Search form

Yai 1

Kotero Jo me Isirael kirac i Misiri

1- Magi en nying awobe ka Yakobo kame bin oupere kede ot Misiri, ngat acelacel kede jo me ode: 2Ruben, Simeon, Lebi, Yuda, 3Isakar, Sebulun, Benjamin, 4Dan, Naputali, Gad kede Aser. 5Idwe kede ikwae ka Yakobo dedede bin tie ot kanyaare. Wode Yosepu oudo tie Misiri cuto. 6Ingei kare moro Yosepu kede imiegu mege, kede jo apat dedede me lwak gi oko totoun. 7- Do ikwae gi, gin jo me Isirael, oudo nywal twatwal; gin kiko nyai di kiko doko tek, omio kiko pongo lobo me Misiri.

8- Di do abaka ace koudo likame ngeo Yosepu oko doko ngapug me Misiri. 9En eko waco ne jo mege be, “Nenunu, jo me Isirael odoko tot twatwal, doko kitek kalamo wa. 10- Ka yi moro opoto, cengemogo kiromo konyo jokwor yi kede wa di do kiko yai kibwot kia lobo wa. Pi manono, poore ongolenu gi rieko moro.” 11Aso, jo me Misiri oko keto negi jo kame kwao ipasoi pi tidilo gi kede tic atek. Gin kiko gero ne Parao bomban me Pitom kede Rameses pi bedo bomban me kano cam. 12Do bed bala oudo kotie tero gi kirac, jo me Isirael oko medo nywal ameda di kiko medo sarakin i lobo nono, manono oko mino jo me Misiri obedo kede lworo i kom gi. 13Jo me Misiri di oko do cako dino jo me Isirael tic kede gero, 14di kimio gi kuo atek kede tic atek me nyono lobo, gono matapali kede tice ace apat me poto. Gin oudo kidio gi timo tice dedede kede gero.

15Di Parao me Misiri oko waco ne mon acolo mon anywal me Iburanian, Sipira kede Pua be, 16“Kame itienu colo mon me Iburanian, nekunu idwe awobe, do idwe anyira iwekunu.” 17Do mon koudo colo jo nogo oudo lworo Rubanga, omio likame gin kiko yei lubo gikame Parao ociko negi, do gin kiko weko idwe awobe obedo kuo. 18Aso Parao oko lwongo mon koudo colo jo nogo di eko penyo gi be, “Pinyo komio itienu timo kamano? Pinyo komio itienu weko idwe awobe dong kuo?”

19Gin kiko dwoko ne be, “Mon me Iburanian likame cal bala mon me Misiri; gin kitek, manono mio gi kinywal di pwodi dano acolo gi likame otuno.” 20Aso Rubanga oko tero mon nogo kiber, di jo me Isirael oko nyai di kiko doko tek. 21Kite kame mon koudo colo jo nogo oudo lworo kede Rubanga, omio Rubanga oko mino gi miere. 22- I cen mere Parao di oko mino jo mege dedede cik be, “Ucunu i yi ecilet me Nail idwe awobe dedede kame Iburanian nywalo, do wekunu idwe anyira dong kuo.”

Baibuli I Leb Kumam

© 2013 Bible Society of Uganda

More Info | Version Index