Search form

Yai 25

Giamia pi Taberenakol

(Yai 35.4-9)

1Rwot oko waco ne Musa be, 2“Wace jo me Isirael pi mina giamia. Gam giamia dedede kame ngat acelacel bino kwanyo bala kame cunye tele kede. 3Mage en giamia kame in ibino gamo kibut gi: saabu, siliba, kede nyonyo buronsi; 4igoen ebululu ebululu, akwakwar, kede akwar kame kotimo kede yer me romini; igoen apwot kame meny, igoen kame kotimo kede yer me diegi, 5launi kame konyongo me romini kede imukulen ace; ibaon me yen kame kolwongo be akasia; 6mo me italan; jamini kame ngwece gi mit me nyalo mo me wir, kede odok adunya kame ngwe kur; 7kide me wel kame kolwongo be onik kede kide apat me wel kame kobino keto i kom epod kede i kom isau me kor. 8Jo poore timo nango Kabedo Kacil, tetekeny abed i diere gi. 9Timenu karacel kede jamini me yie dedede bala kame ango abino nyuto ne wu.”

Sanduku me Isikan

(Yai 37.1-9)

10Rwot oko waco be, “Wace gi kitim sanduku kede ebao me yat akasia; boro mere bino bedo puti ongwon, laco mere puti are kede boro mere malo puti are. 11In ibino puno yie kede ngee kede saabu kame kojililo, doko iko toko ngee kede saabu rimaro. 12Ibino timo alung ongwon me saabu di iko cibo gi i tiene ongwon, alung are tetucel kede are da tetucel. 13Ibino timo ibaon me yat akasia me yene, di iko puno gi kede saabu, 14iko rwako ibaon nogo i wang alung nogo i nget sanduku tuni tuni, me yene. 15Miero wek ibaon nogo bedi i alung nogo; kur wot gi tenge. 16Ibino keto i yie kide are abatal kame ango abino mini, kame kowandiko iye cik.

17- “Tim kom me kisao mere kede saabu kame kojililo; boro mere miero bed puti ongwon kede laco mere puti are. 18Tim cerubim are kede saabu; tet gi kede enyondo, 19acel i ajikini me kom me kisa tetucel, acel da tetuca mere. Tim gi di kitie kicel kede kom me kisa. 20Ibino mino cerubim nogo yararo bwom gi kiko umo kom me kisa. Gin kibino nenere di nyim gi oluro neno kom me kisa. 21In ibino cibo kide abatal are kame ango abino mini i yi sanduku nono di iko cibo kom me kisa i wie. 22Ango abino riamo kedi kanono, i wi kom me kisa nono, i dierediere me cerubim are kame tie i wie, di ako bino mini cik na dedede pi mino jo me Isirael.

Emesa me Keto Mugati kobedo Giamia but Rubanga

(Yai 37.10-16)

23“Ibino timo emesa kede ebao me yat akasia; boro mere poore bed puti adek, kede laco mere puti acel kede dul, kede boro mere malo poore bed puti are. 24Ibino puno kome dedede kede saabu kame kojililo di iko toko ngete kede saabu rimaro. 25Tim ne ebao kame gwako tiene rimaro, di laco mere rom kede yi cing dano, kede iko toko ebao nono kede saabu rimaro en. 26Tim alung ongwon me saabu di iko keketo gi i isondana ongwon dedede, buli acel i tiene acel. 27Alung kame korwako iye ibaon me yeno emesa kobino keto di iyapiyapi kede ebao kame rimaro tiene. 28Ibino timo atekai me yat akasia di iko puno gi kede saabu, di oko tic kede gi me yeno emesa nono. 29Ibino timo kede saabu suanin kede bakulin mege me dunyo odok angwe kur, kede da cupan kede ikopon mege me giayala amata. 30- Di iko bino keto mugati kame koyalo buta i wi emesa, di eko bedo tie iye nakanaka.

Gicibo Etala

(Yai 37.17-24)

31“Ibino timo gicibo etala kede saabu kame kojililo. Ibino teto dude piny kede epir mere kede enyondo; ikopon mege kame gwako ature kede ature mege ibino teto ribere i kome. 32Ebino bedo tie kede jange kanyape kame yai i ngete, adek tetucel doko adek tetu ocelu. 33Ajange acelacel kikom jange kanyape nogo miero bed kede ikopon adek kame kotimo bala ature kede pote kame gwako ature kede ature iye. 34I kor epir me gicibo etala bino bedo iye ikopon ongwon kame kotimo bala ature. 35Kikom jange kanyape nogo, i dierediere me tien buli jange are, miero bed tie iye pote kame gwako ature acel i kor epir me gicibo etala. 36Gicibo etala, karacel kede ajange mege kiton ature miero tet kede enyondo kikom saabu kame kojililo di kitie kicel. 37Ibino timo ne italan kanyaare di iko keto gi di gin dedede kiliel kicaro anyim. 38Makasi me kwanyo mac kede sinia mere kobino timo kede saabu kame kojililo. 39Gicibo etala kede jamini mege nogi dedede bino mito saabu kame kojililo kame peko mere romo kilo ot adek kiwie kany. 40- Miero inen be itimo gi bala kame oudo anyuto ni i wi moru.”

Baibuli I Leb Kumam

© 2013 Bible Society of Uganda

More Info | Version Index