Search form

Yai 24

Komoko Isikan

1Rwot oko waco ne Musa be, “Bianu buta i wi moru, in kede Aaron, Nadab, Abiku, kede joadongo ot kanyaare me Isirael; di ikounu wora ki tenge. 2In keni en kame ibino noka; do jo icegun likame bino noka, doko jo apat dedede likame bino yito i wi moru kede in.”

3Musa oko ot but jo di eko waco negi gikame Rubanga ociko karacel kede iswilia dedede, di jo dedede oko gamo kede dwan acel be, “Gi dedede kame Rwot otieko waco wan obino timo.” 4Musa oko wandiko cik ka Rubanga dedede. En eko yai odiko sek di eko gero alutari i dud moru, di eko sipo kide tomon kiwie are, kidi acelacel cungo pi jo me ekeko acelacel me Isirael. 5En eko cwano awobe, di gin kiko mino giayala awanga kede kiko mino twonin but Rwot bala giayala me nywak. 6Musa oko poko remo me leini nogo dul di eko keto i kalayan, dul kame odong en eko kikiro i alutari. 7Di en eko kwanyo itabu me isikan kame oudo kowandiko iye cik ka Rwot di eko somo kede dwan amalo di jo dedede winyo. Jo oko waco be, “Gi dedede kame Rwot otieko ciko wan obino timo, doko obino lubo gi.”

8- Musa di oko kwanyo remo kame oudo tie i kalayan di eko kikiro i kom jo di ewaco be, “Man en remo kame moko isikan kame Rwot otieko timo kede wu di emio wu cik nogi.”

9Di do Musa kede Aaron, Nadab kede Abiku, karacel kede joadongo me Isirael ot kanyaare oko yito i wi moru, 10di gin kiko neno Rubanga me jo me Isirael. I dud tiene piny oudo tie iye gikame cal bala kidi sapir kame kopeto, di epioropior bala malo. 11Rubanga likame oko timo ne jodongo me Isirael nogi raco moro; gin kiko neno Rubanga, doko kiko cam kede amata.

Musa i wi Moru me Sinai

12Rwot oko waco ne Musa be, “Bia buta i wi moru, di iko bedo kura. Ango abino mini kide abatal kame tie kede iswilia kede cik kame ango atieko wandiko me pwonyo jo na.” 13Aso, Musa oko yai kede Yosua ngakonye, di Musa oko yito i wi moru kacil. 14En ewaco ne jodongo be, “Bed ikurunu wa ki kan, tuno wan dwogo but wu. Aaron kede Kur tie kede wu, pi mano, ngat kame tie kede kop moro miero eter but gi.”

15Musa oko ot i wi moru, di edou oko umo wi moru. 16Rieny me tie ka Rwot oko bino i wi Moru me Sinai, di edou oko umo wi moru pi ceng kanyape. I ceng me kanyaare mere Rwot oko lwongo Musa ki edou. 17Kibut jo me Isirael, rieny me tie ka Rwot oudo cal bala mac kame tie wango wi moru. 18- Musa oko ot malo i wi moru di eko donyo i edou nono. En eko bedo kuno pi ceng ot ongwon.

Baibuli I Leb Kumam

© 2013 Bible Society of Uganda

More Info | Version Index