Search form

Ageini 31

Yakobo Olwi kibut Laban

1Yakobo oko winyo be awobe ka Laban oudo tie waco be, “Yakobo otieko tero abar ka papa wa; en etieko lony kede jamini ka papa wa.” 2Doko Yakobo oko neno da be Laban oudo likame tie bedo kede kiber bala lem sek. 3Di Rwot oko waco ne Yakobo be, “Doki i lobo ka joakwari ni kede but joawade ni, ango abino bedo tie kedi.”

4Aso, Yakobo oko cwano kop di oko lwongo Lakeri kede Lea pi bino kakame oudo en etie kwano iye romini. 5En eko waco negi be, “Ango nan atie neno be likame bobo papa wu bedo keda kiber bala lem sek. Do Rubanga ka papa na obedo tie keda. 6Wun ingeunu be ango abedo timo ne papa wu tic kede teko na dedede. 7Aso di en ebedo sera; edwodwoko musala na tien kede tien. Do Rubanga likame oko yei ne timo na gimoro arac. 8Ka oudo Laban owaco be, ‘Abino culi kede idwe diegi akomol,’ diegi dedede oudo ko nywalo idwe akomol; doko ka oudo ewaco be, ‘Abino culi kede idwe diegi esisi,’ diegi dedede oudo ko nywalo idwe esisi. 9Iepone noni, Rubanga otieko kwanyo ki cing papa wu leini kame oudo etie pito di eko mino gi buta.

10“I kare kame diegi kwarere kede, ango ako lek di ako neno di ikoroi ekomol kede esisi kede enyanga en kame tie kwaro diegi. 11Di malaika ka Rubanga oko yamo keda i wang lek di elwonga be, ‘Yakobo,’ ango ako dwoko ne be, ‘Ango ine!’ 12En eko waco be, ‘Kong ting wangi iko neno, ikoroi dedede kame tie kwaro diegi obedo ikoroi ekomol kede esisi kede enyanga; pien ango atieko neno gi dedede kame Laban tie timo nin. 13- Ango en Rubanga kame bin onyutere buti i Betel, kakame bin ionyo kiye mo i wi kidi di iko kwongere buta. Nan do yai ki lobo noni di iko dok kakame bin konywali iye.’ ”

14Lakeri kede Lea oko dwoko ne Yakobo be, “Benyo, tie iner moro kame koweko ne wada i ot ka papa wa? 15En etie tero wa bala jokumbor. Piento en etieko cato wa, di eko donyo tic kede sente kame kowilo wa kede. 16Abar dedede kame Rubanga okwanyo kibut papa wa obedo merwa kede me idwe wa; nan do in tim gi dedede kame Rubanga owaco ni.”

17Aso, Yakobo oko yai di eko keto idwe kede mon mege i ngei aguraguran; 18Yakobo oko kolo leini mege dedede, kede eko coko jame dedede kame oudo eudo ki Mesopotamia, di eko cako dok but papa mere Isaka i lobo me Kanan. 19Aso, kakame Laban oudo ooto kede nyaro yer me romini, Lakeri oko kwalo rubangan ka papa mere ki ot. 20Yakobo oko ngalo Laban likame etuco ne be en oudo etie yai ot. 21Aso, en eko ringo kede jamini dedede kame oudo etie kede; ecako kong ngolo nam me Eupurate, di do eko tiro nyime tetu piny kobedo imukuran imukuran me Gilead.

Laban Owapo Yakobo

22Ingei ceng adek Laban oko winyo be Yakobo olwi. 23En eko kwanyo joe mege di eko cako wapo Yakobo pi ceng kanyaare, tuno eko make i piny kobedo imukuran imukuran me Gilead. 24Do Rubanga oko bino but Laban dano me Aram iwor di oko yamo kede i lek be, “Gwokere kara kur iwace Yakobo kop moro akadi aber amoto arac.” 25Aso, Yakobo oko guro eema mere i wi moru, di Laban kede joe mege oko guro eema gi i piny kobedo imukuran imukuran me Gilead.

26Laban oko waco ne Yakobo be, “Nyo kame in itieko timo? In itieko ngala di iko tero anyira na bala jo kame komako ki yi. 27Pinyo komio in ingala idagi waco na iko lwi alwia? Ka koto oudo iwaco na, koto oudo aperuno in kede kilel kede were, di kogoo bul kede arigirigi. 28Pinyo komio likame imia anoto ikwae kede anyira na pi moto gi amot me pokere? In itimo tim me mingo. 29Ango atie kede twer me timo ni can; do Rubanga ka papa ni oyamo keda iwor aoki di ewaco na be, ‘Gwokere kara kur iwace Yakobo kop moro akadi aber amoto arac.’ 30Akadi bed bala oudo in iyai pien paco ka papa ni oudo omui, do pinyo komio iko kwalo rubangan nango?”

31Yakobo oko dwoko ne Laban be, “Ango ayai iepone nono pien oudo atie kede lworo be cengemogo in ibino mano anyira ni kibuta tetek. 32Do ka in iudo ngatamoro kibut wan kan kame tie kede rubangan nin, ngat nono likame bino kuo. I nyim joe nango kan, nyut giri moro kame tie buta, di iko kwanye itere.” Aso, Yakobo oudo likame ngeo be Lakeri oudo okwalo rubangan nogo.

33Aso, Laban oko ot eko donyo more i eema ka Yakobo; eko ot more i eema ka Lea, kede eko more i eema me apasoi are, do likame eko udo gimoro. Di do en eko ot i eema ka Lakeri. 34Bin Lakeri oudo okwanyo rubangan nogo di eko keto gi i lau kame kobedo kede i ngei aguragura di eko bedo i wi gi. Laban omumulo gi dedede kame oudo tie i ot, do likame eko udo gi. 35Lakeri oko waco ne papa mere be, “Adwong kur ilil keda; ango likame atwero cungo i nyimi, pien atie kede tuo me mon.” Aso, Laban oko medo more, do likame eko udo rubangan mege.

36Di do Yakobo oko ngoi, eko donyo ronkino Laban. Yakobo oko penyo Laban be, “Atimo ni raco nyo? Atimo dub nyo, komio iwapa teko teko? 37Bed bala in itieko mono jame nango dedede, jamini mege me odi en kame itieko udo? Ket gi kane i nyim joe na kede i nyim joe ni, tetekeny gin kingol kop i diere wan kedi jo are. 38Likame tie oromo arabo diel ni moro kame yie owok, doko likame acamo emerekek moro kikom romini ni. 39Tek kame leini ager oudo oneko oromo moro, ango en kame oudo abedo kede kei. Likame oudo akele buti pi nyuto be manono likame obedo raco na. In oudo imia culo gimoro kame kokwalo iceng amoto iwor. 40Tien atot ango akanyakino lieto me i dier iceng kede ngico me iwor. Likame oudo atwero nino. 41Oudo ebedo kamanono pi mwakini ot are kame oudo atie kedi. Ango atio mwakini tomon kiwie ongwon pi nyomo anyira ni, doko ako tic pi mwakini kanyape pi udo doke kibuti. Bed bala kamanono da, in iko bedo dwodwoko musala na tien kede tien. 42Ka koto Rubanga ka joapapi na, Rubanga ka Aburaam kede me Isaka, likame oudo tie keda, oudo koto nan icwa adok kede cinga nono. Do Rubanga otieko neno peko na kede tic kame atimo, di eko ngolo raco i wii iwor aoki.”

Yakobo Otimo Isikan kede Laban

43Di Laban oko waco ne Yakobo be, “Anyira obedo mega, idwe obedo mega, doke obedo mega; gi dedede kame itie neno obedo mega. Likame bobo tie gimoro kame tin ango atwero timo i kom kop me anyira nogi kede idwe gi. 44Wek nan do otim kedi isikan, di eko bino bedo bala ijura i diere nango kedi.”

45Aso, Yakobo oko kwanyo kidi di eko sipe. 46Yakobo oko waco ne joe mege be, “Cokunu kide,” di gin kiko coko kide kiko kumemo gi; gin kiko cam i nget kide kame kikumemo nogo. 47Laban oko cako nying kanono be Jegar Sakaduta, do Yakobo oko cako ne be Galeed. 48Laban oko waco ne Yakobo be, “Atukit me kide gi bino bedo gi me iyutun but ango kede in.” Manono en komio kolwongo kabedo nono be Galeed. 49Doko da Laban oko lwongo kabedo nono be Misipa, pien ewaco be, “Poore Rwot cib wange i kom wa kame opokere kedi. 50Ka in idonyo tero anyira na kirac, arabo ka in bobo imedo mon ace i kom anyira na, bed bala likame tie ngatamoro kame bino waco nango, do yutuno be Rubanga tie mujura i diere nin kede ango.” 51Di Laban oko waco ne Yakobo be, “Neni atukit me kide go kede kidi kosipere kame ango atieko keto i diere nin kede ango. 52Atukit me kide go, kede kidi kosipere mere tie mujura be, likame ango abino ngolo atukit noni tuno buti, doko da likame ida ibino ngolo atukit noni kede kidi kosipere noni tuno buta pi timo asura. 53Rubanga ka Aburaam kede Rubanga ka Nakor bino ngolo kop i diere wa.” Aso, Yakobo oko lairo pi gwoko cikere noni, di elairo i nying Rubanga kame papa mere Isaka bin woro. 54Yakobo oko mino giayala ki wi moru, eko lwongo joe mege pi bino camo. Ingei gin cam, gin kiko dong bedo i wi moru iwor kiakia. 55Odiko sek di piny oru, Laban oko moto ikwae mege kede anyira mege kede amot me notere di eko kwano negi winyo, eko pokere kede gi edok paco.

Baibuli I Leb Kumam

© 2013 Bible Society of Uganda

More Info | Version Index