Search form

Yai 22

Iswil amako Cul

1“Ka ngatamoro okwalo diang arabo oromo, di en eko ngole arabo ecate, ngakuwo nono bino culo doke kany pi diang acel, romini ongwon pi oromo acel. En miero ecul wang gi nono, do ka en likame ekaruno, poore cate pi kuwo kame en etimo nono. 2Ka omako le nono kede ngakuwo, diang arabo punda amoto oromo, di pwodi ekuo, ngakuwo nono bino culo leini are pi le acel.

3“Ka omako ngakuwo di etie turo ot iwor di oko bunge paka to, raco me remo mere likame dong i wi ngatamoro. 4Do ka oko neke di ceng otieko wok, raco me remo mere dong i wi ngat koneke.

5“Ka dano moro omio leini mege oyai ki poto mere di kiko ot camo poto ka ngat ocelu arabo olok mere, arabo egonyo le mere di eko ot camo poto ka ngat ocelu, en miero ecul gi nono kede mere kame ber kowok ki poto mere.

6“Ka dano moro ocwinyo mac i poto mere di mac ko kobo wango poto ka ngat ocelu di eko wango kal kame oudo kocoko i atukit amoto kame oudo pwodi likame kokao arabo poto lung, ngat kocwinyo mac miero cul won poto gikame mac owango.

7“Ka ngatamoro omio ngawote sente arabo jamini mogo pi kano ne, di oko kwalo gi nogo ki ot ka ngawote; ngakuwo nono ka oko make, en ebino culo gi nogo kede akalamo tien are. 8Do ka likame oko mako ngakuwo nono, kobino tero won ot i nyim Rubanga,m pi mito ngeno ka likame en kame ekwalo jamini ka ngawote.

9“I kom kop kame mako marao jamini bala nat doke, pundan, romini, igoen, arabo gimoro kame oudo orwenyo, kame ngat acel waco be, ‘En mera,’ ngat ocelu da be, ‘En mera,’ kop ka jo nogo kobino tero i nyim Rubanga. Ngat kame Rubanga ronkinon bino culo won gi nono kede kame kalamo tien are.

10“Ka ngatamoro oko joko ne ngat ocelu punda, diang, oromo, arabo le moro pi gwoko ne, di le nono ko to arabo eudo awanon amoto joyak oko yake, abongo ngatamoro neno, 11ngat kame oudo ojoko ne le miero ot i nyim Rwot di eko kwongere be en likame ekwalo le ka ngawote. Won le bino yei kwongere mere nono, di do en likame eko bino culo gimoro. 12Do ka oudo okwalo le nono akwala, en ebino culo wange but wone. 13Ka oudo le me obar en koneke, mito ekel gikame nyuto; likame kobino culo gikame le me obar en koneko.

14“Ka ngatamoro okwao le kibut ngat ocelu di le nono oko udo awanon arabo eko to di wone li i kanono, miero dano nono cul wange. 15Do ka le nono oto di wone tie kanono, likame kobino cule. Ka oudo opange apanga, kobino culo sente kame oudo kopange kede kenekene.

Iswilia amako Iponeso kede Edini

16- “Ka icuo moro oko supo nyako kalikame pwodi ongeo icuo doko di pwodi likame enerere kede dano moro, di en eko buto kede, en ebino kwanyo jamini me nyome di nyako nono ko doko dako mere. 17Do ka papa me nyako nono oko dagi ne nyome, en ebino kwanyo ne papa me nyako nono jamini kame kopoore culo pi nyomo nyako kalikame pwodi ongeo icuo.

18- “Miero nek dako kame ngajwok.

19- “Miero nek ngat kame buto kede le bala dako.

20- “Ngatamoroni kame mio giayala but rubanga moro ace apat kede Rwot, kobino ngolo ne kop me to.

21- “Kur iter ngakumbor kirac arabo tidilo en, pien wuda bin ibedunu jokumbor i lobo me Misiri. 22Kur itidilo apuserut moro arabo atin kic. 23Ka wun itidilunu gin, ango Rwot, abino winyo koko gi kame gin kikok pi kony kibuta; 24abino lilo kede wu kitek di ako neko wu kede epima, di mon wu ko doko apuserun kede idwe wu da ko doko idwe kic.

25- “Ka wun ikopunu sente but jo na kame jocan, likame ibinunu tero gi bala kame jo kame kopo jo sente timo kede; likame ibinunu penyo gi ameda. 26- Ka imako egoe ka dano moro pi banya, miero idwok ne di pwodi ceng likame odonyo; 27pien cengemogo egoe mere inonono acel kenekene kame en eum kede; nyo ace kame en ebino um kede? Kame en eko koko kony kibuta, ango abino winyo koko mere, pien ango angakisa.

28- “Kur iyamo kirac i kom Rubanga, doko kur ilamo ngatel me jo ni.

29“Kur igal kelo na giamia kikom amio kame iudo, kede giamia me bwini kede mo me olibeti.

“Ibinunu mina idwe wu awobe kao. 30Ibinunu timo kamanono da kede doke wu kede romini wu. Atin twon arabo atin me emerekek kame konywalo bino bedo kede toto mere pi ceng kanyaare, do i ceng me kanyauni kobino mine buta.

31- “Wun ibinunu bedo jo na kacil; pi mano, likame ibinunu camo ringo me le moro kame le me obar oneko; ibinunu uce ne igwogin.

Baibuli I Leb Kumam

© 2013 Bible Society of Uganda

More Info | Version Index