Search form

Yai 39

Timo Igoen me Josaseredoti

(Yai 28.1-14)

1Basalel kede jodiru ace oko timo igoen acil kede ausin ebululu ebululu, akwakwar, kede akwar mere, kame oudo josaseredoti poore ngapo kame kioto timo tic i Kabedo Kacil; kiko timo ne Aaron igoen me ngasaseredoti bala kame oudo Rwot ociko ne Musa.

2Gin kiko timo epod kede ausi me saabu, ausin ebululu ebululu, akwakwar kede kame kwar mere, kede egoe kame cil di epwot. 3Kidao apien me saabu kede enyondo tuno en doko perepere di kiko ngolongolo en i ausin katitino kame oko tubuso kede egoe aliamaliam, ausin ebululu ebululu, akwakwar, kede akwar me cweno egoe. 4Gin kiko timo da ausin are abatal me epepet di kiko ribakino gi i nget epod tuni tuni me twene. 5Rakoba kame kotubuso, kame oudo tie iye, oudo kotimo iepone acel nono da, kede saabu, ausin ebululu ebululu, akwakwar kede kame kwar mere, kede egoe ameny, bala kame oudo Rwot ociko ne Musa.

6Di oko iiko kide me wel kame kolwongo be onik di oko keketo gi i kom iwayai me saabu kame kotado, di oko goro nying awobe tomon kiwie are ka Yakobo i kom gi kede apiranut. 7En eko dupo kide are nogo i ausin me liero epod i epepet, pi bedo kide me yutuno ikekon me awobe tomon kiwie are ka Yakobo, bala kame oudo Rwot ociko ne Musa.

8En eko timo egoe me kor kede apiranut bala kame oudo kotimo kede epod di eko tubuso en kamanono da. 9Laco kede boro mere oudo rorom, boro inci kanyangon kede laco da inci kanyangon, di odole oko doke. 10Gin kiko keto iye irotin ongwon me kide me wel. I eroto me agege kiketo kidi karenelia, kirisolit kede emeradi; 11i eroto me are kiko keto kidi turukuse, sapir kede dayamon; 12i eroto me adek gin kiko keto kidi jasinti, agate kede ametis; 13kede do i eroto me ongwon kiko keto kidi, beril, onik kede jasipa; oudo kokeketo gi i kom iwayai me saabu kame kotado. 14Kikom kide tomon kiwie are nogi, kidi acelacel oudo cungo pi ekeko acel me Isirael di ogoro i kom kidi acelacel nying awobi acelacel ka Yakobo. 15Gin kiko timo ne egoe me kor nono irikoi are kame kotimo kede saabu kame kojililo di oko mimino gi bala aunoi; 16di kiko timo iwayai kame kotado are me saabu kede alung are da me saabu, di kiko keto alung nogo i isondana me egoe me kor, tetu malo mere. 17Gin kiko kokodo irikoi are me saabu kame komino bala aunoi nogo i alung are nogo, 18di kiko kokodo wi irikoi nogo tetu odong i kom iwayai kame kotado me saabu noka; manono oko mino kiribakino gi i kom ausin me epod i anyim. 19Di do gin bobo kiko timo alung are me saabu di kiko keto gi i isondana me egoe me kor nono, tetu piny mere, i lake me yie kame kio kede epod. 20Gin bobo kiko timo alung are ace me saabu di kiko keto gi tetu piny me ausin are me liero epod i epepet, i tetu nyime kakame ausin riamo iye kede epod, malo me rakoba kame kotubuso me epod. 21Gin kiko tweno alung me egoe me kor i kom alung me epod kede ausi ebululu ebululu, tetekeny egoe me kor but i wi rakoba di likame eko ledo tenge ki epod, bala kame oudo Rwot ociko ne Musa.

Timo Igoen Ace me Josaseredoti

(Yai 28.31-43)

22Ekanso kame kongapo kede epod oudo kotimo kede ausi me erangi ebululu ebululu; 23oudo kotuco kakame twolo diere, me rwako wic, di oko toko kuno ngute rimaro tetekeny kur enyili. 24I lak ekanso nono piny mere rimaro, gin kiko kuno iye cal me anyakini me yat kame kolwongo be pomagurunet kede ausin me erangi ebululu ebululu, akwakwar kede kame kwar mere, kede da egoe ameny. 25Gin kiko timo da acwirin kede saabu kame kojililo di kiko keketo gi i dierediere me pomagurunet, rimaro lak ekanso. 26Gin kiko teero acwirin kede cal me pomagurunet di kiculere rimaro lak ekanso nono me timo tic, bala kame oudo Rwot ociko ne Musa.

27Gin kiko kuno ne Aaron kede awobe mege isatin abocoboco me egoe ameny, 28igoen me wic, kede ipalen acegocego me egoe ameny, 29kede ausi ibatalal me tweno pier kame kotimo kede egoe ameny di oko tubuso kuno kede ausin ebululu ebululu, akwakwar, kede akwar, me tweno pier, bala kame oudo Rwot ociko ne Musa.

30Gin kiko timo saabu ibatalal di cil, en gianena kacil, di kiko giro iye iwandik kame waco be, “Komio but Rwot.” 31Gin kiko twene kede ausi ebululu ebululu i kom egoe kame kodwadwalo i wic i tetu nyime, bala kame oudo Rwot ociko ne Musa.

Tieko Timo Tic

(Yai 35.10-19)

32Aso, iepone noni gin bin kiko tieko timo tic me taberenakol, Eema me ariamakin kede Rwot. Jo me Isirael oudo oko timo gi dedede bala kame oudo Rwot ociko ne Musa. 33Di do gin kiko tero taberenakol but Musa; kitero Eema kede jamini me time dedede: akodeta mege, ibaon me purem mere, atekai mege, ipirin mege, kede agangeta mege; 34aum me lau kame konyongo me oromo kede aum me emukule ace kame konyongo kiber, kede esuka me ngolo isenge; 35Sanduku me Isikan kede atekai mege karacel kede kom me timo kisa; 36emesa kede jamini me tic mere dedede, kede mugati kame koyalo but Rwot; 37gicibo etala kame oudo kotimo kede saabu kame kojililo, italan mege, kede jamini mege dedede, kede mo me italan nogo; 38alutari kame oudo kotimo kede saabu; mo me wir; odok angwe kur; esuka me galao ekeko me eema; 39alutari kame oudo kotimo kede nyonyo buronsi, kede kekei mere da me buronsi, atekai mege, kede jamini me timo tice mege dedede; kalaya kede gi me cibe; 40isukan me celo diakal, ipirin mege kede agangeta gi, kede esuka me galao erute me diakal, aunoi kede loce me tweno Eema; kede jamini dedede me timo tice me taberenakol; 41igoen kame oudo kotimo kiber me timo tic i Kabedo Kacil, igoen kacil kame ngasaseredoti Aaron poore ngapo, kede igoen kame awobe mege poore ngapo me timo tic bala josaseredoti. 42Jo me Isirael oudo oko tieko timo tice dedede bala kame oudo Rwot ociko ne Musa. 43Kakame Musa oko ngingico kede gikame gin oudo kitimo, en eko neno be gin oudo kitieko timo tic dedede bala kame oudo Rwot ociko, di eko kwano negi winyo.

Baibuli I Leb Kumam

© 2013 Bible Society of Uganda

More Info | Version Index