Search form

Pemansut 30

Alta Alai Nunu Menyan

(Pemansut 37.25-28)

1“Gaga siti alta ari kayu akasia, alai nunu menyan. 2Alta nya enda tau enda besegi empat. Pemanjai iya 45 sentimeter. Buka iya 45 sentimeter, lalu peninggi iya 90 sentimeter. Tanduk ti ba empat iti sukut alta nya enda tau enda digaga selajur enggau mija nya empu. 3Sampak puchuk, semua empat iti tisi, enggau tanduk nya ngena emas ti tulin, lalu gaga bingkai emas ngelingi mija nya. 4Gaga dua iti chengkerung emas kena ngaling mija nya, lalu lekatka chengkerung dua iti nya ari baruh bingkai ti ba dua iti tisi, alai ngerasukka kayu ti dikena ngaling mija nya. 5Gaga kayu kena ngaling mija nya ari kayu akasia, lalu sampak kayu nya enggau emas. 6Engkahka mija nya ari luar kain tirai ti digantung di mua Peti Lampang Batu Adat. Tu endur alai Aku deka betemu enggau nuan. 7Genap pagi, lebuh Aron datai ngintu lampu, iya enda tau enda nunu menyan ti bebau rengut ba mija nya. 8Iya enda tau enda ngereja baka nya mega lebuh iya nungkun lampu nya lebuh lemai hari. Pengawa ti meri menyan enda tau diketuka datai ke belama iya. 9Anang meri ba atas alta nya menyan ti enda tau diberi, tauka piring jelu, tauka piring gandum, lalu anang nuang piring wain ba alta nya. 10Aron enda tau enda ngereja pengawa nuchi alta nya sekali setaun ngena darah jelu ti udah diberi nyadika piring pengampun dosa, ti diengkahka iya ba empat iti tanduk alta nya. Tu enda tau enda dikereja tiap taun datai ke belama iya. Alta nya pemadu kudus, lalu diserahka ngagai Aku ti TUHAN.”

Duit Pupu Ke Langkau Kain TUHAN

11Ku TUHAN bejaku ngagai Moses, 12“Lebuh nuan ngitung tubuh orang Israel, genap iku orang enda tau enda mayar ngagai Aku rega nyawa iya, ngambika iya enda ditinggang penusah lebuh pengawa ngitung tubuh benung dikereja. 13 Semua orang ke kena itung enda tau enda mayar duit ti dipinta, ti ditimbang nitihka atur ti udah diletak dalam Langkau Kain TUHAN. Semua orang enda tau enda mayar tu nyadika piring ti diberi ngagai Aku. 14Semua orang ke kena itung, iya nya, genap iku lelaki ke umur dua puluh taun ke atas, enda tau enda mayar duit nyampau nya ngagai Aku. 15Orang ke kaya enda tau mayar lebih ari nya, lalu orang ke seranta pen enda mega tau mayar mimit ari nya, lebuh sida mayar duit kena meli nyawa diri. 16Gumpul duit nya ari orang Israel, lalu awakka duit nya dikena ngintu Langkau Kain TUHAN. Duit ti digumpul nya deka dikena mayar nyawa sida, lalu Aku deka nyaga sida.”

Bisin Temaga

17Ku TUHAN bejaku ngagai Moses, 18 “Gaga siti bisin temaga, ti bisi penuduk ti digaga mega ari temaga. Engkahka bisin nya ba entara Langkau Kain TUHAN enggau alta, lalu simpan ai dalam bisin nya. 19Aron enggau bala anak lelaki iya enda tau enda masu jari enggau kaki sida ngena ai nya 20sebedau sida tama ngagai Langkau Kain TUHAN, tauka mansang ngagai alta deka ngenjuk piring ti diberi ngena api. Nya baru sida enda kena bunuh. 21Sida enda tau enda masu jari enggau kaki sida, ngambika sida enda mati. Tu atur ti enda tau enda dititihka sida enggau raban bansa sida belama iya.”

Minyak Tata

22 Ku TUHAN bejaku ngagai Moses, 23“Ambi rempah ti pemadu manah - 5.5 kilogram mur, 3.5 kilogram kulit kayu manis ti bebau rengut, 3.5 kilogram tebu ti bebau rengut, 24enggau 6 kilogram kayu akasia (semua ditimbang nitihka atur ti udah diletak dalam Langkau Kain TUHAN), 4 liter minyak kana 25lalu gaga minyak tata ti kudus, dirakit baka minyak wangi. 26Tata semua utai tu ngena minyak nya: Langkau Kain TUHAN Aku, Peti Lampang Batu Adat, 27mija, enggau semua pekekas mija, penuduk lampu enggau semua pekekas penuduk lampu, alta alai nunu menyan, 28alta alai nunu piring, sereta enggau semua pekekas alta nya, enggau bisin alai bebasu, sereta enggau penuduk iya. 29Serahka semua utai nya ngena chara nya, ngambika semua utai nya nyadi kudus, lalu semua orang tauka semua utai ti negu sida deka bebadi laban kuasa pengudus utai nya. 30Udah nya, tata Aron enggau bala anak lelaki iya, lalu chiri sida nyadi imam ngambika sida gawa ke Aku. 31Sebut jaku tu ngagai orang Israel, “Minyak tata Aku ti kudus tu deka dikena belama iya nyiri orang ke gawa ke Aku. 32Minyak tu enda tau dituang ba orang ke ukai imam, lalu nuan enda tau ngena rakit nya ngaga minyak ti sebaka enggau minyak tata nya. Minyak nya kudus, lalu nuan enda tau enda ngumbai minyak nya kudus. 33Barang sapa ngaga minyak ti sebaka enggau nya, tauka ngena minyak nya ba orang ke ukai imam, deka badu agi nyadi nembiak Aku.’ ”

Menyan

34Ku TUHAN bejaku ngagai Moses, “Ambi sama penyampau ari siti bagi rempah ti bebau rengut tu - getah dambar, kerubung lukan, getah rasamala, enggau menyan ti tulin. 35Gaga menyan ti dirakit ngena semua utai nya baka ke ngaga minyak wangi. Beri garam ngambika menyan nya tuchi sereta kudus. 36Tutuk sekeda menyan nya alus. Bai menyan nya ngagai Langkau Kain TUHAN, lalu kerabuka menyan nya di mua Peti Lampang Batu Adat. Menyan nya kudus. 37Anang ngena rakit nya ngaga menyan ke kita empu. Kita enda tau enda ngumbai menyan nya kudus, lalu udah diserahka ngagai Aku. 38Enti orang bisi ngaga menyan ngena rakit nya lalu dikena nyadi minyak wangi, orang nya deka badu agi dikumbai nembiak Aku.”

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index