Search form

Pemansut 19

Orang Israel Ba Bukit Sinai

1-2Orang Israel lalu angkat ari Repidim, lalu kena satu hari bulan, ketiga bulan sida udah pansut ari menua Ejip, sida lalu datai di menua puang Sinai. Dia sida lalu nirika kem, ba kaki Bukit Sinai. 3Moses lalu niki ngagai bukit nya, mansang ngagai Allah Taala.

TUHAN lalu ngangauka Moses ari bukit nya, ku Iya, “Sebut munyi tu ngagai peturun Jakop, lalu padahka ngagai orang Israel: 4Kita udah meda utai ti udah dikereja Aku ngagai orang Ejip, enggau chara Aku mai kita baka menaul ngagai Aku Empu. 5 Nya alai, enti kita deka ngasika Aku, lalu nitihka sempekat Aku, kita deka nyadi nembiak Aku, ke dipilih Aku ari semua bansa di dunya; laban semua dunya tu endang enggi Aku. 6 Kita deka nyadi bansa ti diserahka ngagai Aku nyadi perintah imam, bansa ti kudus. Nya meh leka jaku ti deka disebut nuan ngagai orang Israel.” 7Moses lalu nurun lalu ngempuruka bala tuai orang mayuh, lalu madahka ngagai sida semua utai ti udah diasuh TUHAN kereja iya. 8Semua orang Israel lalu nyaut sama sereta. Ku sida, “Kami deka ngereja semua utai ti udah disebut TUHAN.” Moses lalu madahka jaku sida ngagai TUHAN.

9Lalu ku TUHAN bejaku ngagai Moses, “Aku deka datai ngagai kita dalam mua hari ti tebal, ngambika orang mayuh ninga Aku bejaku enggau nuan, lalu arapka nuan belama iya.”

Moses lalu madahka ngagai TUHAN saut orang mayuh, 10lalu ku TUHAN bejaku ngagai iya, “Alai nuan mansang ngagai orang mayuh, lalu asuh sida nuchi diri sehari tu enggau pagila, lalu asuh sida masu gari sida, 11ngambika ba hari ti ketiga sida udah chukup sedia; laban ba hari nya Aku deka nurun ngagai Bukit Sinai, dipeda semua orang mayuh. 12 Lalu nuan deka ngaga garis ngelingi bukit nya, lalu bejaku ngagai orang mayuh munyi tu, ‘Bejimat kita, enggai ke kita niki ngagai bukit nya, tauka negu kaki bukit nya. Barang sapa negu bukit nya deka dibunuh. 13Nadai orang tau negu orang ke negu bukit nya, tang iya deka dituku ngena batu, tauka ditimbak ngena laja. Nemuka utai nya jelu tauka mensia, iya enda tau ditejuka idup.’ Lebuh terumpit ti penudi nya disepu, nya baru sida tau niki ngagai bukit nya.”

14Udah nya Moses nurun ari bukit nya mansang ngagai orang mayuh, lalu nyerahka sida ngagai Allah Taala; sida lalu masu gari sida. 15Lalu ku Moses bejaku ngagai sida, “Kita enda tau enda udah chukup sedia ba hari ti ketiga; lalu anang beleman enggau indu.”

16 Pagi hari ti ketiga, guntur enggau kilat lalu mangka ba bukit nya. Mua hari ti tebal pegari ba atas bukit nya, lalu munyi terumpit ti inggar bisi didinga. Semua orang dalam kem nya nyau getar-getar takut. 17Moses lalu nguluka sida pansut ari kem mansang betemu enggau Allah Taala, lalu sida bediri ba kaki bukit nya. 18Semua Bukit Sinai abis dibalut asap, laban TUHAN udah nurun ngagai bukit nya dalam daun api. Asap nya niki ke atas baka asap ti pansut ari serumbung api, lalu semua orang balat amat getar-getar takut. 19Lebuh munyi terumpit nya majak inggar se-inggar, Moses bejaku, lalu Allah Taala nyaut iya ngena guntur. 20TUHAN lalu nurun ngagai Bukit Sinai, lalu ngangauka Moses, ngasuh iya niki ngagai tuchung bukit nya. Moses lalu niki. 21Lalu ku TUHAN bejaku ngagai iya, “Alai nuan nurun, lalu beri jaku tangkan ngagai orang mayuh, enggai ke sida meraka garis mansang meda Aku lalu mati. 22Indah bala imam ke datai semak ngagai Aku, deh enda tau enda nuchi diri empu, enggai ke TUHAN ngukum sida.”

23Ku Moses bejaku ngagai TUHAN, “Orang mayuh enda ulih niki ngagai Bukit Sinai, laban Nuan udah bejaku ngagai kami, ku Nuan, ‘Gaga garis ngelingi bukit nya, lalu kuduska bukit nya.’ ”

24Ku TUHAN nyaut Moses, “Alai nuan nurun, lalu pulai kitu baru, mai Aron; tang anang nejuka bala imam enggau orang mayuh meraka garis nya mansang ngagai TUHAN, enggai ke Iya ngukum sida.” 25Moses lalu nurun ngagai orang mayuh, lalu madahka utai ti udah disebut TUHAN.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index