Search form

Pemansut 37

Ngaga Peti Lampang Batu Adat

(Pemansut 25.10-12)

1Besalel ngaga Peti Lampang Batu Adat nya ari kayu akasia. Pemanjai iya 110 sentimeter; buka iya 66 sentimeter, lalu peninggi iya 66 sentimeter. 2Besalel nyampak Peti Lampang Batu Adat nya enggau emas ti tulin, ari luar enggau ari dalam, lalu ngelekatka lilit emas ngelingi Peti nya. 3Iya ngaga empat iti chengkerung emas kena ngesan Peti nya, lalu ngelekatka chengkerung nya ngagai empat iti kaki ke Peti nya, dua iti chengkerung ba tisi siti-siti. 4Iya ngaga kayu kena ngesan Peti nya ari kayu akasia, ti disampak iya enggau emas, 5lalu dirasukka iya ngagai chengkerung ti ba siti-siti tisi Peti nya. 6Iya ngaga tudung ke Peti nya ari emas ti tulin. Pemanjai tudung nya 110 sentimeter, lalu buka iya 66 sentimeter. 7Besalel nempa dua iku melikat cherub ti besayap, ari emas, 8siku ke tiap iti puting tudung nya. Iya ngaga melikat dua iku nya selajur enggau emas ti dikena ngaga tudung nya empu. 9Melikat cherub ti besayap nya betunga mua enggau pangan diri ba atas tudung nya, lalu sayap seduai iya ngerembai mungkur tudung nya.

Ngaga Mija Alai Engkah Roti Ti Diberi Ngagai Allah Taala

(Pemansut 25.23-30)

10Besalel ngaga mija nya ari kayu akasia. Pemanjai mija nya 88 sentimeter. Buka iya 44 sentimeter, lalu peninggi iya 66 sentimeter. 11Besalel nyampak mija nya enggau emas ti tulin, lalu ngaga lilit emas ngelingi mija nya. 12Iya ngaga bingkai, buka 7.5 sentimeter, ngelingi mija nya, lalu ngaga lilit ba semua tisi bingkai nya. 13Iya ngaga empat iti chengkerung emas kena ngaling mija nya, lalu ngelekatka chengkerung nya ba empat iti kaki ti ba sukut mija nya. 14Chengkerung emas ti dikena ngaling mija nya diengkah semak bingkai mija nya. 15Iya ngaga kayu pengaling ke mija nya ari kayu akasia, ti disampak iya enggau emas. 16Iya ngaga semua chapak ke mija nya ari emas ti tulin: nyengkaum pinggai, mangkuk, tepayan, enggau mangkuk ti dikena ngenjuk piring wain.

Ngaga Tiang Lampu

(Pemansut 25.31-40)

17Besalel ngaga penuduk lampu ari emas ti tulin, lalu ngaga penuduk enggau batang penuduk lampu nya ari emas ti ditempa. Bungai ti dikena ngias penuduk lampu nya, nyengkaum kuntum enggau serindak bungai, ditempa selajur ari emas ti dikena ngaga penuduk lampu nya empu. 18Enam iti dan pansut ari tisi penuduk lampu nya, tiga iti ari sepiak-sepiak. 19Genap iti dan nya bisi tiga iti bungai kena ngias iya, digaga baka gamal bungai almon, ti bisi kuntum enggau serindak. 20Batang penuduk lampu nya bisi empat iti bungai kena ngias iya. Bungai nya baka gamal bungai almon, lalu bisi kuntum enggau serindak. 21Siti kuntum digaga ari baruh siti gerempung dan. 22Kuntum bungai nya, dan iya, enggau penuduk lampu nya ditempa selajur ari siti lumpung emas. 23Iya ngaga tujuh iti lampu ke penuduk lampu nya, lalu iya ngaga sepit enggau talam ari emas ti tulin. 24Iya ngena 34 kilogram emas ti tulin begagaka penuduk lampu, enggau semua pekekas ke penuduk lampu nya.

Ngaga Alta Alai Nunu Menyan

(Pemansut 30.1-5)

25Besalel ngaga siti alta ari kayu akasia, alai nunu menyan. Mija nya besegi empat. Pemanjai iya 45 sentimeter; buka iya 45 sentimeter, lalu peninggi iya 90 sentimeter. Tanduk mija nya, ti ba empat iti sukut mija nya, digaga selajur enggau isi mija nya empu. 26Iya nyampak puchuk, semua empat iti tisi, enggau tanduk mija nya enggau emas ti tulin, lalu ngelekatka lilit emas ngelingi mija nya. 27Iya ngaga dua iti chengkerung emas kena ngaling mija nya, lalu ngelekatka chengkerung nya ari baruh lilit ti ba tisi dua iti, alai ngerasukka kayu ti dikena ngaling mija nya. 28Iya ngaga kayu pengaling ke mija nya ari kayu akasia, ti disampak iya enggau emas.

Ngaga Minyak Tata Enggau Ngaga Menyan

(Pemansut 30.22-38)

29 Iya mega ngaga minyak tata ti kudus, enggau menyan ti bebau rengut, dichampur enggau minyak wangi.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index