Search form

Pemansut 5

Moses Seduai Aron Betemu Enggau Raja Menua Ejip

1Udah nya Moses seduai Aron lalu mansang ngagai raja menua Ejip. Ku seduai iya bejaku, “TUHAN Allah Taala ke disembah orang Israel nyebut, ‘Lepaska nembiak Aku, ngambika sida ulih begawai di menua puang kena sida ngemesaika Aku.’ ”

2Raja nya lalu nanya, “Sapa ke dikumbai TUHAN? Lalu nama kebuah aku enda tau enda mendingka Iya lalu ngelepaska orang Israel? Aku enda nemu TUHAN, lalu aku enggai ngelepaska orang Israel.”

3Disaut Moses seduai Aron, “Allah Taala orang Hebrew udah mandangka Diri ngagai kami. Nya alai awakka kami bejalai tiga hari ngagai menua puang, ngambika kami ulih ngenjuk piring ngagai TUHAN Allah Taala kami. Enti kami enda ngereja nya, Iya deka munuh kami ngena penyakit, tauka ngasuh kami mati beperang.”

4Ku raja bejaku enggau Moses seduai Aron, “Nama kebuah seduai ngelimpangka orang mayuh ari pengawa sida? Asuh bala ulun nya bekereja! 5Orang bansa kita nyau mayuh agi ari orang Ejip. Lalu diatu kita enggai agi gawa!”

6Ba hari nya raja lalu meri atur ngagai orang Ejip ke ngemataka pengawa ulun, enggau bala mandur ke ari bansa orang Israel empu: 7“Badu agi meri sida rumput ti rangkai kena ngaga batu bata. Awakka sida ngiga rumput ti rangkai ke diri empu. 8Tang sida enda tau enda ngaga batu bata ngemayuh ti dulu, nadai kurang siti. Sida tu nadai chukup utai dikereja, nya kebuah sida majak minta aku ngelepaska sida miring ngagai Allah Taala sida! 9Asuh sida bebendar agi gawa, lalu anang ngelakka sida ngetu, ngambika sida nadai peluang mendingka jaku ti bula.”

10Orang Ejip ke ngemataka pengawa ulun, enggau mandur ke ari bansa orang Israel empu mansang lalu bejaku enggau orang Israel, “Raja udah madahka iya enggai agi meri kita rumput ti rangkai. 11Ku iya, kita enda tau enda ngiga rumput ti rangkai ke diri empu, tang kita enda tau enda ngaga batu bata ngemayuh ti dulu.” 12Orang Israel lalu ngiga rumput ti rangkai di serata menua Ejip. 13Tiap hari bala mandur mejalka sida ngaga batu bata ngemayuh ti dulu suba lebuh sida agi diberi rumput ti rangkai. 14Orang Ejip ke ngemataka pengawa ulun malu orang Israel ti nyadi mandur. Ku sida, “Nama kebuah kita enda ngaga batu bata ngemayuh ti digaga kita suba?”

15Udah nya sida mandur mansang lalu mantaika serabana sida ngagai raja, “Tuan Raja, nama kebuah nuan ngereja utai baka tu ngagai kami? 16Kami nadai diberi rumput ti rangkai, tang kami agi dipejalka ngaga batu bata! Lalu diatu kami dipalu. Bala kita empu ke salah.”

17Ku raja nya nyaut, “Kita tu ngelusu lalu enggai gawa. Nya kebuah kita minta aku ngelepaska kita lalu nejuka kita miring ngagai TUHAN. 18Pulai kita lalu gawa! Kita enda agi diberi rumput ti rangkai, tang kita enda tau enda ngaga batu bata ngemayuh ti dulu.” 19Sida mandur nemu diri dituntung penusah lebuh sida diasuh ngaga batu bata tiap hari ngemayuh ti dulu.

20Lebuh sida angkat ari istana raja, sida lalu betemu enggau Moses seduai Aron ke benung nganti pemulai sida. 21Ku sida bejaku enggau Moses seduai Aron, “Awakka TUHAN meda seduai, lalu ngakim seduai laban seduai udah ngasuh raja enggau bala pemesai iya begedika kami. Seduai udah meri sida tegal kena sida munuh kami.”

Moses Mutap Ngagai TUHAN

22Udah nya Moses lalu ngadap ngagai TUHAN baru, ku iya, “TUHAN, nama kebuah nuan merinsaka bala nembiak Nuan? Nama kebuah Nuan ngasuh aku kitu? 23Sekumbang aku ti udah betemu enggau raja, lalu bejaku ngarika Nuan, iya udah balat amat merinsaka bala nembiak Nuan. Lalu Nuan enda nyaup sida!”

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index