuh, lalu orang ke ngumpul mimit agi, nadai bulih kelalu mimit. Genap iku sida udah ngumpul nyampau ti dipeguna sida siku-siku. 19Ku Moses bejaku enggau sida, “Nadai siku kita tau ngalau utai nya ke pagila.” 20Tang sekeda ari bala sida enda mendingka Moses, lalu ngalau utai nya. Pagi hari siti, utai nya nyau penuh laban ulat, lalu bebau but. Moses lalu ringat ngagai sida. 21Genap pagi, siku-siku sida ngumpul nyampau ti dipeguna sida. Lebuh hari nyau angat, utai nya ti agi tinggal ba tanah, luluh magang.

22Ba hari ti keenam, sida ngumpul dua kali mayuh agi, empat liter ke genap iku sida. Semua tuai orang Israel datai lalu madahka pasal utai nya ngagai Moses, 23 lalu ku iya bejaku enggau sida, “TUHAN udah ngeletak pagila nyadi hari ti kudus alai kitai diau, hari ti diserahka kitai ngagai Iya. Panggang sehari tu utai ti deka dipanggang kita, lalu panduk utai ti deka dipanduk kita. Laluh utai nya patut digalau, lalu ditaruh ke pagila.” 24Munyi ti udah diasuh Moses, sida lalu ngalau utai ti laluh ke pagi hari siti. Utai nya enda bari, lalu enda mega diempa ulat. 25Ku Moses, “Empa utai nya sehari tu, laban tu Hari Sabat, hari kitai diau, ti diserahka kitai ngagai TUHAN. Nadai kita nemu pemakai nya di luar kem. 26Kita enda tau enda ngumpul pemakai dalam enam hari, tang ba hari ti ketujuh, iya nya hari kitai diau, utai nya nadai.”

27Ba hari ti ketujuh, sekeda orang pansut, deka ngumpul pemakai nya, tang sida nadai tetemuka utai nya. 28Udah nya TUHAN lalu bejaku ngagai Moses, “Ni pengelama kita agi mengkang enggai ngasika pesan Aku? 29Kita enda tau enda ingat, Aku ti TUHAN, udah meri kita hari alai kita diau. Nya kebuah ba hari ti keenam, Aku deka seruran meri kita pemakai chukup ke dua hari. Semua orang enda tau enda diau ba hari ti ketujuh, lalu enda mindah ari rumah.” 30Nya alai, orang Israel enda gawa ba hari ti ketujuh.

31 Orang Israel ngumbai pemakai nya mana. Utai nya mit, baka leka telasih, sereta bechura burak. Asai iya sebaka enggau asai roti ti digaga ngena ai manyi. 32Ku Moses bejaku, “TUHAN udah bejaku ngasuh kitai ngalau sekeda mana nya, ngambika bisi disimpan ke anak uchu kitai, ngambika sida ulih meda pemakai ti udah diberi TUHAN ngagai kitai di menua puang tu, lebuh Iya mai kitai pansut ari menua Ejip.” 33 Ku Moses bejaku enggau Aron, “Ambi sigi kebuk, engkahka dua liter mana dalam kebuk nya, lalu engkahka kebuk nya di mua TUHAN, ngambika ditaruh ke peturun kitai.” 34Munyi ti udah dipesanka TUHAN ngagai Moses, Aron lalu ngengkahka utai nya di mua Peti Lampang Batu Adat, lalu ditaruh dia. 35 Orang Israel makai mana empat puluh taun, nyentuk ngagai maya sida datai di menua Kanaan, alai sida ke ngentapka diri. ( 36Takar ti dikena lebuh maya nya, sebaka enggau dua puluh liter.)

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index