Search form

Yai 30

Alutari me Wango Odok Angwe Kur

(Yai 37.25-28)

1“Ibino timo alutari kede ebao me yat akasia, kame ibino wango iye odok angwe kur. 2Ibino time di ngete dedede rorom, boro mere puti acel kede dul kede laco mere da kamanono, kede boro mere malo ko bino bedo puti adek. Iswonge kame tie i isondana mege bino ribere di kitie kicel kede kome. 3Ibino puco wie malo, ngete ongwon dedede, kede iswonge mege kede saabu kame kojililo, di iko toko ngete rimaro kede saabu. 4Tim ne alung are me saabu, di iko keto gi piny me kakame kotoko i nget alutari tuni tuni di kipimere. Gin kibino bedo me rwako atekai me yene. 5Ibino timo atekai nogo kede ebao me yat akasia, di iko puno kom gi kede saabu. 6Ket alutari noni i nyim egoe me isenge kame liero i nyim Sanduku me Isikan; kanono en kame ango abino riamo kede wu iye. 7Odiko acelacel kame Aaron oko ot pi iiko italan, en poore ewang odok angwe kur i wi alutari nono. 8Otieno da kame en eoto pi cwinyo italan, en poore etim bobo kamanono. 9In likame ibino yalo i wi alutari noni odok angwe kur kalikame cil, arabo giayala awanga moro, amoto giayala me alos; doko likame ibino onyo giayala amata moro i wie. 10Mwaka acelacel tien acel, Aaron bino timo pwola me lonyo alutari di esuto i iswonge ongwon dedede remo me leini kame kongolo pi bedo giayala me kwanyo dub. Kobino timo kamanoni buli mwaka, pi kare dedede. Alutari noni bino bedo gikacil adikinicel kame komio buta.”

Esolo kame Kokwanyo pi Eema ka Rwot

11Rwot oko waco ne Musa be, 12“Kame in iyaro maro wel me jo me Isirael, dano acelacel poore lako kuo mere kibuta, tetekeny kur can moro pot i kom gi di otie maro wel gi. 13- Dano acelacel kame kobino wandiko bino culo sente kame komito, di lubere kede wel kame komito i Kabedo Kacil. Jo dedede poore cul sente nono bala giamia buta. 14Jo dedede kame kobino maro wel gi, cuo kame mwakini me dongo gi tie ot are kede kalamo, miero cula sente nono. 15Jo kame obaro likame bino culo kame kalamo, doko jocan da likame bino culo kame nonok, i kare kame gin kimio kede giayala noni buta pi kuo gi. 16In ibino gamo sente noni kibut jo me Isirael di iko tic kede pi konyo tice kame makere kede Eema me riamo keda. Esolo nono bino bedo i nyima bala gi me yutuno jo me Isirael, gikame gin kiculo pi lako kuo gi.”

Kalaya kame Kotimo kede Nyonyo Buronsi

17Rwot oko waco ne Musa be, 18- “Ibino timo kalaya me nyonyo buronsi karacel kede dude kame en ecungo kede da me nyonyo buronsi. Ibino cibe i dierediere me Eema me riamo keda kede alutari, di iko keto pii iye. 19Aaron kede awobe mege bino tic kede pii nono me lwoko cing gi kede tien gi. 20I kare kame gin kidonyo kede i yi Eema me riamo keda, arabo kame gin kioto kede i alutari pi timo tic me mino giayala awanga buta, gin kong kibino lwokere kede pii nono, tetekeny kur kitoi. 21Gin miero kong kilwok cing gi kede tien gi, tetekeny kur kitoi. Manoni en cik kame gin kede ikwae gi poore kilubi pi kare dedede.”

Mo me Wir

22- Rwot oko waco ne Musa be, 23“Kwany jamini kame ngwe kur gi: kilo kanyape me mura aliu, kilo adek me sinamon angwe mit, kede kilo adek me balsam, 24kede kilo kanyape me kasia (gin dedede miero kopim gi bala kame mitere i kabedo kacil). Med iye lita ongwon me mo me olibeti, 25di iko timo kede gi mo kacil me wir, bala kame kotimo kede mo angwe kur; en ebino bedo mo kacil me wir. 26Ti kede me wiro Eema me riamo keda, Sanduku me Isikan, 27emesa kede jame mege dedede, gicibo etala kede jame mege dedede, alutari me wango odok angwe kur, 28alutari kame koyalo iye giamia awanga karacel kede jame mege dedede, kede kalaya karacel kede gikame kocibe iye. 29In ibino kwero gi buta iepone noni, tetekeny gin kibed gikacil adikinicel; gimoroni dedede kame mulo gi bino udo peko pi twer kame kitie kede. 30Di do in iko bino wiro Aaron kede awobe mege, di iko kwero gi pi gin bedo josaseredoti kame timo nango tic. 31In ibino waco ne jo me Isirael be, ‘Mo noni en kame bino bedo mo nango kacil me wir pi kare dedede. 32Likame kobino tic kede me wiro jo atatai, doko likame kopoore timo moro ace kame konyalo bala en; en ebedo gikacil, doko miero ebed gikacil kibutu. 33Ngatamoroni kame bino nyalo mo moro bala en, arabo ngatamoroni kame bino kete i kom dano moro kalikame obedo ngasaseredoti, kobino riame tenge kibut jo na.’ ”

Odok Angwe Kur

34Rwot oko waco ne Musa be, “Kwany jamini kame ngwece gi mit gi: sitakite, onika, galbanum, kede odok angwe kur acil; kwany gi di kirorom. 35Ti kede gi me timo odok angwe kur bala kame kotimo kede moe angwe kur. Ket iye munyo, ebed gikacil. 36Pok mogo di iko yoko dok purupuru, di iko poko mogo kikom kame iyoko nono iko tero di iko keto i nyim Sanduku me Isikan, i yi Eema me riamo keda, kakame ango abino riamo kedi iye. Odok angwe kur noni miero bed gikacil adikinicel kibutu. 37Kur inyal iepone noni odok moro angwe kur piru. Odok angwe kur nono miero bed gikacil kame imio buta. 38Ngatamoroni kame bino nyalo odok angwe kur moro kame cal bala en, pi en tic kede bala mo angwe kur, kobino riame tenge kibut jo na.”

Baibuli I Leb Kumam

© 2013 Bible Society of Uganda

More Info | Version Index