Search form

Yai 4

Rubanga Omio Musa Twer me Timo Giaura

1Di Musa oko dwoko ne Rwot be, “Do ka jo me Isirael likame oyei winyo kop na, di kiko waco be likame Rwot oneeno buta, nyo kame ango abino timo?”

2Rwot oko penye be, “Nyo ino atie i cingi no?”

En eko dwoko be, “Ebela.”

3Rwot oko waco ne be, “Uce piny.” Musa oko uco ebela nono piny di eko lokere edoko twol; Musa oko ringo tenge. 4Di Rwot oko waco ne Musa be, “Cwai cingi di iko make kede yibe.” Musa oko gungo di eko kwanye, di eko lokere i cinge edoko ebela bobo. 5Rwot oko waco ne be, “Oti itim kamanoni pi nyuto ne jo me Isirael be Rwot, Rubanga ka joakwari gi, Rubanga ka Aburaam, Rubanga ka Isaka kede Rubanga ka Yakobo, oneeno buti.”

6Rwot bobo oko waco ne Musa be, “Rwak cingi i yi ekanso ni.” Musa oko rwako cinge i yi ekanso mere, do kakame ewote kede, buge oudo otatapo i cinge, di do etar ineno bala akako. 7Di Rwot oko waco ne be, “Dwok cingi i yi ekanso ni.” En eko rwako cinge edwoko i yi ekanso mere, do kakame ewote kede, cinge oudo otieko doko ber cal acala kede adulion apat me kome. 8Rwot oko waco ne Musa be, “Ka likame gin kiyei kop ni ingei timo gianena me agege, gianena me are bino mino gi kiyei. 9Do ka gin kidagi yei gianena are nogi arabo winyo kop ni, in ibino twomo pii mogo ki ecilet me Nail iko onyo kakatek; pii nono bino lokere doko remo.”

10Do Musa oko dwoko ne Rwot be, “Okwe Rwot, sasiro ango; cako lem sek likame ango atwero yamo kiber, akadi tuno nan da di in itieko yamo keda noni. Ango awao yamo awaa doko leba momoko.”

11Di Rwot oko penyo Musa be, “Ngai kame mio dano twero yamo? Ngai kame mio yite ding amoto lebe to? Ngai kame mie eneno piny amoto kamie ebedo emuduk? Mam ango Rwot inonono? 12Nan oti, ango abino konyi yamo; abino mini kop kame ipoore waco.”

13Do Musa oko dwoko be, “Okwe Rwot, likame kamano, cwai dano moro ace.”

14Manono oko mino Rwot oudo wangcuny i kom Musa di eko waco be, “Do omini kono, Aaron Ngalebi? Ango angeo be en etwero yamo kiber, doko nan da en etie bino riamo kedi; cunye bino bedo yom pi neni. 15In ibino yamo kede en di iwaco ne kope kame epoore waco. Ango abino konyo wun dedede yamo, doko abino nyuto ne wu gikame ipoorenu timo. 16En ebino bedo ngat kame yamo kede jo akaka in, di do in iko bino bedo bala Rubanga, ngat kame yamo nen gikame epoore timo. 17Maki ebela noni i cingi, pien ibino tic kede en me timo gianena.”

Musa Odok Misiri

18Di Musa oko dok but Yesero papa me dako mere di eko waco ne be, “Okwe yei na dok but wade na atie Misiri pi neno ka pwodi kitie kikuo.” Yesero oko yei di eko kwano ne sapali aber.

19Kakame Musa oudo pwodi tie kede Midian, Rwot oko waco ne be, “Dok Misiri, pien jo kame oudo tie mito neki otieko totoun.” 20Aso, Musa oko kwanyo dako mere kede awobe mege di eko mino gi kibedo ingei punda, di kiko yai dok Misiri; emako da ebela kame oudo Rubanga owaco ne be eteri.

21Rwot bobo oko waco ne Musa be, “Kame idok Misiri, miero inen be itimo i nyim Parao giaura dedede kame ango atieko mini twer me timo; do ango abino mine ebedo ngaepali tetekeny kur eyei ne jo yai. 22Di in iko bino waco ne Parao be, ‘Rwot owaco be: Isirael obedo woda kao. 23- Ango oudo awaco ni pi weko woda yai, tetekeny ewora, do in iko dagi. Nan ango abino neko wodi kao.’ ” 24Di oudo kitie i yongayo, Rwot oko riamo kede Musa di eko tamo neke i kakame oudo kibuto iye kede jo me ode. 25-26Do Sipora oko kwanyo engaro abit di eko kepo kede kom wode me cuo, di eko damakino remo mere i tiene.b Pi kwer me akepo kame en etimo, en eko waco ne Musa be, “Ateteni in ibedo cwara me remo!” Di do Rwot oko weko tam me mito neko Musa. 27Di manono oudo tie timere, Rwot oko waco ne Aaron be, “Poore ioti i wi tim pi riamo kede Musa.” Aaron oko ot di eko riamo kede Musa i moru kacil, di eko donyo note kakame eriamo kede en. 28Musa oko waco ne Aaron kope dedede kame Rwot ocwae kede; doko da eko waco ne kop i kom gianena dedede kame Rubanga ocike be etimi. 29Di Musa kede Aaron oko ot di kiko coko karacel joadongo dedede me Isirael. 30Aaron oko waco kope dedede kame Rubanga owaco ne Musa, di eko timo gianena i wang jo kanono. 31Jo oko yei kope gi; di do kakame kiko winyo kede be Rwot oudo obino but gi di eko neno kite kame oudo kotie tero gi kede kirac, gin kiko luro wi gi piny di kiko woro Rwot.

Baibuli I Leb Kumam

© 2013 Bible Society of Uganda

More Info | Version Index