Search form

Pemansut 29

Atur Kena Nyiri Aron Enggau Bala Anak Lelaki Iya Nyadi Imam

(Adat Lewi 8.1-36)

1“Tu utai ti enda tau enda dikereja nuan ngagai Aron enggau bala anak lelaki iya, kena nuan nyerahka sida nyadi imam ke bekereja ke Aku. Ambi siku jelu sapi ti lelaki, enggau dua iku bedus ti lelaki, ti nadai penimpang. 2Ngena tepung gandum ti pemadu alus, tang enda ngena ragi, gaga roti ngena minyak kana. Gaga mega roti enda ngena minyak, lalu sekeda digaga besingkap mipau, dipalitka enggau minyak. 3Simpan semua roti nya dalam siti bakul, lalu beri utai nya ngagai Aku lebuh nuan meri jelu sapi ti lelaki, enggau bedus ti lelaki, nyadika piring.

4“Bai Aron enggau bala anak lelaki iya ngagai penama Langkau Kain TUHAN, lalu asuh sida mandi dia. 5Udah nya rasukka pekayan imam ba Aron: baju, baju panjai, epod, terabai dada, enggau belulang. 6Engkahka labung ba pala iya, lalu tanchangka ba labung nya siti kelai ti kudus, alai leka jaku ‘Diserahka Ngagai TUHAN,’ udah ditulis. 7Udah nya ambi minyak tata, tuang minyak nya ba pala iya, lalu tata iya.

8“Bai bala anak lelaki iya, lalu rasukka baju ba sida. 9Lekatka selampai melit punggung sida, enggau selapuk ba pala sida. Nya chara nuan nyiri Aron enggau bala anak lelaki iya. Sida enggau peturun sida deka bekereja nyadi imam ke Aku belama iya.

10“Bai siku sapi ti lelaki ngagai mua Langkau Kain TUHAN, lalu asuh Aron enggau bala anak lelaki iya ngengkahka jari sida ba pala sapi nya. 11Sayat sapi nya di mua Aku, ba penama ngagai Langkau Kain TUHAN. 12Ambi sekeda darah sapi nya, lalu ngena tunjuk nuan, palitka darah nya ngagai tanduk alta nya. Udah nya bubuhka teda darah nya ba kaki alta. 13Udah nya, ambi semua lemak ti malut perengka dalam, atau, enggau dua iti tungkul sengayuh, sama enggau lemak ti malut perengka nya, lalu tunu utai nya ba alta, nyadika piring ti diberi ngagai Aku. 14Tang tunu isi sapi nya, kulit, enggau perengka perut iya di luar kem. Tu nyadika piring pengampun dosa ke bala imam.

15“Ambi siku bedus ti lelaki, lalu asuh Aron enggau bala anak lelaki iya ngengkahka jari sida ba pala bedus nya. 16Sayat bedus nya, bai darah iya, lalu unsaika darah nya ngagai semua tisi alta. 17Tetak bedus nya. Basu semua perengka dalam, enggau kaki belakang iya, lalu engkahka utai nya ba atas pala bedus enggau lampang dagin ti bukai. 18 Tunu semua isi bedus ti lelaki nya ba alta nyadika piring ti diberi ngena api. Bau piring tu ngerinduka ati Aku.

19“Ambi bedus ti lelaki ti siku - bedus ti lelaki ti dikena nyerahka imam - lalu asuh Aron enggau bala anak lelaki iya ngengkahka jari sida ba pala bedus nya. 20Sayat bedus nya, lalu ambi sekeda darah iya, lalu palitka darah nya ngagai rambing pending kanan Aron enggau bala anak lelaki iya, ba tunjuk indu jari kanan, enggau ba tunjuk indu kaki kanan sida. Unsaika teda darah nya ngagai semua tisi alta nya. 21Ambi sekeda darah ti ba alta, enggau sekeda minyak tata, lalu pechikka darah nya ngagai Aron enggau ngagai gari iya, enggau ngagai bala anak lelaki, enggau ngagai gari sida. Nya baru Aron, bala anak lelaki iya, enggau gari sida, diserahka ngagai Aku.

22“Tisil lemak bedus ti lelaki nya, lemak ti ba pun iku, lemak ti mungkur perengka dalam, isi atau ti pemadu manah, dua iti tungkul sengayuh, sereta enggau lemak ti lekat ba sida, enggau pah kanan. 23Ari roti ti dalam bakul ti udah diberi ngagai Aku, ambi siti tuku roti ari semua macham roti, iya nya, siti tuku roti ti digaga ngena minyak kana, siti ti digaga enda ngena minyak kana, enggau sesingkap roti ti mipis. 24Engkahka semua pemakai tu ba jari Aron, enggau bala anak iya, lalu asuh sida nyerahka utai nya ngagai Aku, nyadika pemeri. 25Udah nya ambi utai nya ari sida, lalu tunu utai nya ba alta, atas piring tunu, nyadika piring ti diberi ngena api ti diberi ngagai Aku. Bau piring tu deka ngerinduka ati Aku.

26“Ambi isi dada bedus ti lelaki nya, lalu serahka utai nya ngagai Aku, nyadika pemeri. Isi tu endang diungkupka kita.

27“Lebuh orang dichiri nyadi imam, isi dada enggau pah bedus ti lelaki ti dikena nyiri sida, enda tau enda diserahka ngagai Aku, nyadi pemeri ti pemadu manah, lalu digalau nyadika ungkup bala imam. 28Tu pemutus penemu Aku ti enda berubah: lebuh nembiak Aku ngaga piring pemaik, isi dada enggau pah jelu nya deka diempu bala imam. Tu meh pemeri ti dienjuk orang Israel ngagai Aku ti TUHAN.

29“Pekayan imam ti dikena Aron enda tau enda diserahka ngagai bala anak iya, udah bekau iya mati, ngambika bisi dikena sida, lebuh sida dichiri nyadi imam. 30Anak lelaki Aron ke nganti iya nyadi imam, ke tama ngagai Langkau Kain TUHAN, lalu gawa dalam Endur ti Kudus, enda tau enda ngena pekayan nya tujuh hari.

31“Ambi isi bedus ti lelaki, ti udah dikena nyiri Aron enggau bala anak lelaki iya nyadi imam, lalu panduk dagin nya ba Endur ti Kudus. 32Sida enda tau enda makai dagin nya, sama enggau teda roti ti dalam bakul nya, ba penama ngagai Langkau Kain TUHAN. 33Sida deka makai utai ti udah dikena miring minta pengampun dosa lebuh nyirika sida nyadi imam. Semina bala imam aja tau makai pemakai nya, laban pemakai nya kudus. 34Enti sekeda dagin nya, tauka sekeda roti nya enda abis diempa datai ke pagi hari siti, utai nya enda tau enda ditunu. Utai nya enda tau diempa, laban iya kudus.

35“Kereja pengawa nyiri Aron enggau bala anak lelaki iya nyadi imam dalam pengelama tujuh hari, nitihka chara ti udah dipadahka Aku ngagai nuan. 36Nuan enda tau enda tiap hari meri siku sapi ti lelaki nyadika piring, ngambika dosa tau diampun. Tu deka nuchi alta. Udah nya, tata alta nya ngena minyak kana, kena nguduska iya. 37Kereja tu tiap hari dalam kandang tujuh hari nya. Udah nya baru alta nya deka nyadi kudus, lalu barang sapa tauka barang utai negu alta nya, deka bebadi laban kuasa pengudus alta nya.

Pemeri Ti Diberi Tiap Hari

(Penyampau 28.1-8)

38“Genap hari, enggau ke belama iya, beri dua iku anak domba ti umur setaun, ba alta nya, nyadika piring. 39Beri siku nyadika piring lebuh pagi hari, lalu siku lebuh lemai hari. 40Beri sama enggau anak domba nya sekilogram tepung gandum ti alus, dichampur enggau seliter minyak kana ti tulin. Tuang seliter wain nyadika piring. 41Lebuh hari nyau lemai beri anak domba ti kedua nya nyadika piring, lalu beri sama enggau anak domba nya, tepung gandum, minyak kana enggau wain, ngemayuh ti diberi lebuh pagi hari. Tu nyadika piring ti diberi ngena api ngagai Aku ti TUHAN, lalu bau utai tu deka ngerinduka ati Aku. 42Piring ti ditunu nya enda tau enda diberi di mua Aku, ba penama ngagai Langkau Kain TUHAN belama iya. Nya meh endur alai Aku deka betemu enggau bala nembiak Aku, lalu bejaku ngagai nuan. 43Dia meh endur alai Aku deka betemu enggau orang Israel, lalu mulia Aku deka nguduska endur nya. 44Aku deka nyeraraka Langkau Kain TUHAN enggau alta nya, lalu Aku deka nyeraraka Aron enggau bala anak lelaki iya, ngambika sida bekereja nyadi imam Aku. 45Aku deka diau begulai enggau orang Israel, lalu Aku deka nyadi Allah Taala sida. 46Sida deka nemu Aku endang TUHAN ti Allah Taala sida, ti udah mai sida pansut ari menua Ejip ngambika Aku diau begulai enggau sida. Aku tu TUHAN ti Allah Taala sida.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index