Search form

Yai 9

Can me Kany: To me Leini

1Di Rwot oko waco ne Musa be, “Oti but Parao di iko waco ne be Rwot Rubanga me Iburanian owaco be, ‘Wek jo na yai kioti kiwora. 2Aso, ka in idagi negi yai, 3abino mini alola i yore me cwano ni tuwo arac me leini: asigiran, pundan, aguraguran, doke, romini kede diegi. 4Do abino nyuto apokapoka i dierediere me leini me jo me Isirael kede me jo me Misiri, tetekeny kur le moro kikom leini me jo me Isirael toi. 5Ango Rwot atieko moko ceng me diki pi bedo ceng kame ango abino timo kede gi noni i lobo noni.’ ”

6Ceng alubo mere Rwot oko timo bala kame oudo etieko waco; leini dedede me jo me Misiri ototoun, do leini me jo me Isirael likame oto akadi acel moro. 7Parao oko pepenyo di eko udo be, likame le moro oto akadi acel kikom leini me jo me Isirael. Do Parao oko meede ameda kede epali mere di likame eko yei ne jo yai.

Can me Kanyape: Giakwoti

8Di Rwot oko waco ne Musa kede Aaron be, “Jobunu buru i cingu pong di Musa ko kiro gi i yamo i nyim Parao. 9En ebino doko apua di eko duny i wi lobo me Misiri dedede, di eko bino kelo giakwoti i kom jo kede i kom leini i lobo me Misiri dedede.” 10- Aso, gin kiko jobo buru mogo ki keno di kiko ot cungo i nyim Parao, di Musa oko kiro buru i yamo di manono oko kelo buge me giakwoti i kom jo kede i kom leini. 11Jotim tangu likame oko twero cungo i nyim Musa, pien giakwoti oudo otatapo kom gi bala jo icegun dedede me Misiri. 12Do Rwot oko mino Parao obedo ngaepali, omio likame eko yei kop gi, bala kame oudo Rwot otieko waco ne Musa.

Can me Kanyaare: Akako

13Di Rwot oko waco ne Musa be, “Yai diki odiko sek di iko ot but Parao di iko waco ne be, Rwot Rubanga me Iburanian owaco be, ‘Wek jo na yai kioti, tetekeny kiko wora. 14Pien nataman ango abino cwano can alit kalamo i komi kede i kom jotic ni kede i kom jo ni, tetekeny in iko bino ngeno be likame tie ngatamoro acal bala ango i wi lobo lung. 15Pien ka koto oudo ango akelo aumpuli i komi kede i kom jo ni, koto nan likame tie dano moro kodong kuo i wi lobo. 16- Ango aweki ibedo kuo pi nyuto ni twer na kede pi mino nyinga bed iruo i wi lobo lung. 17Do in pwodi itie wakere ne jo na idagi weko gi kiyai. 18Diki i esawa noni ango abino mino akako me aura cwei kanoni, kame epone mere lem pwodi likame otimere Misiri cako i ageini mere. 19Nan do cwai kop dwok leini ni kede jame ace apat dedede atie obar tetekeny kiud kagwok; jo kede leini dedede kame tie obar abongo kagwok bino totoun kame akako ocwei i kom gi.’ ” 20Mogo kikom jotic ka Parao kame oudo oko bedo kede lworo i kom kop kame Rwot owaco oko susunyo tero ipasoi kede leini gi kagwok. 21Jo ace apat kalikame oketo tam gi i kom ikwenyar kame Rwot omio oko weko ipasoi kede leini gi obar.

22Di Rwot oko waco ne Musa be, “Riei badi malo tetekeny akako cwei i lobo me Misiri lung, i kom jo kede leini kede yen dedede me obar kame tie Misiri.” 23Musa oko tingo ebela mere malo, di Rwot oko cwano akako kede kot kame meny di mwoc. Rwot ocwao 24- kot agwai me akako kame meny di mwoc. Oudo ebedo kot kede yamo arac kalikame lem pwodi ocwei Misiri cako i ageini mere. 25Akako oko jwato tuno rereto gi dedede kame oudo tie obar i lobo me Misiri lung, jo karacel kede leini; enyoto cam kame tie i poti di eko tuturo yen me obar. 26Adul me Gosen, kakame jo me Isirael oudo tie iye en oko bwot.

27Parao oko lwongo Musa kede Aaron di eko waco negi be, “Ayei be ango adubo i manoni, Rwot li kede kop moro, do ango kede jo na en kame otie kede raco. 28Legunu but Rwot! Akako otieko cwei ne wa cwei akalamo! Ango abino mino wu iyaunu; likame doko ipoorenu meede bedo kan.”

29Musa oko waco ne be, “Cucuto di ango awok ooko me bomba, abino rieno cinga di ako lego but Rwot di kot ko bino cok, di akako da ko jiko cwei, tetekeny in ingei be wi lobo obedo me ka Rwot. 30Do ango angeo be in kede jotic ni likame pwodi itienu kede lworo but Rwot Rubanga.” 31I kare nono akako oko dudubo pulakc kede mawele, pien mawele oudo ocek i poti kede pulak da oudo tie tuuro. 32Do likame tie egere moro me engano kame oko dubere pien gin kibedo i poti likame kisunyo cek.

33Aso, Musa oko yai kibut Parao eko donyo ooko me bomba di eko tingo cinge lego but Rwot, di kot amwocumwocun kede akako oko cok. 34Do kakame Parao oneno kede be kot amwocumwocun kede akako otieko cok, en doko eko medo timo dub. En kede jotic mege kiko meede bedo joepali. 35Aso, Parao oko timo epali, eko dagi ne jo me Isirael yai, bala kame oudo Rwot otieko waco ne Musa.

Baibuli I Leb Kumam

© 2013 Bible Society of Uganda

More Info | Version Index