Search form

Penyampau 21

Menang Ngelaban Orang Kanaan

1 Lebuh raja menua Kanaan, ke merintah di Arat, di selatan menua Kanaan, ninga orang Israel deka datai nengah Atarim, iya nyerang sida, lalu nangkap sekeda orang Israel. 2Orang Israel lalu besumpah enggau TUHAN, ku sida, “Enti Nuan deka nyerahka orang nya ngagai kami, kami deka ngerusak nengeri sida.” 3TUHAN ninga sida, lalu nyaup sida ngalahka orang Kanaan. Nya alai orang Israel ngeluska orang Kanaan, sereta ngerusak nengeri sida, lalu ngumbai endur nya Hormah.

Ular Temaga

4 Orang Israel lalu angkat ari Bukit Hor, nengah jalai ti nuju ngagai Teluk Akaba, ngelaungka menua Edom. Tang di rantau jalai, orang mayuh nyau enda liat ati agi, 5 lalu bejaku ngelaban Allah Taala enggau ngelaban Moses, ku sida, “Nama kebuah nuan mai kami pansut ari menua Ejip lalu nejuka kami mati di menua puang tu, ba endur ti nadai pemakai, nadai ai tu? Kami nyau leju makai pemakai ti enda nyamai tu!” 6Udah nya TUHAN lalu ngasuh ular ti bisa datai ngagai orang mayuh. Ular nya lalu mantuk sida, lalu mayuh amat sida mati. 7Orang mayuh lalu mansang ngagai Moses, lalu bejaku, “Kami udah bedosa laban kami udah bejaku ngelaban TUHAN, enggau ngelaban nuan. Besampi ngagai TUHAN minta Iya muai ular tu.” Moses lalu besampika orang mayuh. 8Udah nya, TUHAN lalu ngasuh Moses ngaga siku ular ari temaga, lalu nuatka ular nya ngena siti tiang; barang sapa kena pantuk ular, deka merening ngagai ular nya, lalu gerai. 9 Nya alai Moses ngaga siku ular ari temaga, lalu nuatka ular nya ngena tiang; lalu barang sapa dipantuk ular, deka merening ngagai ular temaga nya, lalu digeraika.

Ari Bukit Hor Ngagai Emperan Menua Moap

10Orang Israel lalu mindah ari endur nya, lalu nirika kem sida di Obot. 11Sida angkat ari Obot, lalu nirika kem sida ba tembawai Abarim, di menua puang ti muak ke timur menua Moap. 12Udah nya sida nirika kem sida ba Emperan Seret. 13Ari Seret sida mindah baru, lalu nirika kem sida ba tebing utara Sungai Arnon, di menua puang ti nganchau ngagai menua orang Amor. (Nyadi Sungai Arnon nya nyadika garis entara menua orang Moap enggau orang Amor.) 14Nya kebuah Bup Pasal Perang TUHAN bisi ngenang pasal “...nengeri Wahep ti dalam kandang menua Supah, enggau lebak Arnon, 15enggau serimbing lebak ti nyentuk ngagai nengeri Ar, enggau ngagai garis entara menua Moap.”

16Ari nya sida angkat lalu bejalai ngagai endur siti ti dikumbai Beer. Dia TUHAN bejaku ngagai Moses, “Gempuruka orang mayuh, laban Aku deka meri sida ai.” 17Udah nya orang Israel nyanyi lagu tu:

“Telaga, pansutka ai nuan;

Nya baru kami deka nyambut iya ngena lagu:

18Telaga ti udah ditumbak bala raja

Sereta ditumbak bala tuai orang mayuh,

Ditumbak ngena tungkat diraja

Enggau ngena tungkat sida.”

Sida mindah ari menua puang nya ngagai Matanah, 19lalu ari Matanah sida bejalai ngagai Nahalil, lalu ari Nahalil ngagai Bamot, 20Ari Bamot ngagai lebak ti di menua Moap, di baruh tuchung Bukit Pisgah, ti ngadap ngagai menua puang.

Menang Ngelaban Raja Sihon Enggau Raja Og

(Ulang Adat 2.26-3.11)

21Udah nya orang Israel lalu ngasuh bala seruan betemu enggau Sihon, raja orang Amor. 22“Kami minta nuan ngemendarka kami nengah menua nuan. Kami enggau raban jelu tupi kami enda limpang ari jalai raya, lalu enda ngelunjak umai tauka kebun anggur kita, lalu kami enda mega ngirup ai ari telaga kita. Kami deka semina bejalai nengah jalai raya aja datai ke kami udah meraka garis entara menua kita.” 23Tang Sihon enggai ngemendarka orang Israel bejalai nengah menua iya. Iya ngempuruka bala soldadu iya, lalu mansang ngagai Jahas di menua puang, lalu nyerang orang Israel dia. 24Tang orang Israel munuh mayuh amat bala soldadu Raja Sihon dalam perang nya, lalu nguan menua iya belabuh ari Sungai Arnon nyentuk ngagai Jabok di utara, iya nya, ngagai menua orang Amon, laban garis entara menua orang Amon balat amat dijaga. 25Nya alai, orang Israel ngalahka semua nengeri orang Amor, nyengkaum Hesbon, enggau semua nengeri ti mit ti ngelingi nengeri nya, lalu sida nguan semua nengeri nya. 26Nyadi Hesbon nya indu nengeri Raja Sihon ti nyadi raja orang Amor, ti udah beperang ngelaban raja menua Moap dulu menya, lalu udah ngalahka semua menua raja nya nyentuk ngagai Sungai Arnon. 27Nya kebuah orang ke landik belagu nyanyi munyi tu,

“Datai ngagai Hesbon, ngagai nengeri Raja Sihon!

Kami deka meda nengeri nya digaga baru, lalu digaga baka iya ti dulu.

28 Dulu menya, ari nengeri tu

bala soldadu Sihon udah nyelar baka api.

Iya ngerusak nengeri Ar di Moap

lalu makai menua ti bukit ba ulu Sungai Arnon.

29Tulah kita orang Moap!

Kita ti nyembah Kemos deka dirusak!

Petara kita nejuka orang ke lelaki tasah.

Lalu sida ke indu ditangkap raja orang bansa Amor.

30Tang diatu peturun sida nya benung dirusak,

Di rantau jalai kenyau ari Hesbon nyentuk ngagai Dibon,

Kenyau ari Nasim nyentuk ngagai Nopah, ti semak Medeba.”

31Nya alai orang Israel ngentapka diri di menua orang Amor, 32lalu Moses ngasuh orang ngiga jalai ti pemadu nyamai ditengah mansang nyerang nengeri Joser. Orang Israel ngalahka nengeri nya, enggau nengeri ti mit ti ngelingi nengeri nya, lalu muru orang Amor ti diau dia.

33Udah nya orang Israel nguing lalu bejalai nengah jalai ti nuju ngagai Basan, lalu Raja Og ti nyadi raja dia enggau bala soldadu iya angkat lalu nyerang sida di Edrei. 34Ku TUHAN bejaku ngagai Moses, “Anang takutka iya laban Aku udah nyerahka iya ngagai jari nuan, sama enggau semua bala nembiak iya, sereta enggau semua menua iya. Kereja ngagai iya baka ke udah dikereja nuan ngagai Sihon, raja orang Amor ke merintah di Hesbon.” 35Nya alai orang Israel munuh Og, bala anak lelaki iya, enggau semua nembiak iya. Nadai siku sida ditejuka idup. Udah nya orang Israel lalu nguan menua iya.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index