Search form

Penyampau 22

Raja Orang Moap Minta Balaam Datai

1Orang Israel angkat ari endur nya lalu nirika kem sida ba emperan menua Moap, tunga ke timur Sungai Jordan, di seberai Jeriko.

2Lebuh Balak anak Sipur, ti nyadi raja orang Moap, ninga pasal utai ti udah dikereja orang Israel ngagai orang Amor, enggau pasal pemayuh tubuh orang Israel, 3iya enggau semua nembiak iya lalu balat amat takut. 4Orang Moap lalu bejaku enggau bala tuai orang Midian, “Enda lama da agi bala orang tu deka ngerusak semua utai ti ngelingi kitai, indah-indah baka sapi ti ngulam ba padang.” Nya alai Raja Balak 5 lalu ngasuh seruan iya madahka Balaam anak Beor, ti diau di Petor semak Sungai Eupratis di menua Amaw. Baka tu ku pesan ti dibai sida ari Balak: “Aku madahka ngagai nuan: siti bansa udah datai ari menua Ejip. Bansa orang nya nyau ngachir di semua endur, lalu nguji ngerampas menua kami. 6Sida iya mayuh agi tubuh ari kami. Nya alai, aku minta nuan datai, lalu nyumpah sida ke aku. Nyangka ukur kami ulih ngalahka sida lebuh sida udah kena sumpah, lalu muru sida ari menua kami. Aku nemu, lebuh nuan merekatka orang, orang nya bulih berekat, lalu lebuh nuan nyumpah orang, orang nya ditinggang sumpah.”

7Nya alai tuai orang Moap enggau tuai orang Midian mai upah kena meli jaku sumpah nya, mansang ngagai Balaam, lalu meri pesan Balak ngagai iya. 8Ku Balaam bejaku enggau sida, “Aku minta kita bemalam ditu malam tu. Pagila baru aku madahka utai ti dipadahka TUHAN ngagai aku.” Nya alai bala tuai orang Moap lalu bemalam enggau Balaam.

9Allah Taala datai ngagai Balaam lalu nanya iya, “Sapa orang nya ke bemalam enggau nuan?”

10Disaut Balaam, “Raja Balak orang Moap udah ngasuh sida madahka ngagai aku 11pasal siti bansa ti udah datai ari menua Ejip, lalu udah ngachir di serata menua iya. Iya minta aku nyumpah orang nya, ngambika iya ulih ngelaban sida, lalu muru sida ari menua iya.”

12Ku Allah Taala bejaku enggau Balaam, “Anang mupuk enggau sida, lalu anang nyumpah orang Israel, laban Aku udah merekatka sida.”

13Pagi hari siti Balaam dani lalu bejaku ngagai bala seruan Balak, “Pulai meh kita. TUHAN enda ngasuh aku mupuk enggau kita.” 14Nya alai sida pulai ngagai Balak, lalu madahka pasal Balaam ke enggai enggau sida. 15Udah nya Balak lalu ngasuh mayuh agi bala tuai bansa, ti tinggi agi pangkat ari sida ke dulu, betemu enggau Balaam. 16Sida mansang ngagai Balaam, lalu meri pesan tu ari Balak, “Anang enda datai! 17Aku deka meri nuan upah ti besai, lalu ngereja sebarang utai ti dipinta nuan. Datai kitu, lalu sumpah orang nya ke aku.”

18Tang disaut Balaam, “Enti sema Balak meri aku semua pirak enggau emas dalam istana iya, enggai meh aku ngelaban pesan TUHAN Allah Taala aku. Indah ba pekara ti pemadu mit deh aku enggai. 19Tang aku minta kita bemalam ditu, baka sida ke dulu, ngambika aku tau nemu enti TUHAN bisi utai bukai ti deka dipadahka Iya ngagai aku.”

20Malam nya Allah Taala datai ngagai Balaam, lalu bejaku, “Enti bala orang tu datai laban sida minta nuan mupuk enggau sida, sedia meh nuan, tang nuan semina ngereja utai ti diasuh Aku.” 21Nya alai, pagi hari siti Balaam nyendiaka keledai iya, lalu mupuk enggau bala tuai orang Moap.

Balaam Enggau Keledai Iya

22Tang Allah Taala ringat laban Balaam mupuk enggau sida, lalu lebuh Balaam benung mupuk ngena keledai iya, disempulang dua iku orang gaji iya, siku melikat TUHAN bediri ba tengah jalai raya nya, lalu mempang iya. 23Lebuh keledai Balaam meda melikat nya bediri dia megai pedang, iya limpang ari jalai raya nya, lalu nguing ngagai padang. Balaam malu keledai iya, lalu nguingka keledai nya pulai baru ngagai jalai raya. 24Udah nya, melikat nya lalu bediri ba jalai ti sempit, ba entara dua belah kebun anggur, ti bisi dinding batu ari sepiak-sepiak. 25Lebuh keledai nya meda melikat nya, iya lalu bejalai ngembing dinding batu nya, lalu ngempitka kaki Balaam ngagai dinding nya. Balaam lalu malu keledai nya baru. 26Udah nya, melikat nya bejalai dulu baru lalu bediri ba endur ti sempit, ti nadai alai begelih. 27Nyadi sekali tu, lebuh keledai nya meda melikat nya, iya gali. Balaam ringat, lalu belabuh malu keledai nya ngena tungkat iya. 28Udah nya TUHAN lalu meri keledai nya kuasa bejaku, lalu ku keledai nya bejaku ngagai Balaam, “Nama utai ti udah dikereja aku ba nuan, datai ke nuan nyau malu aku tiga kali?”

29Ku Balaam nyaut keledai nya, “Laban nuan udah ngemelika aku! Enti sema aku bisi pedang, aku tetap deka munuh nuan.”

30Ku keledai nya nyaut, “Kati aku tu ukai keledai ti ditepan nuan seumur idup? Kati aku bisi udah kala ngaga nuan baka tu suba?”

“Nadai kala,” ku Balaam nyaut.

31Udah nya, TUHAN ngasuh Balaam meda melikat ke bediri dia megai pedang iya. Balaam lalu nyungkurka diri ke tanah. 32Melikat nya lalu nanya Balaam, “Nama kebuah nuan malu keledai nuan tiga kali baka nya? Aku datai laban aku deka mempang jalai nuan, laban nuan enda tau kin. 33Tang keledai nuan ulih meda aku, lalu limpang ari jalai raya tiga kali. Enti iya enda limpang, aku tetap udah munuh nuan, tang enda munuh keledai nya.”

34Disaut Balaam, “Aku udah bedosa. Aku enda nemu nuan bisi bediri ba jalai raya deka ngelaban aku. Tang enti nuan ngumbai aku salah ketegal aku udah mupuk, pulai meh aku.”

35Tang ku melikat nya bejaku, “Mupuk meh nuan enggau sida, tang nuan semina nyebut utai ti diasuh aku sebut nuan.” Nya alai Balaam mupuk enggau sida.

Balak Nyambut Penatai Balaam

36Lebuh Balak ninga Balaam nyau deka datai, iya mansang ngambat iya di Ar, nengeri ti ba tebing Sungai Arnon, ba entara menua enggau Moap. 37Ku Balak bejaku enggau Balaam, “Nama kebuah nuan enda datai lebuh aku mesanka nuan terubah iya? Kati nuan ngumbai aku enda ulih ngupah nuan?” 38Disaut Balaam, “Diatu aku udah datai, ukai enda? Tang nama kuasa aku? Aku semina ulih nyebut utai ti diasuh Allah Taala sebut aku.” 39Nya alai Balaam bejalai enggau Balak ngagai nengeri Husot. 40Dia Balak lalu nyayat jelu sapi enggau bedus, lalu meri sekeda dagin jelu nya ngagai Balaam, enggau ngagai bala tuai ke bejalai enggau iya.

Jaku Benabi Ti Keterubah Ari Balaam

41Pagi hari siti, Balak mai Balaam mansang ngagai Bamot-baal. Ari endur nya Balaam ulih meda sebagi ari bala orang Israel.

Bup Kudus

Hakcipta © 2011, The Bible Society of Malaysia

Copyright © 2011, The Bible Society of Malaysia

More Info | Version Index