Search form

Pemungkal 45

Josep Madahka Diri Ngagai Bala Menyadi Iya

1 Josep nyau enda ulih natka ati diri agi di mua bala orang gaji iya. Nya alai iya lalu ngasuh semua ulun iya pansut ari bilik nya. Nadai orang bukai bisi enggau iya dia lebuh Josep madahka diri ngagai sida menyadi iya. 2Iya nyabak inggar amat, datai ke orang Ejip nyau tedingaka iya, lalu berita nya dibai ngagai istana raja. 3Ku Josep bejaku enggau bala menyadi iya, “Aku tu Josep. Kati apai agi idup?” Tang lebuh bala menyadi iya ninga nya, sida balat amat takut, datai ke sida nyau enda ulih nyaut iya. 4Udah nya Josep lalu bejaku enggau sida, “Datai semak agi ngagai aku.” Sida mansang semak agi ngagai iya, lalu ku iya, “Aku tu Josep, menyadi kita ke dijual kita ngagai menua Ejip. 5Anang tusah ati tauka ngutuk diri ketegal kita udah nyual aku kitu. Allah Taala udah ngasuh aku datai ditu dulu ari kita ngambika ngidupka nyawa orang mayuh. 6Diatu lapar pungkang baru dua taun udah nyadi di menua tu. Lapar pungkang tu deka majak lima taun da agi. Dalam kandang maya nya, nadai orang ngeradu tanah umai, tauka ngetau. 7Allah Taala udah ngasuh aku datai ditu dulu ari kita, ngambika ngidupka nyawa kita ngena chara ti nyelai tu, kena nentuka kita enggau peturun kita idup. 8Nya alai, iya ti bendar, ukai kita ke ngirumka aku kitu, tang Allah Taala. Iya udah ngaga aku nyadi pemesai ti pemadu tinggi pangkat dalam perintah raja. Aku tu nyadi tuai ngemataka semua menua tu. Aku tu meh orang ke merintah semua menua Ejip.

9 Nya alai, pulai kita enggau jampat ngagai apai, lalu padahka ngagai iya utai ti disebut anak iya Josep: ‘Allah Taala udah ngasuh aku megai perintah di menua Ejip. Datai ngagai aku kitu enggau naka pengelengkas. 10Nuan tau diau di menua Gosen, ngambika kita diau semak aku - nuan, bala anak nuan, bala uchu nuan, raban bedus nuan, kambin nuan, jelu sapi nuan, enggau semua utai ti dikemisi nuan. 11Enti nuan diau di Gosen, aku ulih ngintu nuan. Lapar pungkang tu deka majak nyadi lima taun da agi, lalu aku enggai ke nuan, kita sebilik, enggau raban jelu tupi nuan, mati keberuran.’ ”

12Ku Josep nampung jaku iya, “Diatu semua kita, enggau nuan empu Benjamin, udah meda aku lalu nemu aku tu endang amat Josep. 13Padahka ngagai apai pemesai kuasa aku di menua Ejip, lalu padahka ngagai iya semua utai ti udah dipeda kita. Udah nya bai iya kitu enggau jampat.”

14Iya lalu merap menyadi iya Benjamin, lalu nyabak. Benjamin mega merap iya, lalu nyabak. 15Udah nya, lebuh iya agi benung sikuk-sikuk nyabak, iya lalu merap genap iku bala menyadi iya, lalu nyium sida. Udah nya, bala menyadi iya lalu berandau enggau iya.

16Lebuh berita pasal penatai bala menyadi Josep bisi didinga orang di istana, raja enggau bala pemesai iya gaga ati. 17Ku raja bejaku enggau Josep, “Asuh sida menyadi nuan manggaika utai nya ba jelu sida, lalu pulai baru ngagai menua Kanaan. 18Asuh sida ngambi apai sida, enggau semua sida sebilik, lalu pulai kitu. Aku deka meri ngagai sida menua ti pemadu manah di menua Ejip, lalu sida deka bisi menua ti lebih ari chukup alai sida beridup. 19Asuh bala menyadi nuan mega mai kerita ari menua Ejip, kena ngundan bini anak, enggau apai sida. 20Sida enda tau irau ati ninggalka reta tengkira sida, laban sida deka bempu utai ti pemadu manah di menua Ejip.”

21Bala anak Jakop lalu ngereja utai ti diasuh kereja sida. Josep meri sida kerita, nitihka pesan raja, enggau bekal kena sida di rantau jalai. 22Iya meri sida gari kena besilih, tang meri ngagai Benjamin tiga ratus singkap pirak, enggau lima lambar gari kena besilih. 23Iya ngirumka barang ti pemadu manah ari menua Ejip, ti diundan ke iya ba sepuluh iku keledai. Iya mega ngundanka gandum, roti, enggau bekal ti bukai ke sida ba sepuluh iku keledai ti bukai. 24Iya lalu ngasuh sida menyadi iya mupuk, lalu ku iya bejaku enggau sida lebuh sida bekejang, “Anang belaya di rantau jalai.”

25Sida angkat ari menua Ejip, lalu pulai ngagai Jakop, apai sida di menua Kanaan. 26Lalu ku sida madahka ngagai Jakop, “Josep agi idup! Iya nyadi gabenor menua Ejip!” Jakop lalu temati-kutu enda arapka sida.

27Tang lebuh sida madahka semua utai ti udah disebut Josep ngagai sida, lalu iya mega meda semua kerita ti dikirumka Josep kena mai iya ngagai menua Ejip, nya baru iya enda agi temati-kutu tekenyit ati. 28“Anak aku Josep agi idup!” ku iya bejaku. “Nya aja meh utai ti dipinta aku! Aku enda tau enda betemu enggau iya sebedau aku mati.”

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index