Search form

Pemungkal 41

Josep Nerangka Reti Mimpi Raja

1Dua taun udah bekau nya, raja menua Ejip bemimpi asai ke bediri ba tebing Sungai Nile, 2lalu tujuh iku sapi ti indu ke gemu sereta manah gaya, pansut ari sungai nya, lalu belabuh ngulam rumput. 3Udah nya tujuh iku sapi ti bukai pansut. Sida tu kurus, datai ke tulang sida nyau ayan. Sida datai lalu bediri ngimbai sapi ti bukai nya ba tebing sungai nya. 4Sapi ti kurus nya lalu makai sapi ti gemu. Udah nya raja lalu tedani. 5Iya tinduk baru, lalu bemimpi baru. Tujuh iti tangkai gandum ti perisi sereta mansau bisi ba sebatang gandum. 6Udah nya tujuh iti tangkai gandum ti bukai tumbuh. Sida tu upang sereta layu laban sida dipuputka ribut ti datai ari menua puang. 7Tangkai tujuh iti ti upang nya lalu nelan tujuh iti tangkai ti perisi. Raja lalu tedani. Nya baru iya nemu diri udah bemimpi. 8 Pagi nya iya irau ati. Nya alai iya mesanka semua orang ke tau keramat, enggau semua orang ke bepenemu-dalam di menua Ejip. Iya madahka mimpi iya ngagai sida, tang nadai siku sida ulih nerangka reti mimpi nya ngagai iya.

9Udah nya orang ke mai mangkuk wain raja lalu bejaku enggau raja, “Aku enggai enda ngaku sehari tu, aku udah salah. 10Nuan udah ringat ngagai kepala orang ke ngaga roti, enggau ngagai aku, lalu nutup kami duai dalam rumah jil, ba rumah kepala orang ke nyaga istana. 11Nyadi sekali, kami duai sama bisi mimpi, lalu mimpi nya enda sebaka reti. 12Siku orang Hebrew, ti agi biak umur, bisi dia enggau kami. Iya tu nyadi kepala ulun ke orang ke nyaga istana. Kami duai madahka mimpi kami duai ngagai iya, lalu iya nerangka reti mimpi nya ngagai kami duai. 13Utai ti ku iya udah nyadi magang. Nuan udah ngasuh aku pulai baru ngagai pengawa aku, lalu kepala orang ke ngaga roti ke raja, udah dibunuh.”

14Raja lalu mesanka Josep. Josep lalu tekala nya dibai ari rumah jil. Lebuh iya udah ngukur ragum iya, lalu nukar gari iya, iya lalu mansang betemu enggau raja. 15Raja lalu bejaku enggau iya, “Aku bisi mimpi, tang nadai siku orang ulih nerangka reti mimpi nya. Orang bisi udah madahka nuan nemu nerangka reti mimpi.”

16Disaut Josep, “Aku enda nemu nerangka reti mimpi, Tuan Raja, tang Allah Taala deka nerangka reti mimpi nya enggau betul.”

17Ku raja, “Aku bemimpi asai ke bediri ba tebing Sungai Nile, 18lalu tujuh iku sapi ti indu ke gemu sereta manah gaya, pansut ari sungai nya, lalu belabuh ngulam rumput. 19Udah nya tujuh iku agi sapi ti indu pansut. Sida tu kurus datai ke sida nyau ayan tulang. Nadai aku kala meda sapi ngemalat nya kurus di menua Ejip. 20Sapi ti kurus nya lalu makai sapi ti gemu, 21tang nadai orang nemu nya udah nyadi, laban sapi ti kurus nya agi mengkang kurus baka ke sebedau nya. Udah nya aku lalu tedani. 22Aku mega bemimpi meda tujuh iti tangkai gandum ti perisi sereta mansau ba siti batang gandum. 23Udah nya tujuh iti tangkai gandum tumbuh. Tangkai tu upang sereta layu laban sida dipuputka ribut ti datai ari menua puang. 24Tangkai gandum ti upang nya lalu nelan tangkai gandum ti perisi. Aku udah madahka mimpi nya ngagai orang ke tau keramat, tang nadai siku sida ulih nerangka reti mimpi nya ngagai aku.”

25Ku Josep bejaku enggau raja, “Mimpi dua bengkah nya sama sebaka reti. Allah Taala udah madahka ngagai nuan utai ti deka dikereja Iya. 26Sapi tujuh iku ti gemu nya tujuh taun, lalu tujuh iti tangkai gandum ti perisi nya mega tujuh taun. Utai nya sama sebaka reti. 27Sapi tujuh iku ti kurus nya, ti datai dudi, enggau tujuh iti tangkai gandum ti upang nya tujuh taun lapar pungkang. 28Utai tu munyi ti udah dipadahka aku ngagai nuan: Allah Taala udah madahka ngagai nuan utai ti deka dikereja Iya. 29Dalam tujuh taun, orang deka bulih mayuh utai di serata menua Ejip. 30Udah nya, tujuh taun lapar pungkang deka nyadi, datai ke orang nyau nadai agi teingatka taun sida bulih utai, laban lapar pungkang nya deka ngerusak menua tu. 31Orang nyau enda agi teingatka maya sida udah bulih utai, laban lapar pungkang ti ngentudika nya deka balat amat ngasuh sida merinsa. 32Mimpi nuan ti betandu baka nya, nunjukka utai tu udah diletak Allah Taala, lalu Iya deka ngasuh utai nya nyadi enda lama da agi.

33“Diatu nuan patut milih orang siku ti pintar sereta bepenemu-dalam, lalu ngasuh iya nyadi tuai megai menua tu. 34Nuan mega enda tau enda ngeletak bala pemesai ti bukai, lalu ngambi dua puluh peratus ari semua utai ti ulih ari umai, dalam tujuh taun sida ke bulih utai. 35Asuh sida ngumpul semua pemakai nya dalam taun orang ke bulih utai ti deka datai tu, lalu beri sida kuasa nyimpan gandum nya dalam semua nengeri, lalu nyaga utai nya. 36Pemakai nya deka digalau ke menua tu, ngambika bisi diempa dalam tujuh taun lapar pungkang nya nyadi di menua Ejip, ngambika orang mayuh enda mati keberuran.”

Josep Diletak Nyadi Gabenor Menua Ejip

37Raja enggau bala pemesai iya lalu ngemendarka pelan nya, 38lalu ku raja bejaku enggau sida, “Kitai nadai nemu orang bukai ke patut agi ari Josep, ke bisi roh Allah Taala.” 39Ku raja bejaku enggau Josep, “Allah Taala udah mandangka semua utai tu ngagai nuan. Nya alai nuan terang amat lebih agi bepenemu-dalam sereta dalam agi runding ari semua orang bukai. 40 Aku deka ngasuh nuan nyadi kepala megai menua aku, lalu semua nembiak aku deka ngasi magang ke atur nuan. Nuan deka bekuasa nyadi lumur dua aku. 41Aku diatu ngeletak nuan nyadi gabenor ke semua menua Ejip.” 42 Raja nya lalu merurutka tinchin ari tunjuk iya. Ba tinchin tu bisi dituliska chop diraja. Iya lalu ngerasukka tinchin nya ba tunjuk Josep. Iya ngerasukka kain linin ti alus ba Josep, lalu ngerasukka tenggak emas ba rekung Josep. 43Iya meri Josep kerita perang diraja ti lumur dua, lalu bala soldadu ke nyaga Josep bejalai dulu ari iya enggau panjung, “Anang mempang! Anang mempang!” Nya meh jalai iya ngeletak Josep nyadi gabenor ke semua menua Ejip. 44Ku raja bejaku enggau Josep, “Aku tu raja, lalu nadai orang dalam menua Ejip tau ngangkatka jari tauka kaki enti aku enda ngemendarka iya.” 45-46Iya meri Josep nama orang Ejip, Sapenat-paniah, lalu iya meri Josep siku bini, Asenat, anak Potipera, siku imam di nengeri Heliopolis.

Umur Josep tiga puluh taun lebuh iya berengkah bekereja ke raja menua Ejip. Iya mupuk ari istana raja, lalu bejalai nengah serata menua Ejip. 47Mayuh amat asil ulih di menua nya dalam kandang tujuh taun. 48Semua utai nya digumpul lalu disimpan Josep dalam semua nengeri. Utai ti ulih ari umai ti ngelingi genap buah nengeri, disimpan iya dalam nengeri nya empu. 49Gandum ti digumpul endang amat mayuh, datai ke Josep nyau badu agi nakar utai nya. Pemayuh gandum nya nyau baka pasir ti ba tebing tasik.

50Sebedau lapar pungkang nyadi, Josep bisi dua iku anak lelaki diadaka Asenat. 51Ku Josep, “Allah Taala udah ngasuh aku badu agi ingatka pemerinsa aku, enggau pemerinsa ruang bilik apai aku.” Nya alai iya meri nama Manasi ngagai anak iya ke tuai. 52Ku iya mega bejaku, “Allah Taala udah meri aku anak lelaki, dalam menua ti alai aku kena perinsa.” Nya alai iya meri nama Epraim ngagai anak iya ke lumur dua.

53Tujuh taun alai orang di menua Ejip bulih utai pen apus, 54 lalu tujuh taun lapar pungkang belabuh nyadi, munyi ti udah dipadahka Josep. Semua menua bukai kena magang laban lapar pungkang nya, tang menua Ejip enda suntuk pemakai. 55 Lebuh orang Ejip belabuh natka diri lapar, sida minta pemakai ngagai raja. Iya lalu ngasuh sida mansang ngagai Josep, sereta ngasuh sida ngereja utai ti diasuh Josep. 56Lapar pungkang nya nyau mansang balat-sebalat, lalu ngelekai ngagai semua menua nya. Nya alai Josep muka semua tibang gandum, lalu nyual gandum nya ngagai orang Ejip. 57Orang ari serata dunya datai ngagai menua Ejip, mansang meli gandum ari Josep, laban lapar pungkang balat amat nyadi di semua endur.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index