Search form

Yai 15

Wer ka Musa

1- Di do Musa kede jo me Isirael oko wero ne Rwot wer ni be:

“Abino wer ne Rwot, piento en etieko udo dwongo pi bwono jokwor mege;

eonyo asigiran kede jo kame ringo kede gi i yi nam.

2- Rwot mia teko kede twer;

en kame elaka.

En Rubanga na, abino pako nyinge;

en Rubanga ka papa na, abino mine dwongo.

3Rwot obedo ngayi;

nyinge obedo Rwot.

4“En eonyo cabalan ka Parao kede isirikalen mege i yi nam;

elwinyo isirikalen mege kame kouro i yi Nam Akwar.

5Pii atut oumo gi;

gin kilwiny i dud nam bala engaro.

6Cingi tetu cam, Okwe Rwot, tek adikinicel;

cingi tetu cam onyinyito jokwor.

7In itieko udo twon dwongo pi bwono jokwor ni;

in ijalakino gero ni oko wango gi bala yugi me arienge.

8Wei kame wok ki umi okuto pii oko cokere karacel;

pii oko bedo ikumemei bala atukit;

pii atut kame tie i dier nam oko cungo ineno bala erumakin.

9Jokwor owaco be, ‘Obino wapo gi di oko mako gi,

obino popoko gikame oyako kibut gi bala kame cuny wa mito.

Obino kwanyo ipimai wa di oko neneko gi.’

10Do wei nin oko kuto nam, di nam oko umo gi;

gin kiko lwiny bala kidi apek i twon pii.

11“Okwe Rwot, rubanga mene en acal bala in?

Ngai kame cal bala in, ngat kacil me aura,

ngat kame kolworo, kame timo giaura?

12In irieo badi tetu cam,

di lobo oko mwonyo jokwor wa.

13Pi amara ni kalikame lokere, in iko telo jo ni kame ilako;

in iko telo gi di igwoko gi kede teko ni tuno i kabedo ni kacil.

14Atekerin apat owinyo kop noni di kom gi oko donyo miel;

lworo oko bwono jo me Pilistia.

15Lworo atek omako ijakai me Edom;

jotel me Moab kom gi oko donyo miel amiela;

jo dedede me Kanan kom gi oko to.

16Lworo kede inyonyong omako gi.

Gin kineno teko ni, Okwe Rwot,

di kiko cungo abongo yangere bala kidi

naka tuno di jo nin dedede otieko kato,

gin jo kame in igonyo ki bedo ipasoi.

17In itero gi di iko cibo gi i wi moru nin bala yat kame kopito,

en kakame in imio odoko kabedo ni,

tempulo kame in kikomi en igero.

18Rwot bino bedo pug ikar kede ikar.”

Wer ka Miriamu

19Jo me Isirael oko ngolo nam di kibeo i kakatek. Do kakame asigiran ka Parao kede cabalan mege kede jo kame ringo kede gi odonyo kede i yi nam, Rwot oko dwoko pii me nam omwonyo gi.

20Anabi Miriamu, amin me Aaron oko mako ayekeyeke i cinge, di mon dedede ace da oko mako ayekeyeke i cing gi, di kiko donyo lube di kimielo. 21Miriamu oko cako negi wer be,

“Werunu but Rwot, piento en etieko udo dwongo pi bwono yi;

eonyo asigiran kede jo kame ringo kede gi i yi nam.”

Pii Akec

22Musa oko mino jo oyai ki Nam Akwar di eko telo gi ot i wi tim me Sur. Gin kiko ot sapali me ceng adek i wi tim abongo udo pii. 23Di do kiko tuno kakame kolwongo be Mara, do likame kiko sobolo mato pii me kanono pien oudo ekec. Manono en komio oudo kolwongo kanono be Mara.e 24Di jo oko bedo kede ingungur but Musa di kiwaco be, “Wan obino mato nyo?” 25Musa oko kok but Rwot di Rwot oko nyuto ne yat moro, en eko uco yat nono i yi pii, di pii oko doko ber me amata.

Rwot oko mino gi iswilia, di en eko tamo gi ki kuno. 26En ewaco negi be, “Ka ibinunu winyo dwana, ango Rwot Rubanga wu, di ikounu timo gi kopoore i nyima, di ikounu lubo cik na kede iswilia na, likame abino mino tuwo moro mako wu bala tuwo kame oudo amio omako jo me Misiri. Ango en Rwot, ngat kame cango wu.” 27Di do kiko tuno Elim, kakame oudo tie iye ataneko tomon kiwie are kede tugere ot kanyaare; gin kiko gero kimere gi kuno i nget pii.

Baibuli I Leb Kumam

© 2013 Bible Society of Uganda

More Info | Version Index