Search form

Yai 32

Cal me Atin Twon kame Kotimo kede Saabu

(Iswilia 9.6-29)

1- Kakame jo oneno kede be Musa oudo ogal i wi moru, gin kiko cokere but Aaron di kiko waco ne be, “Wan likame ongeo gikame otieko timere ne Musa ngat kokwanyo wa ki lobo me Misiri, in tim ne wan rubanga kame bino telo wa.”

2Aaron oko waco negi be, “Kwakwanyunu mwolere kame kotimo kede saabu, kame mon wu, awobe wu, kede anyira wu tie ngapo i yit gi, di ikounu kelo gi buta.” 3Di jo dedede oko kwakwanyo mwolere kame kotimo kede saabu, kame oudo gin kitie ngapo i yit gi, di kiko tero but Aaron. 4- Aaron oko gamo mwolere me yit nogo, di eko twako gi, eko lulungo gi, eko timo kede cal me atin twon.

Jo oko waco be, “Okweunu wan jo me Isirael, rubanga wa ine, ngat kokwanyo wa ki Misiri!”

5Kakame Aaron oneno kede gikame oudo tie timere, en eko gero alutari i nyim cal me atin twon nono di eko waco be, “Diki obinunu tedo ebaga me woro Rwot.” 6- Oru mere gin kiko yai odiko sek, di kiko kelo leini mogo me mino giayala awanga kede mogo kiko neko pi gin camo bala giamia me nywak. Di jo oko bedo piny cam kede amata, kiko bilor i miel kede timo caro.

7Rwot oko waco ne Musa be, “Dok piny awakawaka! Jo ni kame in ikwanyo ki lobo me Misiri, otieko dubere. 8Gin ajoto kitieko weko yongayo kame ango oudo aciko gi be kilubi; gin kitieko timo cal me atin twon di kiko wore kede kiko mine giayala di kiwaco be manono en rubanga gi, ngat kokwanyo gi ki lobo me Misiri!” 9Rwot oko waco ne Musa be, “Ango atieko neno epali ka jogi. 10Nataman in wek ango kede gin, tetekeny lilo na bed i kom gi di ako muducaro gi. Di ango ako bino mino in idoko ateker adwong.”

11- Do Musa oko ngangao Rwot Rubanga mere di ewaco be, “Okwe Rwot, pinyo bo kame mio cunyi wang i kom jo ni kame in ikwanyo ki lobo me Misiri kede twon teko kede twer? 12Pinyo bo kame mio in imio jo me Misiri kare me waco be in ikwanyo jo ni ki Misiri tetekeny inek gi i mori, di iko muducaro gi atwal atwala? Jik lilo; lok tam ni di likame iko kelo can moro i kom jo ni. 13- Yutuno jotic ni Aburaam, Isaka kede Yakobo. Yutuno cikere kame bin in itimo kede gin di ikwongere in kikomi be ibino mino gi ikwae kame tot bala acer kame tie i edou, kede be ibino mino ikwae gi lobo nono dedede kame in bin icikere be bino doko mergi atwal.” 14Di do Rwot oko loko tam mere di likame eko kelo can kame en oudo eiko pi kelo i kom jo mege.

15Musa oko wok piny ki wi moru, di emako kide are abatal kame kowandiko cik i kom gi tuni tuni. 16Rubanga en kame oudo otimo kide nogo, doko iwandik kame oudo tie i kom gi da en kame ewandiko, egoro gi i kom kide nogo.

17Yosua oko winyo woo me dwan jo di kitie ilelem, di eko waco ne Musa be, “Ango atie winyo woo me yi i kimere.”

18Do Musa oko waco be, “Woo nono likame winyere bala dwan jo koloo yi, arabo bala dwan jo kame kobwono i yi; en ebedo dwan jo kame tie wer.”

19Kakame Musa oko noko kede kimere di eko neno atin twon, kede eko neno jo di kitie miel, cunye oko wang, di eko lwomo kide abatal kame oudo emako di eko tuturo gi i dud moru.20En eko kwanyo atin twon kame gin oudo kitimo, eko calaro en kede mac, eko riege edoko purupuru, di eko rube i pii. Di do eko mino jo me Isirael oko mate. 21Musa oko penyo Aaron be, “Nyo kame jogi otimo nin en komio in imio gin kitimo twon dub kame dwong rom kano?”

22Aaron oko dwoko be, “Adwong na, kur ilil keda; in ingeo kite kame jogi tam gi tie kede i timo gikarac. 23Gin kiwaco na be, ‘Wan likame ongeo gikame otieko timere ne Musa ngat kokwanyo wa ki lobo me Misiri, in tim ne wan rubanga kame bino telo wa.’ 24Aso, ango ako waco ne gin kelo na saabu kame ngat acelacel oudo tie kede; di jo kame oudo tie kede oko kwanyo mwolere me yit gi di kiko mina, di ango ako lwomo gi i mac, di atin twon noni oko wok kiye.”

25Musa oko neno be Aaron oudo oko jalo jo obilorikin di kiko doko gi me nyero but jokwor gi. 26Manono oko mino en eko cungo i erute me kakame jo oudo ogero iye kimere di eko lelemo be, “Jo dedede kame mito Rwot kibin buta kan!” Di Jolebi dedede oko cokere bute. 27En eko waco negi be, “Rwot Rubanga me Isirael ciko ngat acelacel kikom wu pi ngapo epima mere i piere di ikounu donyo mamano kimere, cako i erute tetuni tuno tetuca, di inekunu imiegu wu, adiereson wu, kede jokio wu.” 28Jolebi oko timo bala kame Musa oudo ociko negi, di ceng nono kiko neko jo kame romo tutumia adek. 29Musa oko waco negi be, “Ceng atin wun itiekunu kwerere kenu pi bedo jo kame timo tic ka Rwot, pien dano acelacel kikomu oneko wode arabo omin mere, manono oko mino Rwot omio wu winyo mere.”

30Ceng alubo mere Musa oko waco ne jo be, “Wun itiekunu timo dub arac twatwal. Do nataman ango bobo ayaro dok i wi moru but Rwot; cengemogo akaruno kwane di eko sasiro wu.” 31Aso, Musa oko dok but Rwot di eko waco be, “Jogi otieko timo dub adwong twatwal; gin kitieko timo rubanga gin kede saabu. 32- Nataman ango akwai pi sasiro dub gin, do ka likame in iyaro sasiro gin, ango akwai iwei nyinga tenge ki itabu kame in iwandiko iye nying jo nin.”

33Rwot oko waco ne Musa be, “Ngat kotimo dub buta en kame ango abino weno nyinge ki itabu na. 34Nataman in oti di iko telo jo ot kabedo kame ango atieko waco ni; neningo, malaika na bino telo ni yongayo. Do ka ceng me mino gin alola otuno, ango abino mino gin alola pi dub gin.”

35Di Rwot oko cwano ne jo aumpuli pien gin oudo kimio Aaron otimo cal me atin twon.

Baibuli I Leb Kumam

© 2013 Bible Society of Uganda

More Info | Version Index