Search form

Yai 17

Pii kowok ki Lela

(Wel 20.1-13)

1Jo dedede me Isirael oko yai ki wi tim me Sin, di kiko donyo ot di kikokobo akokob, bala kame oudo Rwot ociko negi. Gin bin kiko gero kimere gi Repidim, do pii me amata oko bwono gi i kanono. 2Jo oko donyo lok kede Musa di kiwaco ne be, “Mi wa pii me amata.”

Musa oko waco negi be, “Itienu lok keda pinyo? Pinyo komio itienu tamo Rwot?”

3Do orio oudo oneko jo twatwal omio kiko meede ngunguro but Musa di kiwaco ne be, “Pinyo komio ikwanyo wa ki Misiri di iko kelo wa kan to orio, wan karacel kede idwe wa kede leini wa?”

4Musa oko kok but Rwot be, “Abino timo jogi nadi? Gin kitieko iikere pi didipo ango kede kide.”

5Rwot oko waco ne Musa be, “Kwany joadongo mogo me Isirael iupere kede gi iko ot anyim me jo; mak ebela kame bin ijwato kede pii me ecilet me Nail da i teri. 6Ango abino cungo i nyimi i moru me Sinai. Di in iko jwato lela di pii me amata ko bino wok kiye ne jo.” Musa oko timo kamanono i nyim joadongo me Isirael.

7En eko cako nying kanono be Masaj kede Meriba,k pien jo me Isirael oudo ongunguro but Rwot di kitame kakame kiwaco kede be, “Benyo, Rwot tie kede wa arabo li?”

Yi kede Jo Amalek

8Jo me Amalek oko ot suro jo me Isirael i Repidim. 9Musa oko waco ne Yosua be, “Yer ne wa jo mogo ot yi kede jo Amalek diki. Ango abino cungo i wi moru di amako ebela ka Rubanga i cinga.” 10Yosua oko timo bala kame Musa owaco ne di eko yi kede jo Amalek, di oudo Musa, Aaron kede Kur oyito malo i wi moru. 11Kame bad Musa oudo okiar malo, jo me Isirael oudo bwono jo Amalek; do ka oudo edwoko bade piny, jo Amalek oudo ko bwono jo me Isirael. 12Do bad Musa oko jony, omio gin kiko kelo ne kidi di eko bedo i wie. Aaron kede Kur oko donyo mako bade di kikiarao gi malo, ngat acel bade tetucel kede ngat ocelu da bade tetucel; manono oko mino bad Musa obedo di oriere paka tuno ceng donyo. 13Manono bin oko mino Yosua obwono jo Amalek atwal atwala.

14- Rwot oko waco ne Musa be, “Wandiko gikame otimere noni i itabu pi mino jo iyutun. Wac ne Yosua be ango abino wearo jo Amalek atwal atwala ki dud ceng.” 15Musa oko gero alutari di eko cako nyinge “Rwot en imendera na”. 16En ewaco be, “Cinga omako imendera ka Rwot; Rwot bino yi kede jo Amalek pi kare lung.”

Baibuli I Leb Kumam

© 2013 Bible Society of Uganda

More Info | Version Index