Search form

Yai 7

1Rwot oko waco ne Musa be, “Neningo, ango abino mini idoko bala Rubanga i but Parao, do omini Aaron ko bino bedo bala enabi nin. 2In ibino waco ne Aaron gi dedede kame ango aciki iye, di en eko bino waco ne Parao pi weko jo me Isirael yai tenge ki lobo mere. 3-4- Do ango abino mino Parao bedo ngaekanya, di eko dagi winyo kope wu, akadi di ango atim gianena kede giaura atot i lobo me Misiri. Ingei manono ango ako bino kelo alola alit twatwal i kom jo me Misiri di ako telo jo na wok ki Misiri, jo me ekeko acelacel me anywali me Isirael di lubere aluba. 5Jo me Misiri ko bino ngeno be, ango en Rwot, kakame ango abino tic kede twer na pi kelo can i kom jo me Misiri di ako kwanyo jo me Isirael ki lobo gi.” 6Musa kede Aaron oko timo gikame Rwot ociko negi. 7I kare kame kiyamo kede Parao, Musa oudo tie kede mwakini me dongo ot kanyauni, do Aaron oudo tie kede mwakini ot kanyauni kiwie adek.

Ebela ka Aaron

8Rwot oko waco ne Musa kede Aaron be, 9“Ka Parao owaco be, ‘Timunu giaura,’ in Musa ibino waco ne Aaron be, ‘Kwany ebela ni di iko uce piny i nyim Parao, di eko bino lokere edoko twol.’ ” 10Aso, Musa kede Aaron oko ot but Parao di kiko timo bala kame Rwot oudo ociko negi; Aaron ouco ebela mere piny i nyim Parao kede jotic mege adongo, di eko lokere edoko twol. 11Parao oko lwongo jo mege angengeo piny kede imuroko; di jo atimo tangu nogi da oko timo kamanono kede diru gi. 12Ngat acelacel kibut gi ouco ebela mere piny di kiko lokere kidoko twole; do ebela ka Aaron oko mwonyo mergi. 13Do Parao pwodi oko meede kanyo kop, eko dagi yei winyo kop gi, bala kame oudo Rwot otieko waco.

Can me Agege: Pii Odoko Remo

14Di Rwot oko waco ne Musa be, “Parao ngaepali; en edagi weko jo oti. 15Aso, otunu pi riamo kede en diki odiko, esawa kame en etie ot kede i ecilet me Nail; wun otunu ikounu cungo i dog ecilet kure di imako i cingi ebela kame oudo olokere odoko twol ca. 16Di in iko bino waco ne be, ‘Rwot, Rubanga me Iburanian ocwaa buti pi waco ni be poore iwek jo mege yai oti, tetekeny kioti iwore i wi tim. Do tuno esawa noni in pwodi idagi yei. 17- Pi mano, Rwot owaco be gikame en eyaro timo bino mini ingeo be ateteni en ebedo Rwot. Neningo, ango abino juto pii me ecilet me Nail kede ebela kame tie i cinga ni, di pii ko bino lokere doko remo. 18Aporogon kame tie i ecilet noni bino totoun, pii da bino doko ngwe, di jo me Misiri likame ko twero bino mato pii me ecilet noni.’ ”

19Rwot oko waco ne Musa be, “Wace Aaron mak ebela mere di eko rieno bade i wi pie dedede me Misiri: i wi icileta, isamai kede ataparin mege, tetekeny pie nogo lokere dok remo; di remo ko bino romo lobo me Misiri dedede, kiton i yi yen kame kopao amoto ingaroi kame koroko me coko pii.”

20Di Musa kede Aaron oko timo bala kame Rwot ociko negi. I nyim Parao kede jotic mege adongo, Aaron oko tingo ebela mere malo di eko juto wi pii me ecilet, di pii dedede me ecilet oko lokere odoko remo. 21Aporogon kame oudo tie i pii oko totoun di pii oko doko ngwe rac, omio jo me Misiri oudo likame twero mate. Remo oudo oromo lobo me Misiri dedede. 22Do jotim tangu me Misiri oko gida timo jwok gi di gida kiko timo gi acel nono. Aso, Parao oko dong adonga kanyo kop kamanono, bala kame Rwot oudo otieko waco. 23Parao gire oko lokere eoto i ode, likame eko keto tam mere i kom gikame oudo otimere. 24Jo me Misiri oko donyo kukunyo dog ecilet me Nail pi mono pii me amata, pien oudo likame kitwero mato pii me ecilet.

25Ceng kanyaare oko kato ingei Rwot juto wi pii me ecilet me Nail.

Baibuli I Leb Kumam

© 2013 Bible Society of Uganda

More Info | Version Index