Search form

Adat Lewi 18

Pengawa Beleman Ti Enda Tau Dikereja

1Ku TUHAN bejaku ngagai Moses 2“Sebut ngagai orang Israel, Aku tu TUHAN Allah Taala kita. 3Anang ngereja utai baka ke dikereja orang di menua Ejip, alai kita ke idup menya, tauka utai ti dikereja orang di menua Kanaan, ti alai Aku deka mai kita diatu. 4Titihka adat Aku, lalu kereja utai ti diasuh Aku. Aku tu TUHAN Allah Taala kita. 5 Titihka atur enggau adat ti diberi Aku ngagai kita. Kita deka ngidupka nyawa diri enti kita ngereja utai nya. Aku tu TUHAN.”

6TUHAN meri adat tu: Anang beleman enggau kaban belayan diri empu. 7Anang beleman enggau indai diri empu, laban nya ngemaluka apai nuan. Nuan enda tau ngemaluka indai nuan empu. 8 Anang beleman enggau indu simpan apai nuan, laban nya ngemaluka apai nuan. 9 Anang beleman enggau menyadi indu nuan, tauka menyadi indu tiri nuan, nemuka iya sebilik enggau nuan kenyau ari mit, tauka enda. 10Anang beleman enggau uchu indu nuan, laban nya deka ngemaluka nuan. 11Anang beleman enggau menyadi indu ke saum apai, tang enda saum indai enggau nuan, laban iya mega menyadi nuan. 12-13 Anang beleman enggau ibu nuan, nemuka iya nya menyadi apai nuan, tauka menyadi indai nuan. 14Anang beleman enggau bini aya nuan, laban iya ibu nuan. 15 Anang beleman enggau menantu indu nuan 16 tauka enggau bini menyadi nuan. 17 Anang beleman enggau anak indu, tauka uchu orang indu ke udah enggau nuan beleman. Kada enda sida nya kaban belayan nuan, lalu ngujungka nuan ngereja pengawa seks ti salah. 18Anang ngambi menyadi bini nuan nyadika bini nuan, seagi-agi bini nuan mengkang idup.

19 Anang beleman enggau indu ke benung datai kain, laban iya enda tuchi. 20 Anang beleman enggau bini orang bukai, laban nya deka ngasuh nuan enda tuchi. 21 Anang nyerahka anak nuan kena nyembah petara Molek, laban nya deka ngemaluka nama Allah Taala, ti TUHAN. 22 Orang lelaki enda tau beleman enggau orang ke sama lelaki. Allah Taala begedika pengawa nya. 23 Lelaki tauka indu enda tau beleman enggau jelu. Pengawa ti jai nya deka ngasuh nuan enda tuchi.

24Anang ngamahka diri ngena semua kereja nya, laban nya chara orang bansa bukai ngaga diri enda tuchi, iya nya bansa orang ke diau di menua nya dulu ari kita, ke diburu TUHAN, ngambika kita ulih tama ngagai menua nya. 25Utai ti dikereja sida ngasuh menua nya enda tuchi. Nya kebuah TUHAN ngukum menua nya lalu ngasuh menua nya nulak orang ke diau dia. 26-27Sida ngereja semua utai ti jai nya, lalu ngasuh menua nya enda tuchi. Tang kita enda tau ngereja utai nya. Semua bala kita, nemuka kita nya bansa orang Israel, tauka orang kampar ti diau begulai enggau kita, kita enda tau enda ngasika atur enggau adat TUHAN. 28Nya baru menua nya enda nulak kita, baka iya ti nulak orang bansa bukai ke udah diau dia dulu ari kita. 29Kita nemu, barang sapa ngereja utai ti jai tu, deka badu agi dikumbai nembiak Allah Taala.

30Nya alai titihka semua pesan ti diberi Aku ngagai kita, lalu anang ngereja utai ti dikereja orang ke dulu agi diau di menua nya ari kita. Anang ngereja semua utai nya lalu ngaga diri enda tuchi. Aku tu TUHAN Allah Taala kita.”

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index