Search form

Yai 29

Epone me Kwero Aaron kede Awobe mege pi bedo Josaseredoti

(Jolebi 8.1-36)

1“Man en gikame in ipoore timo ne Aaron kede awobe mege, tetekeny gin kitim na tic bala josaseredoti. Ibino kwanyo etobait me twon kede imerekekin are, kalikame tie kede peko moro i kom gi. 2Tim mugati kame arup li iye, kede mugati kame arup li iye kame kotedo kede mo, kede mugati aperepere kame kosuto kede mo. In ibino timo gi kede engano kame konungo. 3Ibino keto gi i adita acel di iko mino gi buta karacel kede twon kede romini are nogo.

4“Ibino kelo Aaron kede awobe mege i ekeko me Eema na di iko mino gi kibol. 5Di in iko kwanyo igoen me angapa me ngasaseredoti iko ngapo ne Aaron; esati abor, ekanso kame kodokakino iye epod, egoe me kor kede rakoba. 6Dwadwalo ne egoe i wie di iko tweno iye gianena kacil kame kogoro i kom saabu atitidi di ibatalal. 7Ibino kwanyo mo me wir di iko onyo i wie di iko wire.

8“Di do iko bino kelo awobe mege di iko ngapo negi isatin kame bocoboco; 9iko tweno da ausin i pier gi kede iko tweno igoen i wi gi. Manono en epone kame in ibino kwero kede Aaron kede awobe mege di gin kede ikwae gi kiko bino timo na tic nakanaka bala josaseredoti.

10“Ibino kelo twon nono i nyim Eema na di iko waco ne Aaron kede awobe mege pi gin keto cing gi i wie, 11di in iko bino ngole i nyima, i ekeko kame donyo i Eema. 12Ibino gwelo remo mogo me twon nono kede lweti di iko keto i iswonge me alutari, do remo lung kame odong in iko bino onyo piny i dud alutari. 13Ibino waro mo lung kame umo amontena, lak emany kede engalur are dedede kede mo kame tie i kom gi, di iko wango gi i wi alutari tetekeny yiro gi duny buta. 14Do ibino wango ringo me twon, lau mere, kede amontena mege tenge me kimere. Manono bino bedo giamia kame kwanyo tenge dub me josaseredoti.

15“Di do in iko bino kwanyo emerekek acel di iko waco ne Aaron kede awobe mege pi gin keto cing gi i wie, 16di in iko bino ngolo oromo nono di iko kwanyo remo mere iko kikiro i nget alutari dedede. 17Di in iko bino ngongolo oromo nono i adulion, di iko lwoko amontena kede tiene, di iko dokakino gi i kom adulion nogo kede wie. 18- Wang oromo nono lung i wi alutari; en etie giamia awanga but Rwot; giamia kame kowango kede mac, giamia kame ngwe kur but Rwot.

19“Ibino kwanyo emerekek me are mere di Aaron kede awobe mege ko bino keto cing gi i wie. 20In ibino ngolo oromo nono di iko kwanyo remo mere mogo di iko susuto i yit Aaron tetu cam kede me awobe mege, kede i lwet gi adongo me cing gi kede me tien gi tetu cam. Remo kame dong mere ibino kikiro i nget alutari dedede. 21Di iko bino kwanyo remo mogo kame tie i wi alutari, kede mo mogo me wir, di iko kikiro i kom Aaron kede i kom igoen mege, kede i kom awobe mege kede i igoen me awobe mege; di do en kede igoen mege kiko bedo cil, karacel kede awobe mege kede igoen gi. 22Ibino waro da mo me emerekek nono, mo me yibe, mo kame umo jamini me yie, lak emany, engalur are dedede kede mo i kom gi, kede amuro tetu cam (pien manono en oromo me timo akwera). 23Ibino kwanyo da ki adita me mugati kame komio buta, mugati acel kame kotimo abongo arup, mugati acel kame kotedo kede mo, kede mugati acel arerep kame kosuto kede mo. 24In ibino keto cam nogi dedede i cing Aaron kede awobe mege, di in iko mino gin kikiarao gi malo pi mino gi buta. 25Di do in iko bino gamo gi ki cing gi, di iko wango gi i wi alutari medo i kom giayala awanga kame ngwe kur buta.

26“Ibino kwanyo kapumito me oromo kame kokwero kede Aaron di iko kiarao en malo pi bedo giayala buta; manono bino bedo iner nin.

27“Ibino poko tenge pi bedo gikacil, adulion me oromo me timo akwera, kame ibeikina but Aaron kede awobe mege. Magonogo gin en kapumito kede amuro kame oudo kokiarao malo buta di otie kwero gi. 28Ebino bedo cik but jo me Isirael pi kare dedede, pi gin mino Aaron kede awobe mege adulion nogi; manoni en iner kame jo me Isirael poore mino josaseredoti i kare kame gin kimio kede giayala gi me nywak. Gin kibedo giamia gi buta.

29“Igoen ka Aaron me ngasaseredoti kobino mino but awobe mege ka en eto; gin kibino ngapo gi i kare kame kokwero gi kede. 30Wot ka Aaron kame lunyo wange bala ngasaseredoti bino ngapo igoen nogo pi ceng kanyaare, i kare kame en edonyo kede i Eema me riamo keda pi timo tic i Kabedo Kacil.

31“Ibino kwanyo ringo me oromo kame kokwero kede Aaron kede awobe mege di iko tedo ringo nono i Kabedo Kacil. 32Aaron kede awobe mege bino camo ringo me oromo nono kede mugati kame tie i adita, i ekeko me Eema me riamo keda. 33Gin kikom gi kibino camo gikame oudo kotio kede me kwanyo dub i kare kame kokwero gi kede, do likame tie dano moro ace kame bino camo gi, pien gin kibedo gikacil. 34Ka ringo moro arabo mugati moro oko dong tuno odiko, in ibino wange; likame kobino came pien ebedo gikacil.

35“Ibino timo kamanono ne Aaron kede awobe mege bala kame atieko ciko ni; ibino timo tic me kwero gi pi ceng kanyaare. 36Ceng acelacel in ibino mino giayala me twon pi kwanyo dub. Ibino da mino giayala me kwanyo dub kame tie i alutari, di iko wire kede mo pi mine bedo gikacil. 37Ibino timo tic me kwanyo dub kame tie i alutari pi ceng kanyaare, di iko lonye, di alutari ko bedo gikacil adikinicel; gimoroni kenekene kame bino mulo alutari nono bino udo peko pi twer kame etie kede.

Giamia me Yalo Rubanga Ceng dedede

(Wel 28.1-8)

38“Ceng dedede in ibino ngolo romini me mwaka acel gin are, di iko yalo gi i wi alutari. 39Ibino mino giayala me oromo acel odiko kede ocelu mere iko bino mino otieno. 40Ibino mino da karacel kede oromo me agege, kilo acel me engano kame konungo kiber di oko rube kede mo me olibeti acil. Doko da iko onyo lita acel me bwini bala giayala amata. 41Oromo ocelu mere in ibino ngolo di iko yalo otieno, ibino mine karacel kede engano, mo me olibeti, kede bwini di rom aroma kede me giayala me odiko. Manoni en giayala awanga kame ngwe kur buta. 42Giayala awanga noni kobino mino i nyima, i ekeko me Eema me riamo keda nakanaka pi kare lung. Kanono en kame ango abino riamo kede wu iye pi yamo kede wu. 43Ango abino riamo kede jo me Isirael kanono, di deyo na ko bino lonyo kanono doko kabedo kacil. 44Ango abino lonyo Eema me riamo keda kede alutari; doko abino kwero Aaron da kede awobe mege pi gin timo na tic bala josaseredoti. 45Ango abino bedo i diere me jo me Isirael, di ako bedo Rubanga gi. 46Di gin kiko bino ngeno be ango en Rwot Rubanga gin, ngat kame bin akwanyo gi ki lobo me Misiri tetekeny ango abed i diere gin. Ango en Rwot Rubanga gin.

Baibuli I Leb Kumam

© 2013 Bible Society of Uganda

More Info | Version Index