Search form

Ageini 35

Rubanga Omio Yakobo Winyo i Betel

1- Rubanga oko waco ne Yakobo be, “Yai di iko ot paka Betel di iko donyo bedo kuno. Geri alutari kuno ne Rubanga konyutere buti i kare kame iringo kede kibut omini Esau.” 2Yakobo oko waco ne jo me ode karacel kede jo dedede kame oudo tie kede be, “Ucunu tenge rubangan mogo me kumbor kame nan tie i diere wu, ikounu lonyere di ikounu loko igoen wu. 3Di do okounu yai ot Betel, kakame ango abino gero iye alutari ne Rubanga kame bin ogamo koko na i kare kame oudo atie kede i peko, doko ebedo tie keda i kabedo dedede kame ango abedo ot iye.” 4Aso, gin kiko mino Yakobo rubangan dedede me kumbor, kede mwolere kame oudo tie i yit gi; Yakobo oko kano gi i dud ejinga kame oudo iyapi kede Sekem.

5Kakame oudo gin kitie ot kede, Rubanga oko mino jo me bomban dedede kame iyapi kede gi lworo, omio likame ngatamoro oko wapo gi. 6Yakobo kede jo dedede kame oudo tie kede en oko tuno Lus, kakame nataman kolwongo be Betel i lobo me Kanan. 7En eko gero alutari kuno di eko lwongo kanono be El Betel, pien kanono en kame oudo Rubanga onyutere ne kiye i kare kame eringo kede kibut omin mere. 8Di Debora, ngat kame bin gwoko Rebeka, oko to di oko yike i dud ejinga kame tie i aditot piny me Betel, oko lwongo yat nono be, Allon Bacut.t

9Rubanga bobo oko nyutere but Yakobo kakame ebino kede ki Mesopotamia, di eko mine winyo. 10- Rubanga owaco ne be, “Nyingin Yakobo; likame bobo kobino lwongi be Yakobo, do kobino lwongi be Isirael.” Nyinge oko do doko Isirael. 11- Rubanga owaco ne be, “Ango Rubanga Won Twer, nywali iko nyai; ateker kede atekerin bino wok kibuti, kede abakai bino wok kibuti. 12Abino mini lobo kame oudo amio Aburaam kede Isaka, doko abino mino lobo nono but ikwae ni.” 13Di Rubanga oko yai oweko Yakobo kakame eyamo kede kiye. 14- Yakobo oko sipo kidi kakame Rubanga oyamo kede kiye; eko onyo iye bwini bala giayala kede mo. 15Aso, Yakobo oko lwongo kabedo kame Rubanga oyamo kede kiye nono be Betel.

To ka Lakeri

16Yakobo kede jo me paco mere oko yai ki Betel. Kakame oudo pwodi kitie kede kakabobor kede Epurat, kare me nywal ka Lakeri oko tuno; nywal mere oko bedo tek. 17Kakame oudo aramo me nywal ocere ne kede, ngat kame oudo tie cole oko waco ne be, “Lakeri, kur ibed kede lworo, iudo bobo atin awobi.” 18Kakame oudo cunye tie cot kede (pien eko to), en eko cako nying atin nono be Benoni,u do papa mere oko cako ne be Benjamin.

19Aso, Lakeri oko to, di oko yike i nget yongayo me Epurat (en Betelem), 20di Yakobo oko sipo kidi i wi ates mere. Kidi me ates ka Lakeri nono tie cungo tuno tin. 21Isirael oko meede kede ot mere di eko guro eema mere i ngei gedo abor me Eder.

Awobe ka Yakobo

(1 Iyutun 2.1-2)

22- Kakame Yakobo oudo tie bedo kede i lobo nono, Ruben oko buto kede Bilka, kame oudo obedo ngat acel kikom mon ka papa mere; Yakobo oko winyo kop nono.

Yakobo oudo tie kede awobe tomon kiwie are. 23Awobe ka Lea gin ige: Ruben (kao ka Yakobo), Simeon, Lebi, Yuda, Isakar kede Sebulun. 24Awobe ka Lakeri gin ige: Yosepu kede Benjamin. 25Awobe ka Bilka, ngat koudo obedo apasoit ka Lakeri gin ige: Dan kede Naputali. 26Awobe ka Silipa, ngat koudo obedo apasoit ka Lea gin ige: Gad kede Aser. Magi oudo obedo awobe ka Yakobo kame enywalo di etie Mesopotamia.

To ka Isaka

27- Yakobo oko dok but papa mere Isaka kakame kolwongo be Mamure, i nget Keburon. Kanoni en kame Aburaam kede Isaka oudo obedo iye bala jokumbor. 28Isaka oko bedo paka mwaka me dongo mere romo tol acel kede ot kanyauni (180) 29di eko to di oudo eti twatwal; awobe mege, Esau kede Yakobo oko yike.

Baibuli I Leb Kumam

© 2013 Bible Society of Uganda

More Info | Version Index