Search form

Yai 6

1Rwot oko waco ne Musa be, “Nan ibino neno gikame abino timo ne Parao, abino tic kede twer na di en eko weko jo na yai, kom ebino riamo gi ariama pi yai ki lobo mere.”

Rubanga Olwongo Musa

2- Rubanga oko waco ne Musa be, “Ango en Rwot. 3Ango aneeno but Aburaam, Isaka kede Yakobo bala Rubanga Won Twer, do likame ango ako mino gi kingea kede nyinga kacil be Rwot. 4Doko da ango ako timo kede gi isikan, di acikere pi mino gi lobo me Kanan, lobo kame nan kibedo iye bala jokumbor. 5Doko da ango atieko winyo cur me jo me Isirael, jo kame jo me Misiri omio obedo ipasoi, di do nan ango ako yutuno isikan na. 6Pi manono, oti iwace jo me Isirael be, ‘Ango en Rwot, abino gonyo wu ki tice atek kame jo me Misiri dio wu timo, di ako lako wu ki bedo ipasoi gi. Abino lako wu kede twer na adwong kame bino timo tice me aura pi mino gi alola. 7Abino mino wu ibedunu jo na di ango ako bino bedo Rubanga wu. Ibinunu ngeno be ango en Rwot Rubanga wu, ngat kogonyo wu ki tice atek kame jo me Misiri dio wu timo. 8Abino tero wu i lobo kame bin ango akwongere pi mino Aburaam, Isaka kede Yakobo, di ako bino mino wu lobo nono pi doko meru. Ango en Rwot.’ ” 9Musa oko waco ne jo me Isirael kope nogi, do gin kiko dagi winyo kope mege pien cuny gi oudo odubere pi tic atek kame kotie dino gi timo, pien gin kibedo ipasoi.

10Di Rwot oko waco ne Musa be, 11“Oti iwace Parao me Misiri pi weko jo me Isirael yai tenge ki lobo mere.” 12Do Musa oko waco ne Rwot be, “Ka ber jo me Isirael da odagi winyo kop na, benyo benyo kame Parao bino yei winyo kede kop na, ango ngat kalikame atwero yamo kiber?”

13Rwot oko yamo kede Musa kede Aaron di eciko gi i kom kop amako jo me Isirael kede Parao me Misiri; en eciko gi pi kwanyo jo me Isirael ki Misiri.

Ekeko me Anywali ka Musa kede Aaron

14Ruben, awobi kao ka Yakobo oudo tie kede awobe ongwon: Kanok, Palu, Keseroni kede Karami, gin kibedo joakwari me ikekon kame kocako kede nying gi. 15Simeon oudo tie kede awobe kanyape: Jemuel, Yamin, Okad, Yakin, Sokar kede Saul, en wot ka dako me Kanan. Gin oudo kibedo joakwari me ikekon kame bin kocako kede nying gi. 16- Lebi oudo tie kede awobe adek: Gereson,+ Kokat kede Merari. Lebi bin oko bedo kuo pi mwakini tol acel kede ot adek kiwie kanyaare. 17Geresom oko nywalo awobe are: Libini kede Simei; gida kiko bedo kede ikwae atot. 18Awobe ka Kokat gin ige: Amuram, Isikar, Keburon kede Usiel. Kokat bin oko bedo kuo pi mwakini tol acel kede ot adek kiwie adek. 19Merari oko nywalo awobe are: Makali kede Musi. Magonogi en bin obedo ikekon me jo Lebi kede ikwae gi.

20Amuram bin oko nyomo Yokebed amin me papa mere, di kiko nywalo Aaron kede Musa. Amuram bin oko bedo kuo pi mwakini tol acel kede ot adek kiwie kanyaare. 21Isikar oko nywalo awobe adek: Kora, Nepeg kede Sikiri. 22Usiel da oudo oko nywalo awobe adek: Misael, Elisapan kede Sitiri.

23Aaron bin oko nyomo Eliseba nyar ka Aminadab, en oudo ebedo amin me Nakason. Gin kiko nywalo Nadab, Abiku, Eleasar, kede Itamar. 24Kora bin oko nywalo awobe adek: Asir, Elikana kede Abiasap. Gin bin kiko bedo joakwari me ikekon kopopokun ki ateker ka Kora. 25Eleasar, wot ka Aaron oko nyomo nyako acel kikom anyira ka Putiel, di kiko nywalo Pinekasi. Magonogi oudo obedo jotel me ude kede ikekon me ateker me jo Lebi.

26Aaron kede Musa gin nogi en kame Rwot oudo owaco negi be, “Otunu iwotunu jo me Isirael ki Misiri.” 27Gin kibedo jo koudo ooto waco ne Parao me Misiri pi gonyo jo me Isirael.

Gikame Rwot Ociko ne Musa kede Aaron

28Kakame Rwot oyamo kede Musa i lobo me Misiri, 29en ewaco ne be, “Ango en Rwot; wac ne Parao me Misiri gi dedede kame ango awaco ni.”

30Do Musa oko dwoko be, “Ango ngat kalikame atwero yamo kiber, benyo benyo kame Parao twero winyo kede kop na?”

Baibuli I Leb Kumam

© 2013 Bible Society of Uganda

More Info | Version Index