Search form

Yai 31

Jo kame Poore Timo Eema ka Rwot

(Yai 35.30—36.1)

1Rwot oko waco ne Musa be, 2“Neningo, ango atieko yero Basalel wot ka Uri, akwar Kur, dano me ekeko ka Yuda. 3Ango atieko mino twer na opong i kuo mere, doko amie apiranut, rieko kede ngec me timo jamini dedede kede diru, 4pi en pwakuno timo jamini mogo kede saabu, siliba kede nyonyo buronsi; 5kede pi en luro kide acil kame komwono me tubuso gimogo, kede pano ebao kede diru me epone dedede. 6Ango atieko yero da bobo Okoliab wot ka Akisamak, dano me ekeko ka Dan, pi nywako timo tic kede en. Ango atieko mino apiranut but jo dedede kame timo tic kede diru, tetekeny gin kitim jamini dedede kame ango atieko ciko ni gi: 7Eema me riamo keda, Sanduku me Isikan kede kom me timo kisa kame bedo i wie, kede jamini dedede me yi Eema, 8emesa kede jamini mege, gicibo etala kame kotimo kede saabu kame kojililo kede jamini mege dedede, alutari me wango odok angwe kur, 9alutari me giayala awanga kede jamini mege dedede, kalaya me lwokere kede gi me cibe, 10kede igoen kame kotimo kiber, igoen kacil me ngasaseredoti, kame kotimo ne Aaron kede awobe mege, pi gin ngapo kame kitie timo tic me josaseredoti, 11mo me wir, kede odok angwe kur kame kodunyo i Kabedo Kacil. Gin kibino timo gi nogi bala kame ango atieko ciko ni.”

Sabato en Ceng me Wei

12Rwot oko waco ne Musa be 13en kikome poore ewace jo me Isirael be, “Wun ibinunu gwoko ceng Sabato na, pien ebedo gianena kame bino bedo tie i dierediere nango kede wu pi kare dedede, pi nyuto be ango atieko yero wun pi bedo jo na. 14Wun ibinunu gwoko ceng Sabato, pien ebedo ceng kacil kibutu; ngatamoroni kalikame bino gwoke di eko timo tic i ceng nono, kobino neke. 15- Ibinunu timo tice wu pi ceng kanyape, do ceng me kanyaare obedo ceng me wei kenekene, ceng kacil ka Rwot. Ngatamoroni kame bino timo tic i ceng nono, kobino neke. 16Jo me Isirael miero gwok ceng Sabato pi kare dedede, bala isikan kame bedo nakanaka. 17- En ebedo gianena kame bino bedo nakanaka i dierediere na kede jo me Isirael, pien ango acweo malo kede piny pi ceng kanyape, di i ceng me kanyaare mere ako jiko tic di ako wei.”

18Kakame Rubanga otieko yamo kede Musa i wi moru me Sinai, eko mine kide abatal are, kame oudo Rubanga kikome owandiko iye cik.

Baibuli I Leb Kumam

© 2013 Bible Society of Uganda

More Info | Version Index