Search form

Yai 20

Cik Tomon

(Iswilia 5.1-21)

1Di Rubanga oko yamo be, 2“Ango en Rwot Rubanga wu, ngat kowoto wu ki lobo me Misiri, kakame oudo itienu iye ipasoi.

3“Kur iwor rubanga moro ace kwanyo ango kenekene.

4- “Kur icwei piri cal me gimoro atie malo, amoto i wi lobo, amoto i yi pii, arabo i dud lobo piny. 5- Kur ilur wii i nyim gi amoto woro gi, pien ango Rwot Rubanga wu atie kede nyeko. Ango amio alola but jo kame daga pi dub gi, tuno but ikwae gi me adek kede me ongwon da. 6Do jo kame mara di kigwoko cik na, ango anyuto amara na kalikame lokere but gi kede but lwak me ikwae gi me tutumia kede tutumia.

7- “Kur itio kede nyinga, ango Rwot Rubanga ni, i yore arac, pien ango Rwot likame abino weko aweka dano kame tio kede nyinga i yore arac.

8- “Yutuno ceng Sabato, doko mie ebed ceng kacil. 9- Ibino timo tice ni pi ceng kanyape. 10Do ceng me kanyaare bino bedo mera, en ceng Sabato. Likame ipoore timo tic moro i ceng nono, akadi wodi, akadi nyari, akadi epasoit arabo apasoit ni, akadi leini ni, akadi ngakumbor kame bedo i bomba wu. 11- Pien ango Rwot acweo malo kede lobo, kede nam kede gi dedede kame tie i yi gi pi ceng kanyape, di ako wei i ceng me kanyaare. Pi manono, ango Rwot atieko mino ceng Sabato winyo di ako mine ebedo cil.

12- “Wor papa ni kede toto ni, tetekeny ibed kuo pi kare alac i lobo kame ango Rwot Rubanga wu abino mino wu.

13- “Kur ineko.

14- “Kur itimo adote.

15- “Kur ikwalo.

16- “Kur imio ijura me abe i kom ngawoti.

17- “Kur ingobelo jame ka ngawoti; kur ingobelo dako ka ngawoti, amoto epasoit arabo apasoit mere, amoto doke arabo pundan mege, amoto gimoro dedede kame en etie kede.”

Lworo komako Jo

(Iswilia 5.22-33)

18- Di bin jo dedede owinyo mwoc acal bala me kot kede koko me agwara, di kiko neno meny bala me kot kede yiro kame duny ki wi moru, lworo oko mako gi di kom gi oko donyo miel di kiko cungo tenge kakabor. 19Gin kiko waco ne Musa be, “In en iyam kede wa, wan obino winyo kop nin; do ka Rubanga oyamo kede wa, wan olwor be obino to.”

20Musa oko waco ne jo be, “Kur ibedunu kede lworo; pien Rubanga obino kenekene pi tamo wu kede pi mino wu bedo di ilworenu, tetekeny kur idubunu.” 21Di do jo oko cungo i kakabor, di Musa oko nyiko iyapiyapi kede edou acol cucucuc kame oudo Rubanga tie iye.

Iswilia amako Alutari

22Rwot oko waco ne Musa pi ot waco ne jo me Isirael be, “Wun itiekunu neno kite kame ango Rwot ayamo kede wu ki malo. 23Kur ilokerenu bobo timo cal me rubangan mogo kede siliba amoto kede saabu, di ikounu donyo wora di doko iworunu gida. 24Timunu nango alutari me lobo di ikounu yalo iye romini kede dok bala giayala wu awanga kede giayala me nywak. I kabedo dedede kame ango abino yero ne wu pi wora kiye, abino bino butu di ako mino wu winyo. 25- Do ka iyarunu timo na alutari kede kide, kur itiunu kede kide kame kopao, pien ka gipac omule, udo epwokere likame epoore me timo tic na. 26Doko da kur igerunu alutari kame koyito iye ayita, me wek kur komu me lewic neeno i esawa me yito.”

Baibuli I Leb Kumam

© 2013 Bible Society of Uganda

More Info | Version Index