Search form

Pemansut 9

Jelu Tupi Mati

1TUHAN lalu bejaku ngagai Moses, “Alai nuan mansang ngagai raja, lalu padahka ngagai iya, ‘Ku TUHAN Allah Taala orang Hebrew bejaku: Lepaska nembiak Aku, ngambika sida ulih nyembah Aku. 2Laban enti nuan enggai ngelepaska sida, lalu agi ngetanka sida, 3Aku deka ngasuh penyakit ti balat amat nyerang jelu tupi kita, kuda, keledai, unta, sapi, bedus enggau kambin kita. 4Aku deka ngaga bida entara jelu tupi orang Israel enggau jelu tupi orang Ejip, ngambika nadai siku jelu orang Israel deka mati. 5Aku ti TUHAN, deka ngereja utai tu pagila.’ ”

6Hari siti TUHAN lalu ngereja utai ti ku Iya, lalu semua jelu tupi orang Ejip mati magang, tang nadai siku jelu tupi orang Israel mati. 7Raja nanyaka pasal utai ti udah nyadi, lalu orang madahka ngagai iya, nadai siku jelu tupi orang Israel mati. Tang ati iya kieh, lalu iya enggai ngelepaska orang Israel.

Pisa

8Udah nya TUHAN lalu bejaku ngagai Moses seduai Aron. “Bai dua tiga genggam amau ari dapur, lalu awakka Moses ngerabuka amau nya ngagai angin di mua raja. 9Amau nya deka nyadi amau ti alus lalu ngachir di serata menua Ejip. Abus nya deka ngasuh semua mensia enggau jelu diempa pisa, ti deka nyadi rumbak ti dilak-dilak ba tubuh mensia enggau jelu di serata menua Ejip.” 10 Seduai iya lalu ngambi amau, lalu bediri di mua raja. Moses lalu ngerabuka amau nya ngagai angin, lalu amau nya ngasuh mensia enggau jelu diempa pisa, ti nyadi rumbak ti dilak-dilak ba tubuh mensia enggau jelu. 11Bala orang ke tau keramat enda ulih ngayanka diri di mua Moses, laban sida diempa pisa, baka semua orang Ejip ti bukai. 12Tang TUHAN ngasuh ati raja kieh, lalu munyi ti dipadahka TUHAN ngagai Moses, raja enggai mendingka Moses seduai Aron.

Ujan Batu

13Udah nya TUHAN bejaku ngagai Moses, “Tumu pagila, nuan enda tau enda betemu enggau raja, lalu sebut ngagai iya, ‘Tu jaku TUHAN Allah Taala orang Hebrew: Lepaska nembiak Aku, ngambika sida ulih nyembah Aku. 14Laban sekali tu, Aku deka ngasuh semua penyakit nyerang nuan, nyerang bala pemesai nuan enggau orang Ejip, ngambika nuan nemu, nadai siku ti baka Aku di serata dunya tu. 15Laban enti sema Aku udah ngangkatka jari Aku lalu ngasuh nuan enggau orang Ejip kena laban penyakit, semua kita tetap udah abis mati. 16 Tang tu kebuah aku nejuka nuan idup, kena Aku ngayanka kuasa Aku ngagai nuan, ngambika nama Aku dikenang di serata dunya. 17Nuan agi mengkang ngeninggika diri ngelaban nembiak Aku, lalu enggai ngelepaska sida. 18Ba maya tu pagila, Aku deka ngasuh ujan batu balat nyadi, baka ke nadai udah kala nyadi di menua Ejip, kenyau ari menua tu digaga nyentuk ngagai diatu. 19Nya alai, asuh orang mai semua jelu tupi enggau semua utai bukai ti dikemisi kita di padang, ngagai endur ti likun; laban ujan batu deka ninggang mensia enggau jelu ti nadai utai ngelindung di padang, lalu semua sida deka mati.’ ” 20Sekeda pemesai raja takutka utai ti udah disebut TUHAN, lalu mai bala ulun enggau jelu tupi sida tama ke dalam rumah. 21Tang sida ti bukai, enggai mendingka jaku tangkan TUHAN, lalu nejuka bala ulun sida enggau jelu sida mengkang di padang.

22Udah nya TUHAN lalu bejaku ngagai Moses, “Kedarka jari nuan ke langit, ngambika ujan batu ninggang semua menua Ejip, ninggang mensia, jelu, enggau semua utai ti ditanam di serata menua Ejip.” 23Moses lalu ngedarka tungkat iya ke langit. TUHAN lalu ngasuh guntur, enggau ujan batu nyadi, lalu kilat mangka ngagai tanah. TUHAN ngasuh ujan batu balat amat nyadi di menua Ejip. 24 Ujan batu balat amat nyadi, lalu kilat pen nyelar. Nadai kabut udah kala ngemalat nya nyadi di menua Ejip. 25Ujan batu nya ngerusak semua utai ti ba padang di serata menua Ejip, nyengkaum mensia enggau jelu. Ujan batu nya mega ngerusak semua utai ti ditanam di padang, lalu matahka semua kayu. 26Semina di menua Gosen, endur alai orang Israel diau, nadai ujan batu.

27Raja lalu mesanka Moses seduai Aron, lalu bejaku ngagai seduai iya, “Sekali tu aku udah bedosa. TUHAN endang ngena, lalu aku enggau nembiak aku amat salah. 28Besampi ngagai TUHAN! Kami udah chukup merinsa laban guntur enggau ujan batu tu! Aku deka ngelepaska kita. Kita enda ibuh diau ditu agi.”

29Ku Moses bejaku ngagai iya, “Sepengelengkas aku pansut ari nengeri tu, aku deka ngedarka jari aku lalu besampi ngagai TUHAN. Guntur enggau ujan batu deka badu, ngambika nuan nemu, dunya tu endang enggi TUHAN. 30Tang pasal nuan enggau bala pemesai nuan, aku nemu kita apin nangika TUHAN Allah Taala.”

31Daun lemba enggau barli kita udah rusak, laban barli kita nyau tuai, lalu lemba kita baru nyumbuk. 32Tang gandum kita enda rusak, laban iya dudi agi mansau.

33Moses angkat ari istana raja, pansut ari nengeri nya, ngangkatka jari iya ngagai TUHAN. Guntur, ujan batu enggau ujan lalu badu. 34Tang lebuh raja meda guntur, ujan batu enggau ujan udah badu, iya bedosa baru. Iya enggau bala pemesai iya lalu kieh baka selama. 35Nya alai ati raja kieh, lalu iya enggai ngelepaska orang Israel, munyi ti udah dipadahka TUHAN ngena Moses.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index