Search form

Yai 13

Mino Rwot Idwe Kao

1Rwot oko waco ne Musa be, 2- “Mi idwe kao acuo dedede buta; idwe kao dedede me jo me Isirael, kede idwe kao dedede me leini bino bedo mega.”

Ebaga me Mugati kame Kotimo abongo Arup

3Musa oko waco ne jo be, “Poore iyutununu ceng noni kame iyaunu kede ki Misiri, kakame oudo itienu ipasoi iye. Ceng noni en kame Rwot oudo owoto wu kede ki kunono kede teko mere; likame kopoore camo mugati kame arup tie iye i ceng noni. 4I ceng me tin, i duwe me agege, en duwe me Abib, wun itienu yai ki Misiri. 5Rwot bin ocikere pi mino joakwari wu lobo kame tie iye jo Kanan, jo Kiti, jo Amor, jo Kibi, kede jo Yebu. Kame en etero wu di eko mino wu lobo amio nono, miero itimunu ebaga noni i duwe me agege me mwaka acelacel. 6Pi ceng kanyaare ibinunu camo mugati kame arup li iye, di i ceng me kanyaare mere ikounu camo ebaga me nyuto wor but Rwot. 7Ibinunu camo mugati kame kotimo abongo arup pi ceng kanyaare; likame arup amoto mugati kame kotimo kede arup poore bedo tie kabedo moroni kame wun itienu iye. 8I ceng nono, ibinunu waco ne idwe wu be, ‘Ango atie timo man pi gikame Rwot otimo na kakame awok kede ki lobo me Misiri.’ 9Bala gikame dano ngapo i ngut cinge arabo i tur nyime, ebaga noni bino bedo ne wu gikame poo wi wu i kom gikame Rwot otimo ne wu kakame iwokunu kede ki lobo me Misiri, tetekeny pwony ka Rwot bed tie i dogu nakanaka, pien Rwot owoto wu ki Misiri kede teko mere. 10Ipoorenu camo ebaga noni i kare mere kopoore buli mwaka.

Idwe Kao

11“Kame Rwot otieko tero wu paka i lobo me jo Kanan, kame en oudo ekwongere pi mino wu kede joakwari wu, ka etieko mino wu lobo nono, 12- ngat acelacel bino kwanyo atin awobi kao emio Rwot. Idwe kao acuo dedede me leini wu da bino bedo me ka Rwot. 13Do ibinunu kwanyo atin romo pi lako kibute atin kao me punda; do ka likame dano mito lake, epoore turo ngute. Doko da ibinunu lako idwe awobe kao wu. 14Ka i kare me anyim atin ni openyi dwong me itok noni, in ibino waco ne be, ‘Rwot bin owoto wan ki lobo me Misiri kede teko mere, kuno kakame wan oudo otie iye ipasoi. 15Kakame Parao otimo kede epali di eko dagi weko wan yai, Rwot oko neko idwe kao dedede i lobo me Misiri, idwe me jo karacel kede me leini. Manono en komio wan oyalo ne Rwot idwe kao me leini wa, do idwe wa kao awobe wan olako kibute. 16Itok noni tie gikame poo wi wa, bala gikame ongapo i ngut cing wa arabo i tur nyim wa; epoo wi wa be Rwot owoto wa ki Misiri kede teko mere.’ ”

Edou kede Mac Kosipere bala Epir

17Kakame Parao oyei ne kede jo me Isirael yai ki Misiri, Rubanga likame oko tero gi di kilubo yongayo abeo i dog nam ot Pilistia, bed bala manono oudo obedo yongayo acecek. Pien Rubanga oudo otamo be, “Ka yi moro opoto, cengemogo jo bino loko tam gi di kiko dok Misiri.” 18Aso, Rubanga oko telo jo kilubo yongayo kame beo i wi tim di eko manaro dok tetu Nam Akwar. Jo me Isirael oko yai ki Misiri di kitieko iikere pi yi.

19- Musa oko kwanyo cogere ka Yosepu etero, pien Yosepu oudo bin omio jo me Isirael okwongere timo kamanono. En oudo ewaco be, “Kame Rubanga olako wu, miero itingunu cogere na ki kan iotunu kede.”

20Jo me Isirael oko yai ki Sukot di kiko ot gero kimere gi Etam i acakini me wi tim. 21Rwot oudo telo negi yongayo i ceng di etie i epir me edou, do iwor oudo etelo negi yongayo di etie i epir me mac, tetekeny kibed ot iwor kede i ceng. 22Edou kosipere iceng kede mac kosipere iwor oudo tie i nyim jo nakanaka pi telo gi.

Baibuli I Leb Kumam

© 2013 Bible Society of Uganda

More Info | Version Index