Search form

Pemungkal 31

Jakop Rari Ari Laban

1Jakop bisi ninga bala anak Laban bejaku, “Jakop udah ngambi semua utai apai kitai. Iya bulih pengaya ari semua utai apai kitai.” 2Jakop mega meda Laban nyau enda agi manah enggau iya baka suba. 3TUHAN lalu bejaku enggau Jakop, “Pulai nuan ngagai menua aki ini nuan, ngagai kaban belayan nuan. Aku deka meruan enggau nuan.”

4Jakop lalu mesanka Rachel seduai Leah, minta seduai iya betemu enggau iya ba padang ti alai raban jelu iya ngulam. 5Ku Jakop bejaku enggau Leah seduai Rachel, “Aku meda apai seduai nyau enda agi manah enggau aku baka suba. Tang Allah Taala apai aku bisi enggau aku. 6Seduai sama nemu, aku udah bekereja ke apai kita enggau pengabis pengering aku. 7Tang taja pia, iya udah ngakal aku, lalu udah ngubah gaji aku sepuluh kali. Tang Allah Taala enda nyagi iya ngemediska aku, 8nya alai genap kali Laban nyebut, ‘Kambin ti perintik deka nyadika gaji nuan,’ semua raban jelu kambin nya lalu ngadaka anak ti perintik. Lebuh iya nyebut, ‘Kambin ti besurik deka nyadika gaji nuan,’ semua raban jelu nya lalu ngadaka anak ti besurik. 9Allah Taala udah ngambi raban jelu ari apai seduai, lalu meri sida ngagai aku.

10“Lebuh maya jelu bung, aku bemimpi, lalu aku meda kambin ti lelaki, ti benung bung, semua besurik, beselat bulu enggau perintik magang. 11Ku melikat Allah Taala bejaku ngagai aku dalam mimpi nya, ‘Jakop!’ Aku lalu nyaut, ‘Tu aku!’ 12Ku melikat nya bejaku, ‘Peda nuan, kambin ti lelaki, ti bung, semua besurik, beselat bulu, enggau perintik magang. Aku ngasuh utai tu nyadi, laban Aku udah meda semua utai ti dikereja Laban ngagai nuan. 13 Aku tu Allah Taala ti udah pegari di mua nuan di Betel, ba endur alai nuan ke nyerahka sigi batu nyadika batu pengingat, lalu nuang minyak kana ba batu nya, sereta ngaga siti semaya enggau Aku. Nya alai diatu nuan enda tau enda sedia, lalu pulai ngagai menua ada nuan.’ ” 14Rachel seduai Leah lalu nyaut Jakop, “Kami endang nadai agi ungkup ari pesaka apai kami. 15Iya ngaga kami baka orang kampar. Iya udah nyual kami duai, lalu diatu iya udah ngabiska semua duit rega kami duai ti udah dibayar ngagai iya. 16Semua pengaya tu, ti udah diambi Allah Taala ari apai kami, endang enggi kami enggau enggi anak kami. Kereja aja sebarang utai ti udah diasuh Allah Taala kereja nuan.”

17-18Nya alai Jakop lalu nyendiaka diri pulai ngagai apai iya di menua Kanaan. Iya nepanka bala anak iya, enggau bala bini iya ba jelu unta, lalu ngasuh semua raban jelu iya bejalai dulu di mua iya, mai semua utai ti udah ulih iya di Mesopotamia. 19Nyadi Laban udah mupuk laban iya deka ngukur bedus. Lebuh iya benung nadai di rumah, Rachel lalu ngenchuri engkeramba ti disembah sida sebilik, ti diempu apai iya. 20Jakop nipu Laban, enda madahka diri deka mupuk. 21Jakop mai semua utai diri, lalu beguai-guai mupuk. Iya meraka Sungai Eupratis, lalu bejalai nuju ngagai menua ti bebukit di Giliat.

Laban Ngagai Jakop

22Tiga hari udah bekau nya, orang bisi madahka ngagai Laban pasal Jakop ti udah rari. 23Laban lalu mai bala iya lalu ngagai Jakop. Iya bejalai tujuh hari nitihka Jakop, datai ke iya nyau ulih tetitihka Jakop ba menua ti bebukit di Giliat. 24Malam nya Allah Taala pegari di mua Laban dalam mimpi, lalu bejaku ngagai iya, “Bejimat, nuan. Nuan enda tau sekali-kali ngemba Jakop.” 25Nyadi Jakop udah nirika kem iya ba bukit sigi, lalu Laban nirika kem iya begulai enggau kaban belayan iya ba menua ti bebukit di Giliat.

26Ku Laban bejaku enggau Jakop, “Nama kebuah nuan nipu aku, lalu nabanka anak indu aku baka ke nabanka indu ke ditangkap lebuh beperang? 27Nama kebuah nuan nipu aku, lalu enda madahka diri mupuk? Enti nuan madahka diri mupuk, aku tetap deka ngerami pengangkat nuan ngena lagu, tamborin enggau belikan. 28Nuan nadai ngasuh aku nyium bala uchu enggau anak aku lebuh sida mupuk. Beli amat pengawa baka nya! 29Aku bisi kuasa ngemediska nuan, tang malam tadi Allah Taala apai nuan bisi meri jaku tangkan ngagai aku, enda nyagi aku ngemba nuan. 30Aku sigi nemu nuan udah mupuk, laban nuan balat amat keran deka pulai baru ngagai menua nuan empu, tang nama kebuah nuan ngenchuri engkeramba kami sebilik?”

31Disaut Jakop, “Aku takut, laban dalam runding aku, nuan deka ngerampas anak indu nuan ari aku. 32Tang enti nuan tetemuka orang ditu bisi naruh engkeramba nuan, awakka iya diukum bunuh. Awakka bala aku nyadika saksi. Giga lalu ambi aja utai nuan empu.” Nyadi Jakop enda nemu engkeramba Laban nya udah dichuri Rachel.

33Laban lalu mansang ngiga utai nya dalam langkau kain Jakop. Udah nya iya mansang ngagai langkau kain Leah, enggau ngagai langkau kain indu ke ulun ke dua iku, tang iya nadai tetemuka engkeramba nya. Udah nya iya lalu mansang ngagai langkau kain Rachel. 34Nyadi engkeramba sida sebilik nya udah diambi Rachel, lalu disimpan iya dalam kambut ba atas jelu unta, di baruh Rachel ke duduk. Laban nyerungkai langkau kain Rachel, tang nadai tetemuka engkeramba nya. 35Ku Rachel bejaku enggau apai iya, “Anang pedis ati ngagai aku, tuan, ketegal aku ti enda ulih angkat bediri masa nuan. Aku benung datai kain.” Laban begigaka engkeramba nya, tang nadai tetemuka iya.

36Jakop lalu ringat, “Nama penyalah ti udah dikereja aku?” ku iya nanya. “Adat ni ti udah dilanggar aku, ti ngasuh kita begagaika aku baka tu? 37Diatu nuan udah nyerungkai semua utai aku, ni utai nuan ti udah ditemu nuan? Engkahka utai nya di luar ditu ngambika bala nuan enggau bala aku meda utai nya. Awakka sida meri pemutus penemu pasal sapa tua ke ngena. 38Aku udah begulai enggau nuan dua puluh taun. Jelu bedus enggau jelu kambin nuan nadai kala enda beranak, lalu aku nadai kala makai bedus ti lelaki ari raban bedus nuan. 39Genap kali jelu bedus nuan diempa jelu babas, aku nadai kala mai bangkai jelu nya ngagai nuan, tang nganti jelu nya, laban nuan empu udah mejalka aku nganti semua utai ti dichuri orang lebuh siang tauka malam hari. 40Aku suah udah merinsa natka diri laban panas lebuh siang hari, lalu natka diri chelap lebuh malam hari. Aku suah enda ulih tinduk. 41Nya meh gaya pengidup aku dalam dua puluh taun aku ke begulai enggau nuan. Empat belas taun aku bekereja ngulihka anak indu nuan ke dua iku nya, enggau enam taun ngulihka raban jelu nuan. Tang taja pia, nuan ngubah gaji aku sepuluh kali. 42Enti Allah Taala aki ini aku, Allah Taala ke disembah Abraham seduai Isak, nadai enggau aku, nuan tentu udah muru aku pulai puang. Tang Allah Taala udah meda penusah aku, enggau pengawa ti udah dikereja aku, lalu malam tu tadi Iya udah meri atur.”

Sempekat Entara Jakop Enggau Laban

43Ku Laban nyaut Jakop, “Sida ke indu tu endang anak aku. Anak sida endang enggi aku, lalu raban jelu tu endang enggi aku. Iya ti bendar, semua utai ti dipeda nuan ditu, endang enggi aku magang. Tang laban aku enda ulih ngetanka anak indu enggau anak sida, 44aku sedia deka ngaga siti sempekat enggau nuan. Nya alai, aram tua ngaga siti tugung batu, kena tua ngingatka sempekat tua.”

45Nya alai Jakop ngambi sigi batu lalu nirika batu nya nyadika batu pengingat. 46Iya lalu ngasuh bala iya ngumpul batu lalu nugungka batu nya. Udah nya sida lalu makai ngimbai tugung batu nya. 47Laban ngumbai tugung batu nya Jegar Sahadusta, tang Jakop ngumbai tugung batu nya Galeed. 48Ku Laban bejaku enggau Jakop, “Tugung batu tu deka nyadika batu pengingat tua.” Nya kebuah endur nya dikumbai Galeed. 49Ku Laban mega bejaku, “Awakka TUHAN ngemataka tua lebuh tua beserara ari pangan diri.” Nya alai endur nya mega dikumbai Mispah. 50Ku Laban nampung jaku iya, “Enti nuan merinsaka anak aku, tauka jadi enggau indu bukai, taja pen aku enda nemu pasal utai nya, nuan enda tau enda ingat, Allah Taala ngemataka tua. 51Tu batu ti udah ditugungka aku entara tua, lalu tu batu pengingat. 52Tugung batu tu, enggau tiang batu pengingat tu kena nulung tua ingat. Aku enda tau mansang ngelui tugung batu tu nyerang nuan, lalu nuan enda tau sekali-kali mansang ngelui batu pengingat tu nyerang aku. 53Allah Taala ke disembah Abraham enggau Allah Taala ke disembah Nahor deka ngakim tua.” Udah nya, Jakop lalu besumpah dalam nama Allah Taala ti disembah apai iya, Isak, madahka diri deka ingatka semaya nya. 54Iya munuh siku jelu nyadika piring ba atas bukit nya, lalu iya mai bala iya makai jelu nya. Lebuh sida udah badu makai, sida lalu bemalam ba bukit nya. 55Tumu pagi hari siti, Laban nyium bala uchu iya, enggau anak indu iya, merekatka sida, mupuk lalu pulai ngagai menua iya empu.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index