Search form

Yai 14

Ngolo Nam Akwar

1Rwot oko waco ne Musa be, 2“Wace jo me Isirael lokere cen di kiko gero kimere gi i nyim bomba me Pikakirot, i dierediere me Migidol kede nam, i nget Baal Sepon. 3Parao bino tamo be jo me Isirael tie wire awira atatai pien wi tim ocego gi kabeo li negi. 4Abino mine ebedo ngaepali di eko cako wapo wu, tetekeny ango ako bino bwono Parao kede isirikalen mege di ako bino udo dwongo. Manono bino mino jo me Misiri ngeo be ango abedo Rwot.” Jo me Isirael oko timo gikame kowaco negi.

5Kakame kowaco ne kede Parao be jo me Isirael oudo otieko yai obwot, en karacel kede jotic mege adongo kiko loko tam kame oudo kitie kede i kom jo me Isirael di kiko waco be, “Nan do otiekunu timo nyo? Kom otiekunu weko jo me Isirael obwot di nan okounu dong abongo ipasoi!” 6Abaka oko iiko cabala mere me yi di eko tero isirikalen mege. 7En eko tero cabalan tol kanyape kame koyero ayera, kede cabalan apat dedede me Misiri, di jodongo me isirikalen telo gi. 8Rwot oko mino Parao, en abaka me Misiri, obedo ngaepali di eko cako wapo jo me Isirael, jo kame oudo oyai tie girgi ot abongo lworo.d 9Jo me Misiri oko donyo wapo gi, asigiran kede cabalan ka Parao dedede, kede jo kame ringo kede cabalan kede isirikalen mege. Gin kiko mako gi kakame oudo kigero iye kimere i dog nam, i nget Pikakirot, i nyim Baal Sepon.

10Kakame jo me Isirael oneno kede di Parao kede jo mege me Misiri tie bino noko gi, lworo oko mako gi di kiko kok but Rwot. 11Gin kiko waco ne Musa be, “Benyo, iparo be atesin oudo li i Misiri en komio ikelo wa to i wi tim kan? Nyo kame nan in itimo ne wa, kom kwanyo wan ki Misiri? 12Mam oudo wan owaco ni kop noni i Misiri be, ‘In wek wan otasuno i cing jo me Misiri’? Pien oudo koto ebedo ber ne wan tic ne jo me Misiri akaka wan bino to i wi tim kan.”

13Musa oko dwoko ne jo be, “Kur ibedunu kede lworo, cungunu di itekunu, di ikounu bino neno epone kame Rwot bino lako wu kede tin; pien likame bobo ibinunu medo neno jo me Misiri kame wun tin itienu neno go. 14Rwot bino yi piru, kenekene wun kweunu komu.”

15Rwot oko waco ne Musa be, “Pinyo komio in itie kwano kony ki but ango? Wace jo me Isirael meede ot anyim. 16Do in ting ebela ni malo di iko rieno badi i wi nam; pii bino pokere ki diere di jo me Isirael ko ngolo nam di kibeo i kakatek. 17Ango abino mino jo me Misiri bedo joepali di kiko donyo i yi nam lubo jo me Isirael, di ango ako bino udo dwongo pi bwono Parao kede isirikalen mege, cabalan kede jo kame ringo kede cabalan mege. 18Kame ango abwono gi, jo me Misiri ko bino ngeno be ango en Rwot.”

19Malaika ka Rwot koudo tie telo ne isirikalen me Isirael yongayo oko dok cen ngei gi; edou kosipere kame oudo tie i nyim gi da oko dok cen, 20i dierediere me jo me Misiri kede jo me Isirael. Edou nono oko kelo colo but jo me Misiri do eko mino lero but jo me Isirael. Iwor nono kiakia isirikalen me Misiri kede me Isirael likame oko nokere.

21Musa oko tingo bade malo i wi pii. Rwot oko mino yamo atek kowok ki tetu kide obuko iwor kiakia, di eko jwango pii opokere i diere, di dier nam oko dong kakatek. 22- Jo me Isirael oko ngolo nam di kibeo i kakotuo, di apama me pii kojwangere tie i bad gi tetuni kede tetuca. 23Jo me Misiri da oko donyo i dier nam tuparo gi, asigiran ka Parao dedede, cabalan kede jo kame ringo kede gi. 24Tetu esawa me obai, Rwot oko uco wange piny i kom isirikalen me Misiri ki mac kede ki edou kosipere kame oudo en etie iye, di eko mino isirikalen me Misiri kom gi omiel kitek. 25En eko mino tien cabalan gi omomoko di do kiko donyo wire momot pien oudo kinwang. Jo me Misiri oko waco be, “Oringunu tenge kibut jo me Isirael, pien Rwot tie yi kede wa pirgi!”

26Rwot oko waco ne Musa be, “Ting badi tenge ki wi nam, di pii ko bino dwogo i kom jo me Misiri, kede i kom cabalan kede jo kame ringo kede gi.” 27Aso, Musa oko tingo cinge tenge ki wi nam, di do odiko kakame piny oru kede, pii oko dwogo kakare. Jo me Misiri oko tamakino be koto bwot, do Rwot oko ucouco gi i nam. 28Pii odwogo di eko mwonyo cabalan kede jo kame ringo kede gi, kede isirikalen dedede me Misiri kolubo jo me Isirael i yi nam, likame akadi acel kikom gi oko dong. 29Do jo me Isirael oko ngolo nam di kibeo i kakotuo, di pii otimo apama i bad gi tetu cam kede tetu ngodal.

30Manoni en epone kame riki Rwot olako kede jo me Isirael ki cing jo me Misiri, di jo me Isirael oko neno liele me jo me Misiri di buto i dog nam kakame pii ojwango gi iye. 31Jo me Isirael oko neno twon teko kame Rwot obwono kede jo me Misiri. Manono oko mino jo obedo kede lworo but Rwot, di kiko yei en karacel kede ngatic mere Musa.

Baibuli I Leb Kumam

© 2013 Bible Society of Uganda

More Info | Version Index