Search form

Yai 11

Musa Okwenyaro pi To me Idwe Kao

1Di Rwot oko waco ne Musa be, “Ango abino doko medo kelo can acel i kom Parao kede jo me Misiri; ingei manoni en ebino yei ne wu yai, ateteni en ebino riamo wun dedede yai ki kan. 2Nan wac ne jo me Isirael be icuo kede dako acelacel poore penyo ngakio mere pi mine jamini me wel kame kocweo kede saabu kede siliba.” 3Rwot oko mino cuny jo me Misiri obedo yom i kom jo me Isirael. Doko Musa oudo obedo dano apire tek me awora i nyim jotic adongo ka Parao kede i nyim jo me Misiri.

4Musa oko waco ne Parao be, “Rwot owaco be, ‘Tetu esawa me i dier iwor, ango abino bebeo i lobo me Misiri. 5Idwe awobe kao dedede kame tie i lobo me Misiri bino to, cako kibut awobi kao ka Parao, ngat kame poore lunyo kom mere me ajakanut, tuno kede but awobi kao ka apasoit kame tic mere en riego alos kede kidi. Idwe kao me leini me paco da bino to. 6Di koko atek ko bino bedo i lobo me Misiri dedede, kalikame lem pwodi otimere, doko likame ebino medo timere. 7Do akadi ogwok agwoka moro da likame bino gweo ne jo me Isirael arabo ne leini gi. Manono bino mini ingeo be, ango Rwot atieko nyuto apokapoka atie i dierediere me jo me Misiri kede jo me Isirael.’ ” 8Musa oko jiko di ewaco be, “Jotic ni dedede bino bino buta di kiko riebere i nyima di kiwaco be, ‘Okwe, yai kede jo ni iwekunu wa.’ Ingei manono ango abino yai.” Musa oko yai kibut Parao di etie kede twon gero.

9Rwot oko waco ne Musa be, “Parao likame bino yei winyo kop nin, me wek ango ameede timo giaura ace Misiri.” 10Musa kede Aaron otimo giaura nogi i nyim Parao, do Rwot omio Parao obedo ngaepali di likame eko yei ne jo me Isirael yai weko lobo mere.

Baibuli I Leb Kumam

© 2013 Bible Society of Uganda

More Info | Version Index