Search form

Yai 23

Ngolo ne Jo dedede Kop i Ateni

1- “Kur itero kop me abe, doko kur iribere kede dano arac pi in mino ijura me angalo i kom dano moro. 2Kur idok i bad kame jo tot iye pi timo gikarac; kame itie mino ijura i pido moro, kur ilengere i bad kame jo tot iye pi mito totolo ngolo kop i ateni; 3- doko kur ibed kede apokapoka but ngacan kame kotie pide.

4- “Kame in ingole i kom diang me ngading ni arabo punda mere di etie rwenyo, in miero idwoke bute. 5Kame in iudo ngat kame dagi di punda mere opoto piny kede yec, in miero ikonye mino punda mere cungo bobo; kur inene anena di iko ot iweke.

6- “Kur igeng ngacan lono pido mere. 7Kur ikel pido me abe i kom ngatamoro, doko kur inek ngat kame li kede raco moro arabo kame ber, pien ango likame abino sasiro ngat kame timo rac kame cal kamanono. 8Kur iyei gamo cemusana, pien gikame cal kamanono umo wang jo, di eko mino gi kitotolo ngolo kop ne jo kame li kede raco moro.

9- “Kur itidilo ngakumbor; wun ingeunu kuo me ngakumbor, pien wun bin ibedunu jokumbor i lobo me Misiri.

Mwaka me Kanyaare kede Ceng me Kanyaare

10- “Ibino puro lobo ni pi mwakini kanyape di ikwanyo cam kiye. 11Do i mwaka me kanyaare mere in ibino weke ewei di eko ukaro. Gi dedede kame bino cek iye i mwaka nono jocan kame tie i diere me jo ni en kame bino camo; gikame gin kibino weko, leini me obar bino camo. In ibino timo kamanono kede poto ni me olok kede poto me olibeti da.

12- “Ibino timo tice ni pi ceng kanyape, do i ceng me kanyaare mere iko bino wei, tetekeny twon ni kede punda ni karuno udo wei, kede atin me epasoit ni da kede ngakumbor kame bedo kedi, gida kiud bobo teko.

13“Miero inenunu be ilubunu gi dedede kame ango atieko waco ne wu. Kur ilegunu but rubangan mogo ace; doko kur nying gi winyere ki dogu.

Ibagai Adek Adongo

(Yai 34.18-26; Iswilia 16.1-17)

14“Ibinunu tedo ibagai adek buli mwaka pi wora. 15- Ibinunu camo Ebaga me Mugati kame Arup li iye. Pi ceng kanyaare ibinunu camo mugati kame kotimo abongo arup bala kame oudo aciko ne wu. Ibinunu timo kamanono i kare kame kociko, i duwe me Abib, pien duwe nono en kame wun bin iyaunu kede ki Misiri.

“Likame tie ngatamoro kame miero bin i nyima kede cinge nono.

16- “Ibinunu camo Ebaga me Kac kede me anyakini me agege me kodere kame ipurunu i poti wu. Ibinunu da camo Ebaga me Kimere i atiekini me mwaka, en kare kame icokunu kede ki poti cam dedede kame ipurunu.

17“Buli mwaka cuo dedede miero bin i nyima i kare me ibagai adek nogi, ango Rwot Rubanga.

18“Likame ibinunu mina giayala me leini karacel kede giamia me mugati kame arup tie iye. Mo me leini kame koyalo buta i kare me ibagai nogi miero kur buti.

19- “Kodere kame beco, kame geo cek ki poti wu, ibinunu kelo gi i ot ka Rwot Rubanga wu.

“Likame ibinunu tedo ringo me atin diel kede cak ka toto mere.

Cikere kede Pwony

20“Neningo, ango abino cwano malaika telo ne wu yongayo, pi en gwoko wu i yongayo di eko tero wu i kabedo kame ango atieko iiko. 21Winyenu doko lubunu kop mere; kur ijemunu ne, piento ango atieko mine twer; en likame ebino sasiro wu ka ijemunu ne. 22Do ka wun iwinyenu di ikounu timo gi dedede kame ango awaco, ango abino dingere kede jokwor wu doko abino dagi jo kame dagi wu. 23Malaika na bino telo ne wu yongayo di eko tero wu i lobo me jo Amor, jo Kiti, jo Perisi, jo Kanan, jo Kibi kede jo Yebu, di ango ako bino muducaro gi. 24Likame ibinunu luro wi wu piny i nyim rubangan gi, akadi woro gi, amoto lubo itok gin, do ibinunu muducaro gi atwal atwala di ikounu bebelo kide adongodongo kame kosipo kakame gin kiworo iye rubangan gi. 25Ibinunu wora, ango Rwot Rubanga wu, di ango ako bino mino winyo i kom cam wu kede pii wu; doko ako bino mino ibedunu abongo tuwo moro. 26I lobo wu likame tie dako moro kame yie bino wok arabo kame bino bedo adonge; abino mino wu kare alac me kuo. 27Abino mino jo bedo lwor i nyimu, di ako totolo wi jo dedede kame ibinunu riamo kede, doko abino mino jokwor wu dedede lokere ringo tenge kibutu. 28Abino mino lworo mako jo Kibi, jo Kanan kede jo Kiti di kiko ringo tenge ki nyimu. 29Likame abino riamo gi tenge i mwaka acel, pien ka atimo kamanono, lobo bino dong nono di leini me obar ko doko tot tot kalikame wun itwerunu. 30Ango abino riamo gi tenge mot mot, tuno wun nyai romo lobo nono. 31Ikor me lobo wu bino cakere ki Nam Akwar tuno i nam me jo Pilistia, kede ki wi tim tuno i ecilet me Eupurate; pien ango abino mino jo me piny nono i cingu, di wun ikounu bino riamo gin tenge. 32Likame ibinunu timo isikan moro kede gin akadi kede rubangan gi. 33Doko kur iwekunu gin kidong bedo i lobo wu; ka iwekunu gi, gin kibino mino wu itimunu dub buta. Pien ka idonyunu woro rubangan gi, manono ateteni bino bedo ne wu bala owic.”

Baibuli I Leb Kumam

© 2013 Bible Society of Uganda

More Info | Version Index