Search form

Ageini 25

Idwe kame Aburaam Onywalo kede Ketura

(1 Iyutun 1.32-33)

1Aburaam bin bobo oko nyomo dako ace kame nyinge oudo Ketura. 2Ketura bin oko nywalo ne Aburaam Simuran, Yokosan, Medan, Midian, Isibak kede Sua. 3Yokosan en obedo papa me Seba kede Dedan. Awobe ka Dedan bin gin en Asurim, Letusim kede Leumim. 4Awobe ka Midian bin gin en Epa, Eper, Kanok, Abida kede Eleda. Idwe nogi dedede bin obedo ikwae ka Ketura.

5Aburaam bin oko mino jamini mege dedede but Isaka. 6Do di bin pwodi Aburaam tie kuo, en bin eko mino giamia but awobe kame en oudo enywalo kede mon ace. Di do en eko cwano gi tenge kibut wode Isaka, kiko ot i piny kame bin tie tetu kide.

To kede Ayika ka Aburaam

7Aburaam bin obedo kuo i wi lobo pi mwakini tol acel kede ot kanyaare kiwie kany (175). 8Aburaam bin oko to di oudo etieko ti kiber; oudo etieko doko emojong doko mwakini mege me dongo oudo do tot twatwal. En bin oko yike karacel kede joawade mege kame oudo otieko to. 9Awobe mege, Isaka kede Isimael oko yike i abo me Makepela kame bin tie tetu kide me Mamure, i poto ka Epuron wot ka Sokar Ngakiti. 10- Poto nono en kame bin Aburaam owilo kibut jo Kiti. Kanono en kame bin oko yiko iye Aburaam kede dako mere Sara. 11Di do Aburaam bin otieko to, Rubanga oko mino wode Isaka winyo. Isaka bin oko donyo bedo i nget atan me Beerlakairoi.

Ikwae ka Isimael

(1 Iyutun 1.28-31)

12Ikwae ka Isimael wot ka Aburaam kame bin enywalo kede Agar dano me Misiri, ngatic ka Sara, 13gin ige di lubere kede rom me dongo gi: Nebaiot en kao ka Isimael di do Kedar, Adebeel, Mibisam, 14Misima, Duma, Masa, 15Kadad, Tema, Yetur, Napis kede Kedema. 16Jo nogi en kobedo idwe ka Isimael, doko magonogi en obedo nying gi di lubere kede calere gi kede kabedere gi, jopug tomon kiwie are di lubere kede atekerin gi. 17Isimael bin oko bedo kuo i wi lobo pi mwakini tol acel kede ot adek kiwie kanyaare (137), eko to di oko yike karacel kede joawade mege kame oudo otieko to. 18Ikwae ka Isimael bin oko donyo bedo cako ki Kabila tuno Sur, kabedo kame pimere kede Misiri i bad me Asiria. Gin bin kiko pokere tenge kikom ikwae ka Aburaam icegun.

Nywalo Esau kede Yakobo

19Jogi en kobedo ikwae ka Isaka wot ka Aburaam: Aburaam bin onywalo Isaka. 20I kare kame bin Isaka oromo kede mwakini ot ongwon (40), eko nyomo Rebeka nyar ka Betuel me Aram, kabedo kame tie Mesopotamia. Rebeka oudo obedo amin me Laban dano me Aram. 21Isaka bin oko kwano Rwot pi dako mere, piento en oudo ebedo adonge. Rwot oko gamo ilega mere di Rebeka oko udo yie. 22Idwe bin oko donyo adidiun i yie. En di eko waco be, “Ka edoko do cal kamane, pinyo bo kame mio ango pwodi ameede bedo kuo?” Di do en eko ot penyo Rwot pi mito ngeno gikame oudo tie timere ne.

23- Rwot oko waco ne be,

“Atekerin are tie i yi.

In ibino nywalo jo are kame bino pokere.

Ngat acel bino bedo tek lono ngat ocelu,

awobi adwong bino timo tic ne awobi atidi.”

24Kakame kare mere me nywal oko romo kede, en eko nywalo bangi. 25Atin me agege bin oko wok di ekwar, di kome lung tie kede yer bala egoe ayeyer. Gin bin kiko cako nyinge Esau. 26I cen mere di omin mere da oko wok di emako atitinyo ka Esau; manono oko mino oko cako nyinge Yakobo. Isaka bin oudo do mwakini me dongo mere oromo ot kanyape (60) i kare kame Rebeka onywalo kede idwe nogi.

Esau Ocato Twero mere me Atin Kao

27Kakame awobe nogi oko dongo kede, Esau bin oko bedo ipirana i dwar, doko en oudo dano kame maro bedo obar. Do Yakobo oudo obedo dano kame ling alinga, doko en oudo emaro bedo i paco. 28Isaka oudo maro Esau piento en oudo cunye maro camo ringo me leini me obar. Do Rebeka oudo maro Yakobo.

29Cenge moro acel Yakobo oudo tie tedo dek, di Esau oko dwogo ki obar di kec obwone. 30Esau oko waco ne Yakobo be, “Okwe kec obwona, mia dek moro akwar no acami!” Kop nono oko mino oko lwonge be Edom.

31Yakobo oko gamo be, “Me agege in kong sesi nango twero nin me anywali.”

32Esau oko waco ne be, “Neningo, ango ayapuno to; kony me twero me anywali en nyo kibuta?”

33- Yakobo oko gamo be, “Kwongere kong buta.” En di eko kwongere bute di eko mino twero mere me anywali but Yakobo. 34Di do Yakobo oko mino Esau kwon kede dek, di eko cam eko amata, di eko yai eoto gire. Epone no en kame Esau ocao kede twero mere me anywali.

Baibuli I Leb Kumam

© 2013 Bible Society of Uganda

More Info | Version Index