Search form

Yai 36

1“Basalel, Okoliab, kede jotic apat dedede kame Rwot otieko mino apiranut kede niang i kom epone me timo jamini dedede kame mitere pi gero kabedo kacil, bino timo gi dedede bala kame Rwot otieko ciko.”

Jo Otero Giamia Atot

2Musa di do oko lwongo Basalel, Okoliab kede jotic apat dedede kame Rwot oudo omio apiranut, jo dedede kame oudo owinyo i cuny gi pi bino timo tic; 3Musa di oko mino gin giamia dedede kame oudo jo me Isirael otero bute me timo tic me Eema kacil. Jo me Isirael oko meede kede tero giamia gi but Musa buli odiko. 4Manono oko mino jo dedede kame oudo tie timo tice me epone dedede me Eema kacil oko ot kuno, dano acelacel oweko tic mere, 5di gin kiko waco ne Musa be, “Jo tie kelo jamini kame tot kalamo kame mitere pi timo tic kame Rwot ociko ne wa timo.”

6Aso, Musa oko mino cik kame oko sarakino i kimere dedede be, “Likame poore ngatamoro bobo kelo gimoro bala giamia me gero Eema kacil.” Di oko do gengo jo kelo giamia gi; 7pien jamini kame oudo jo otieko kelo oudo tot kalamo kame oudo mitere pi tieko tic.

Gero Taberenakol

(Yai 26.1-37)

8Jo kame oudo ipirana kalamo jo icegun kikom jo kame oudo tie timo tic, en kame oko timo taberenakol. Gin kitime kede isukan tomon kame kotimo kede ausin ebululu ebululu, akwakwar kede kame kwar mere, di kotubuso kom gi kede cal me cerubim. 9Boro me esuka acelacel oudo tie mita tomon kiwie are, kede laco mere oudo tie mita are. 10Gin kiko kuno isukan kany kiribakino gi karacel, di bobo kiko timo kamanono da kede icegun kany kame oudo odong. 11Gin kiko dodolo egoe kame erangi mere ebululu ebululu di kiko kune ilak esuka me ooko me abunge acelacel. 12I lak abunge me agege, gin kiko dodolo egoe nono tien ot kany, di bobo kiko dodolo egoe me lak abunge me are da tien ot kany di kipimere kede me abunge me agege. 13Gin kiko timo akod ot kany me saabu di kiko tic kede gi me ribakino abungeta me isukan nogo karacel; manono oko mino taberenakol oko bedo di etie kicel.

14Di gin kiko timo isukan tomon kiwie acel kame kotimo kede yer me diegi, me umo taberenakol. 15Gin kiko timo gi di kirorom, boro me esuka acelacel oudo tie mita tomon kiwie adek, kede laco gi oudo tie mita are. 16Gin kiko kuno isukan kany iribakino gi karacel i abunge acel, kanyape kame oudo odong da gin kiko kuno kiribakino i abunge acel. 17Di kiko kuno egoe kame kododolo tien ot kany i lak esuka me ooko i abunge acelacel. 18Gin kiko timo akodeta ot kany me nyonyo buronsi pi ribakino abungeta are nogo, tetekeny kibed aum acel. 19Gin bobo kiko timo ne Eema nono aum ace are, acel kame kotimo kede lau me oromo kame konyongo kede kame ume ki ooko kame kotimo kede emukule ace apwot.

20Di do kiko timo ne Taberenakol ibaon me yat akasia kame kiko sisipo me timo purem mere. 21Boro me ebao acelacel me purem oudo tie puti tomon kiwie kany kede laco gi oudo romo puti are. 22Ebao acelacel oudo tie kede tiene are me ribakino gi karacel; gin kiko timo kamanono kede ibaon dedede me purem me Taberenakol. 23Gin kiko timo ibaon me purem me taberenakol kaman: ibaon ot are kame kocibo i ngete kame dok i bad tetu piny; 24kede kiko timo da kede nyonyo siliba agangeta ot ongwon kame koketo i dud ibaon ot are nogo, agangeta are are i dud ebao acelacel me gango tiene are. 25Gin kiko timo ibaon ot are me purem pi keto i nget taberenakol tetu ocelu kame dok i bad tetu malo, 26kede agangeta ot ongwon kame kotimo kede nyonyo siliba. Kiko keto agangeta are are i dud ebao acelacel. 27Gin kiko timo ibaon kanyape pi keto i ngei taberenakol kame dok i bad tetu tim, 28kede kiko timo da bobo ibaon are me isondana me ngee. 29Ibaon me isondana nogi gin kiko mino opokere i tetu piny, do kiko ribere i wi gi malo, i alung me agege. Ibaon are me isondana nogo bin oko timo kamanoni. 30Manoni bin oko mino ibaon me purem me ngee oko bedo kanyauni, di dud ebao acelacel oudo tie kede agangeta are are kame kotimo kede siliba.

31Gin kiko timo ari tomon kiwie kany me ebao me yat akasia, ari kany pi ibaon me purem me tetucel me taberenakol, 32kede da bobo ari kany pi ibaon me purem tetu ocelu, kede bobo kany me purem me ngee, bad kame dok tetu tim. 33Ari me diere, kame beo i kor ibaon me purem, oudo rire yai ki lak taberenakol tetucel tuno tetu ocelu. 34Gin kiko puno ibaon me purem kede saabu di kiko keto negi alung kame kotimo kede saabu, me rwako ari. Ari nogo da oudo kopuo kede saabu.

35Gin kiko timo isenge kede egoe kame meny, kame oudo kotimo kede ausin me erangi ebululu ebululu, akwakwar, kede kame kwar, di kiko kuno iye cal me cerubim kede apiranut. 36Kiko timo ipirin ongwon me yat akasia pi tweno egoe me isenge, kiko puno gi kede saabu, di kiko guro akod kame kotimo kede saabu i kom gi. Di do kiko timo negi agangeta ongwon kame kotimo kede siliba. 37Gin kiko timo egoe kame pwot di emeny, me galao ekeko me Eema; kitime kede ausin me erangi ebululu ebululu, akwakwar, kede kame kwar di kiko tubuso en, kikue kede piso me cing. 38Kiko timo ne egoe me galao ekeko nono ipirin kany kame koguro akod i kom gi. Di gin kiko puno wi ipirin nogo kede saabu karacel kede atad gi da, kede kiko timo ne ipirin nogo agangeta kame kotimo kede nyonyo buronsi.

Baibuli I Leb Kumam

© 2013 Bible Society of Uganda

More Info | Version Index