Search form

Yai 12

Ebaga me Kalamo

1- Rwot oko waco ne Musa kede Aaron i lobo me Misiri be, 2“Duwe noni poore bedo ne wu duwe me agege me mwaka. 3Wacenu jo dedede me Isirael be, i ceng me tomon me duwe noni, won paco acelacel bino kwanyo atin romo pi jo me ode. 4Ka jo me ot moroni nonok likame kisobolo camo atin romo paka tieko, gin kipoore ribere kede ngakio gi di kiko ribo oromo acel, di oko popoko en di lubere kede wel me jo kame poore camo oromo nono. 5Jo twero kwanyo oromo amoto diel icuo, do miero di etie kede mwaka acel, doko di eli kede peko moro i kome. 6Ipoorenu gwoko gi paka i ceng me tomon kiwie ongwon me duwe noni, di do otieno me ceng nono di piny amumusit, jo dedede me Isirael ko bino neko gi. 7Jo poore suto remo i kom ipirin me ikekon kede i malo i wi ikekon me ude kame kocamo iye leini nogo. 8Gin kipoore camo ringo nogo iwor nono; kipoore bulo gi abula di kiko camo gi kede mugati kame arup li iye, karacel kede yen mogo apote gi kec. 9Kur icamunu ringo moro anumu amoto kame kocwako acwaka kede pii, do camunu ringo kame kobulo abula, ribo kiton wi gi kede tien gi kede jamini me yi gi da. 10Kur iwekunu ringo moro dong paka odiko; ka ringo moro odong paka odiko miero iwangenu awanga. 11Ibinunu cam awakawaka di ngat acelacel otieko ngapere engape me yai, kede amuka mere i tiene kede di ebela mere tie i cinge cuto. Manono bino bedo Ebaga me Kalamo kame tie pi wora, ango Rwot.

12“Iwor nono ango abino bebeo i lobo me Misiri, di ako neneko idwe kao me jo kede me leini dedede, doko da abino tidilo rubangan me Misiri; ango en Rwot. 13Remo kame tie i kor ipirin me ikekon bino bedo gianena kame nyuto ude kame wun ibedunu iye. Kame ango aneno remo, abino kalamo ude wu di likame tie can moro kame ko bino poto ne wu i esawa kame ango abino mino kede jo me Misiri alola. 14- Miero wun idonyunu timo ebaga amako ceng noni pi yutuno gikame ango Rwot atimo. Timunu ebaga mere i kare dedede me anyim.”

Ebaga me Mugati kame Kotimo abongo Arup

15Rwot oko waco be, “Ibinunu camo mugati kame kotimo abongo arup pi ceng kanyaare; i ceng me agege ibinunu kwanyo tenge arup ki ude wu, pien ngat kame bino camo mugati kame kotimo kede arup cako i ceng me agege tuno i ceng me kanyaare, kobino riame tenge kibut jo me Isirael. 16I ceng me agege kede i ceng me kanyaare ibinunu riamakin karacel pi wora. Likame tie tic moro kame ipoorenu timo i ceng nogi, kwanyo kenekene iiko ne jo cam kame kipoore camo. 17Ipoorenu yutuno timo ebaga me mugati kame li kede arup, pien i ceng noni ango bin awoto ikodeta wu ki lobo me Misiri. Miero itimunu ebaga me yutuno ceng noni i kare dedede me anyim. 18I duwe me agege, cako otieno me ceng me tomon kiwie ongwon tuno otieno me ceng me ot are kiwie acel, ibinunu camo mugati kame arup li iye. 19Likame arup poore bedo tie i ude wu pi ceng kanyaare; pien ngat kame bino camo mugati kame arup tie iye, kobino riame tenge kibut jo me Isirael, bed bala en ebedo anywali me Isirael arabo ngakumbor. 20Likame ibinunu camo gimoro kame arup tie iye; i kabedo dedede kame wun ibinunu bedo iye ibinunu camo mugati kame arup li iye.”

Ebaga me Kalamo me Agege

21Musa oko lwongo jotel dedede me Isirael di eko waco negi be, “Otunu di ngat acelacel ko yero oromo amoto diel apwodi titidi di eko neko, di jo me miere wu ko tedo Ebaga me Kalamo. 22Jakunu emompir, di ikounu rwake i remo kame tie i awalo, di ikounu kikiro remo nono i kom ipirin me ikekon kede i wi ikekon malo. Likame ngatamoro poore wok ooko tuno piny ru. 23- Pien Rwot oyaro bebeo neneko jo me Misiri, do ka en eneno remo i kor ipirin me ekeko kede i wi ekeko malo, en ebino kalamo ekeko nono di likame eko yei ne Malaika me To donyo i ot nono pi timo nek. 24Miero wun kede idwe wu ilubunu kwer noni nakanaka bala iswil kame kotieko moko. 25Ka itununu i lobo kame Rwot bino mino wu, bala kame en etieko cikere pi timo, miero ilubunu kwer noni. 26Kame idwe wu oko penyo wu be, ‘Dwong me kwer noni en nyo?’ 27wun ibinunu dwoko negi be, ‘Man obedo giayala me Kalamo kame komio me woro Rwot, piento en ekalamo ude me jo me Isirael i Misiri; en eneko jo me Misiri do eko kalamo ude wa likame eneko wa.’ ”

Jo me Isirael oko luro wi gi piny di kiko woro Rubanga. 28Di do gin kiko yai kioto timo gikame Rwot owaco ne Musa kede Aaron.

To me Idwe Kao

29- I dier iwor me ceng nono Rwot oko neko idwe kao dedede i Misiri, cako kibut awobi kao ka Parao tuno kede but awobi kao me lo kame oudo kotweo i otkol, kede idwe kao me leini dedede. 30Parao oko cei i dier iwor, en karacel kede jotic mege adongo karacel kede jo dedede me Misiri; koko atek oko poto i lobo me Misiri lung, pien oudo likame tie paco moro kame to likame opoto iye. 31Iwor nono Parao oko lwongo Musa kede Aaron di eko waco negi be, “Yaunu tenge iwekunu jo na, wun karacel kede jo dedede me Isirael! Otunu iworunu Rwot bala kame oudo iwacunu. 32Kwanyunu romini, diegi kede doke wu bala kame oudo iwacunu, di ikounu yai. Do kwaunu ne ada winyo.”

33Jo me Misiri oko donyo bunyo jo me Isirael pi yai weko lobo gi, pien kiwaco be, “Ka likame iyaunu, wan dedede obino to.” 34Aso, jo me Isirael oko kwanyo alos kame konyongo me timo mugati abongo keto iye arup, di kiko keto gi i bakulin me nyongo alos, kiko twetweo gi kede igoen di kiko riongo gi i epepet gi. 35- Jo me Isirael oudo otimo gikame Musa owaco negi, gin oudo kipenyo jo me Misiri pi mino gi jamini me wel kame kocweo kede siliba kede saabu, kede igoen da. 36Rwot oko mino jo me Misiri cuny gi obedo yom i kom jo me Isirael, di kiko mino jo me Isirael gikame kipenyo. Manono oko mino jo me Isirael otero abar me jo me Misiri.

Jo me Isirael Oyai ki Misiri

37Jo me Isirael oko cako yai ki Rameses ot Sukot kede tien gi. Oudo kitie cuo aromo bala tutumia tol kanyape, di likame komaro iye mon kede idwe. 38Ekodet me jo ace da me atekerin apat da oko upere kede gi, karacel kede romini, diegi kede dok atot. 39Gin kiko tedo mugati kame arup li iye kede alos kame konyongo kame kikelo ki Misiri, pien i esawa kame koriamo gi kede ki Misiri, likame gin kiko udo esawa me nyongo alos me mugati kede arup, arabo esawa me iiko gimoro me acama i yongayo. 40- Jo me Isirael oudo obedo Misiri pi mwakini tol ongwon kede ot adek (430). 41I ceng me ajikini me mwakini tol ongwon kede ot adek, ikodeta me jo ka Rwot oko yai ki Misiri. 42Manono en iwor kame Rwot omio wange obedo bit kede pi kwanyo jo me Isirael ki Misiri. Doko da buli mwaka acelacel jo me Isirael poore mino wang gi bed bit iwor nono pi nyuto wor but Rwot.

Iswilia Amako Ebaga me Kalamo

43Rwot oko waco ne Musa kede Aaron be, “Magi en iswilia amako Ebaga me Kalamo: likame ngakumbor moro poore camo ebaga noni, 44do epasoit kame kotieko wilo twero came ingei kepe; 45likame welo moro arabo epakasit poore came. 46- Kopoore camo cam me ebaga dedede i ot kame kotede iye, likame kopoore tero ringo moro ooko, doko da likame ngatamoro poore turo cogo moro. 47Jo dedede me Isirael poore camo ebaga noni. 48Ka ngakumbor moro kame bedo kede wu mito camo Ebaga me Kalamo pi nyuto wor but Rwot, poore kep cuo dedede kame tie ture, di do oko tere bala anywali me Isirael, en kame mio en eko camo Ebaga me Kalamo. 49Iswilia nogi ribo anywali me Isirael kiton jokumbor kame bedo i diere wu da.” 50Jo me Isirael oko lubo kope dedede kame Rwot owaco ne Musa kede Aaron. 51I ceng nono Rwot oko kwanyo jo me Isirael ki Misiri ikodeta kede ikodeta di lubere kede ikekon gi.

Baibuli I Leb Kumam

© 2013 Bible Society of Uganda

More Info | Version Index