Search form

Yai 33

Rwot Owaco ne Jo me Isirael pi Yai weko Moru me Sinai

1- Rwot oko waco ne Musa be, “Yai iwek kabedo noni, in karacel kede jo kame in ikelo ki lobo me Misiri, di ikounu ot i lobo kame bin ango akwongere pire but Aburaam, Isaka, kede Yakobo, di awaco be, ‘Ango abino mino lobo noni but ikwae wu.’ 2Ango abino cwano malaika telo wu, di ango ako bino riamo tenge jo Kanan, jo Amor, jo Kiti, jo Perisi, jo Kibi, kede jo Yebu. 3Wun itienu ot i lobo kame lac doko di emio; do ango likame abino ot kede wu pien wun ijounu epali, doko manono cengemogo mio ako muducaro wu i yongayo.”

4Kakame jo owinyo kede kope me gero nogi, gin kiko donyo koko di kiko weko ngapo mwolere me tubuso kom. 5Pien Rwot oudo ociko Musa pi waco negi be, “Wun ijounu epali. Ka koto di ango aupere kede wu akadi pi kare katitidi, koto amuducaro wu. Aso, nataman kwanyunu tenge mwolere me tubuso kom, di ango ako neno gikame abino timo ne wu.” 6Pi mano, jo me Isirael oko kwanyo tenge mwolere me tubuso kom, di do likame kiko ngapo gi cako i kare kame kiyai kede ki moru me Sinai.

Eema me Ariamakin kede Rwot

7Kame jo me Isirael oudo gero kimere gi, Musa oudo tero Eema kacil di eko sipe kakame bobor kede kakame jo ogedo iye. En oudo eko lwonge be Eema me ariamakin kede Rwot. Jo dedede kame oudo mito kop kame wok kibut Rwot oudo kioto i eema me riamo kunono. 8I kare dedede kame Musa oudo oto kede i eema nono, jo dedede oudo yai di kiko cungo, ngat acelacel i nyim ekeko me kima mere, di kiko donyo ngino Musa pake en tieko donyo i Eema nono. 9Kame Musa oudo otieko donyo i Eema nono, edou kame cal bala epir oudo bino di eko cungo i nyim ekeko me Eema nono, di Rwot ko donyo yamo kede Musa. 10I kare dedede ka jo oudo oneno edou kame cal bala epir di ocungo i nyim ekeko me Eema nono, jo dedede oudo yai cungo i nyim ikekon me kimere gi, di kiko luro wi gi piny. 11Iepone nono Rwot oudo yamo kede Musa wang i wang, bala kame dano yamo kede ngawote. Di do Musa bin bobo ko dok kakame jo oudo ogero iye kimere. Do eponga kame oudo konye, Yosua wot ka Nun, oudo dong bedo i yi Eema nono.

Rwot Ocikere pi Bedo kede Jo mege

12Musa oko waco ne Rwot be, “Neningo, in en kame iwaco na be akwany jogi, do in likame iko mina angeo ngat kame in itie oora kede. Aso di in itieko waco be ingea kiber, doko cunyi yom i koma. 13Pi mano, ka cunyi yom i koma, mia angei iik nin, tetekeny ango aniang i komi kiber di ako meede kede yomo cunyi. Ngei kiber be ateker noni obedo jo ni.”

14Rwot oko waco be, “Ango abino upere kedi, di ako mini iudo anapakin.”

15Musa oko gamo be, “Ka in likame iyaro upere kede wa, kur imi wan oyai ki kan. 16Pien jo bino ngeno benyo be in cunyi yom i koma, karacel kede jo ni, ka likame iupere kede wa? Upere nin kede wa bino mino wan obedo pat kede jo dedede me wi lobo.”

17Rwot oko waco ne Musa be, “Ango abino timo bala kame in ikwao, pien ango angei kiber doko ango cunya yom i komi.”

18Musa di oko waco be, “Ango akwai imia anen rieny me deyo ni.”

19- Rwot oko gamo be, “Ango abino beo i nyimi kede angosibib na dedede, di ako bino waco i nyimi nyinga kacil; ango en Rwot, abino timo kisa kede mwolo but ngat kame cunya oyero. 20Do ango likame abino mini ineno wanga; pien likame tie dano moro kame nena di eko dong kuo. 21Neningo, kabedo tie i ngeta, kakame in ibino cungo iye i wi kidi; 22tetekeny kame ango atie beo kede deyo na, ango abino keti kakopokere me moru, di ako umi kede cinga paka ango tieko kato. 23Di do ango ako bino kwanyo cinga tenge, di in iko neno ngea do likame nyima.”

Baibuli I Leb Kumam

© 2013 Bible Society of Uganda

More Info | Version Index